सोमवार, 19 ऑक्टोबर 2026
Today's Maharashtra Breaking News Updates in marathi 19.10.2026
Maharashtra to World Breaking News :
मुंबईतील जुहू परिसरात बॉलीवूड अभिनेता टायगर श्रॉफच्या गाडीवर झालेल्या गोळीबार प्रकरणी पोलीस तपास वेगाने सुरू असून बिश्नोई गँगने जबाबदारी स्वीकारल्याचा दावा केला जात आहे. कोल्हापुरातील प्रतिष्ठेच्या गोकुळ दूध संघ निवडणुकीची मतमोजणी आज सकाळी ८ वाजल्यापासून सुरू झाली असून महायुती आणि महाविकास आघाडीच्या नेत्यांची प्रतिष्ठा पणाला लागली आहे.
महाराष्ट्राच्या मुख्य निवडणूक अधिकाऱ्यांनी (CEO) फॉर्म ६ मध्ये सुधारणा करण्यासाठी केंद्रीय निवडणूक आयोगाकडे (ECI) प्रस्ताव पाठवला असून ‘SIR’ अंतर्गत वगळलेल्या मतदारांना पुन्हा नोंदणी सुलभ करण्याचा प्रयत्न केला आहे. जपानमधील आयची-नागोया येथे १८ ऑक्टोबरपासून सुरू झालेल्या आशियाई पॅरा गेम्स २०२६ मध्ये १६८ भारतीय पॅरा-ॲथलीट्सचे पथक पदकांची कमाई करण्यासाठी मैदानात उतरले आहे.
19 Oct 2026 09:45 AM (IST)
भारतीय क्रिकेट संघाचा कसोटी आणि एकदिवसीय कर्णधार शुभमन गिल याच्यासाठी आगामी न्यूझीलंड दौरा अत्यंत महत्त्वाचा असणार आहे. या दौऱ्याची तयारी मजबूत करण्यासाठी आणि फॉर्म मिळवण्यासाठी गिलने रणजी ट्रॉफी २०२६-२७ च्या हंगामात खेळण्याचा महत्त्वाचा निर्णय घेतला होता. मात्र, पंजाब आणि छत्तीसगड यांच्यात न्यू चंदीगड येथील स्टेडियमवर सुरू असलेल्या एलिट गट 'ब' मधील सामन्यात त्याच्या या पुनरागमनाची सुरुवात अत्यंत निराशाजनक ठरली.
नाणेफेक जिंकून पंजाब संघाने प्रथम फलंदाजी करण्याचा निर्णय घेतला. कर्णधार म्हणून आणि न्यूझीलंड मालिकेच्या दृष्टीने सर्वांच्या नजरा शुभमन गिलच्या फलंदाजीवर खिळल्या होत्या. क्रीजवर स्थिरावण्याची संधी मिळण्यापूर्वीच गिल स्वस्तात बाद झाला. त्याने अवघ्या ५ चेंडूंचा सामना करत फक्त १ धाव काढली आणि त्याला माघारी परतावे लागले.
19 Oct 2026 09:35 AM (IST)
पुणे शहरातून एक अत्यंत संतापजनक आणि दुःखद घटना समोर आली आहे. पुण्यातील येरवडा परिसरातील मच्छी मार्केट भागात महापालिकेच्या ड्रेनेज कामासाठी खोदलेल्या १० ते १५ फूट खोल खड्ड्यात पडून प्रदीप परदेशी नावाच्या व्यक्तीचा मृत्यू झाला आहे. १७ ऑक्टोबर रोजी ही दुर्घटना घडली असून, प्रशासनाच्या ढिसाळ कारभारावर नागरिकांमधून तीव्र संताप व्यक्त होत आहे. येरवडा येथील मच्छी मार्केट परिसरात ड्रेनेजच्या कामासाठी मोठा खड्डा खोदण्यात आला होता. रिक्षाचा धक्का लागल्यामुळे प्रदीप परदेशी यांचा तोल गेला आणि ते थेट १० ते १५ फूट खोल खड्ड्यात पडले. या अपघातात त्यांना गंभीर दुखापत झाली होती. उपचारादरम्यान त्यांचा मृत्यू झाल्याची दुर्दैवी माहिती समोर आली आहे.
19 Oct 2026 09:19 AM (IST)
Tiger Shroff Car Firing: मुंबईच्या जुहू परिसरातून एक अत्यंत धक्कादायक आणि खळबळजनक बातमी समोर आली आहे. बॉलिवूड अभिनेता टायगर श्रॉफ (Tiger Shroff) याच्या गाडीवर अज्ञात हल्लेखोरांनी जोरदार गोळीबार केला आहे. या हल्ल्यात टायगर श्रॉफ सुखरूप बचावला असला, तरी त्याचा कारचालक फिरदोस आणि एक रिक्षाचालक जखमी झाले आहेत.
जुहू पोलीस स्टेशनपासून अवघ्या १०० मीटर अंतरावर हा गोळीबार झाला. बाईकवरून आलेल्या तीन अज्ञात हल्लेखोरांनी टायगर श्रॉफच्या गाडीवर तब्बल दहा गोळ्या झाडल्या.या प्राणघातक हल्ल्यात टायगर श्रॉफ सुखरूप राहिला. मात्र त्याचा कारचालक फिरदोस आणि एक रिक्षाचालक जखमी झाले. जखमींना तातडीने रुग्णालयात दाखल करण्यासाठी स्वतः टायगरने गाडी चालवत मदत केली.
