Maharashtra Weather Update: महाराष्ट्रात हवामानाचा मूड बदलणार! ‘या’ 7 जिल्ह्यांत पावसाचा इशारा

Maharashtra Weather Update: महाराष्ट्रात परतीचा पाऊस पुन्हा सक्रिय झाला असून, पुढील दोन ते तीन दिवस राज्यातील काही भागांत पावसाची शक्यता आहे. 18 ऑक्टोबर रोजी रत्नागिरी आणि सिंधुदुर्ग जिल्ह्यांना विजांच्या कडकडाटासह जोरदार पावसाचा यलो अलर्ट देण्यात आला आहे.

• परतीचा पाऊस सक्रिय
• कोकणात यलो अलर्ट
• पश्चिम महाराष्ट्रात पाऊस
• मराठवाड्यातही शक्यता

राज्यात सध्या दोन वेगळी दृश्य दिसत आहेत. एकीकडे कडक ऊन आहे, घामाने सगळे हैराण आहेत, तर दुसरीकडे काही भागात पावसाने अचानक हजेरी लावली आहे. गेले दोन दिवस कोकण आणि पश्चिम महाराष्ट्रात चांगला पाऊस पडतोय. हवामान खात्याने आता नवीन अंदाज दिला आहे, त्यानुसार पुढचे दोन-तीन दिवस राज्यात पावसाचेच असणार आहेत. Maharashtra Weather Update:

हवामान विभागाच्या माहितीनुसार, उत्तर तामिळनाडू आणि आंध्र प्रदेशच्या किनाऱ्यावर चक्राकार वाऱ्यांची स्थिती तयार झाली आहे. साधारण 4 ते 6 किलोमीटर उंचीवर हे वारे फिरत आहेत. लक्षद्वीपजवळ पण अशीच स्थिती आहे. त्यामुळे केरळपासून ते कर्नाटक किनारपट्टीपर्यंत कमी दाबाचा पट्टा सक्रीय झाला आहे. याचाच परिणाम म्हणून महाराष्ट्रात पावसासाठी पोषक वातावरण तयार झाले आहे.

मुंबई आणि कोकणात कसे राहील हवामान?

आज 18 ऑक्टोबर रोजी मुंबई आणि पालघरमध्ये हवामान कोरडेच राहणार आहे. पावसाची शक्यता कमी आहे. पण रायगडमध्ये हलका ते मध्यम पाऊस पडेल असा अंदाज आहे. तर रत्नागिरी आणि सिंधुदुर्गला मात्र जोरदार पावसाचा इशारा दिला आहे. तिथे विजा कडकडणार आहेत आणि ताशी 40 ते 50 किलोमीटर वेगाने वारे वाहणार आहेत. या दोन जिल्ह्यांना यलो अलर्ट दिला आहे.

रत्नागिरीत तर काल परतीच्या पावसाने चांगलाच जोर धरला होता. चिपळूण आणि उत्तर रत्नागिरीत मुसळधार सरी कोसळल्या. त्यामुळे रस्त्यावर पाणी साचले होते, जनजीवन थोडे विस्कळीत झाले होते.

उन्हापासून लोकांना दिलासा मिळाला पण शेतकऱ्यांचे टेन्शन वाढले आहे. कारण आता भात कापणीचे दिवस आहेत. हातातोंडाशी आलेले पीक पावसात भिजले तर मोठे नुकसान होणार आहे. त्यामुळे बळीराजा चिंतेत आहे.

पश्चिम महाराष्ट्रात पण पावसाची हजेरी

पश्चिम महाराष्ट्रात पण पावसाने हजेरी लावली आहे. पुणे शहर, पुणे घाट आणि सातारा जिल्ह्यात काही ठिकाणी हलका ते मध्यम पाऊस पडण्याची शक्यता आहे. कोल्हापूर, सांगली, सोलापूर या भागात मात्र विजांच्या कडकडाटासह वादळी पाऊस होईल. इथे पण हवामान खात्याने यलो अलर्ट जारी केला आहे.

Weather Update : सातारा, सांगली, कोल्हापूरसह अनेक भागांत मुसळधार पाऊस

सांगली जिल्ह्यात तर कालच अनेक ठिकाणी पाऊस पडला. कडेगाव, तासगाव तालुक्यात जोरदार पाऊस झाला. देवराष्ट्रे, वडीया, रायबाग, बलगवडे, कवठेमहांकाळ, डफळापूर या गावांमध्ये चांगला पाऊस झाला. सकाळपासूनच ढगाळ वातावरण होते आणि दुपारनंतर पावसाने सुरुवात केली. दुष्काळी भागात पाऊस पडल्यामुळे शेतकऱ्यांना थोडा दिलासा मिळाला आहे.

मराठवाड्याचे काय?

कोकण आणि पश्चिम महाराष्ट्रासोबतच मराठवाड्यात पण काही ठिकाणी विजांसह पावसाची शक्यता आहे. तर उर्वरित राज्यात, म्हणजे विदर्भ आणि उत्तर महाराष्ट्रात मात्र उन्हाचा तडाखा कायम राहणार आहे. तिथे अजून पावसाचे वातावरण नाही.

Weather Update : राज्यात पुढील 4-5 दिवस वादळी पावसाचा इशारा

एकंदरीत सांगायचे तर, राज्यात आता परतीचा पाऊस सक्रीय झाला आहे. शेतकऱ्यांनी आपल्या पिकांची काळजी घ्यावी आणि गरज असेल तर झाकून ठेवावे, असा सल्ला दिला जात आहे. नागरिकांनी पण वादळी वाऱ्याच्या वेळी घराबाहेर जाणे टाळावे.