सौजन्य - नवराष्ट्र टीम
वाई : आगामी निवडणुकीसाठी सर्व पक्षांनी जोरदार तयारीला सुरुवात केली आहे. सर्व राजकीय पक्षांनी दौरेदेखील वाढवले आहेत. अशातच आता वाई तालुक्यातून एक मोठी बातमी समोर आली आहे. उपमुख्यमंत्री अजित पवार यांच्या उपस्थितीत राष्ट्रवादी काँग्रेस शरद पवार पक्षाचे युवक तालुका अध्यक्ष समाधान कदम आणि बावधन गणातीत दरेवाडी येथील सरपंच, उपसरपंच, सदस्य आणि असंख्य कार्यकर्त्यांनी अजित पवार यांच्या राष्ट्रवादीत प्रवेश केला आहे.
राष्ट्रवादी फुटीनंतर ॲड. विजयसिंह पिसाळ यांच्या नेतृत्वाखाली अनेक तरुणांनी राष्ट्रवादी शरद पवार पक्षात प्रवेश केला. परंतु स्थानिक नेतृत्वाकडून कोणतीही पक्षीय ताकद आणि पाठबळ मिळत नसल्याची खदखद गेले अनेक दिवस तरुणाच्या मनामध्ये होती. २०२४ च्या विधानसभा निवडणुकीत शरद पवार गटाच्या उमेदवार अरुणादेवी पिसाळ यांच्या प्रचारादरम्यान अनेक कार्यकर्त्यांनी जीवाची बाजी लावली. दुर्दैवाने त्यांच्या प्रयत्नांना पुरेसे यश न मिळाल्याने कार्यकर्त्यांच्या मनामध्ये नाराजी पसरली होती. निवडणुकीनंतर शरद पवार गटाचे स्थानिक नेते कार्यकर्त्यांच्या पाठीशी ठामपणे उभे राहतील अशी आशा कार्यकर्त्यांना वाटत होती. परंतु त्यानंतर सर्व कार्यकर्ते ओस पडले होते, अशी माहिती यावेळी समाधान कदम, मनोहर शिंदे यांनी पत्रकारांना दिली.
यावेळी तालुक्यातील शरद पवार गटाचे युवक तालुका अध्यक्ष समाधान कदम तसेच दरेवाडी गावचे सरपंच मनोहर शिंदे, उपसरपंच सिंधू राजपुरे, ग्रामपंचायत सदस्य विजय राजपुरे, उषा थोपटे, अनुसया राजपुरे, वृषाली राजपुरे, भगवान थोपटे, कणुर-दरेवाडी विकास सोसायटी माजी संचालक चंद्रकांत राजपुरे,शंकर राजपुरे, सुधीर थोपटे, दादासाहेब भोसले, संपत राजपुरे, शामराव यादव, मधुसूदन यादव, राजेंद्र यादव, चंद्रकांत यादव, मारुती राजपुरे, बाळासाहेब राजपुरे, संतोष राजपुरे, हरी राजपुरे, बळीबा थोपटे, गजानन थोपटे, घनश्याम यादव, रामचंद्र येवले, पोपटराव राजपुरे, रवींद्र राजपुरे, किसन शिंदे, भिकू पिसाळ, सुरेश थोपटे आदींनी उपमुख्यमंत्री अजित पवार, मदत व पुनर्वसन मंत्री मकरंद पाटील, नितीन पाटील यांच्या उपस्थितीत प्रवेश केला आहे. हा प्रवेश येणाऱ्या स्थानिक स्वराज्य संस्थांच्या निवडणुकीत ॲड. विजयसिंह पिसाळ यांना अडचणीचा ठरणार का? याकडे सगळ्यांचे लक्ष लागले आहे.
अनेक मान्यवर व पदाधिकाऱ्यांची घरवापसी
यावेळी गेल्या काही दिवसांपूर्वी दरेवाडी गावचे सरपंच मनोहर शिंदे, राष्ट्रवादी शरद पवार गटाचे युवक तालुका अध्यक्ष समाधान कदम यांनी राष्ट्रवादी अजित पवार गटाचे मदन भोसले, दिलीप पिसाळ– पाटील, राजेंद्र कदम, विक्रम पिसाळ – पाटील, प्रणित पाटील यांच्याशी संवाद साधून राज्याचे मदत व पुनर्वसन मंत्री आमदार मकरंद पाटील आणि नितीन पाटील यांच्या नेतृत्वावर विश्वास ठेवून पुन्हा सन्मानाने घरवापासी करण्याचा निर्णय घेतला. तसेच येणाऱ्या काळात भाजपच्या देखील अनेक कार्यकर्त्यांचा अजित पवार गटात प्रवेश होणार असल्याचे प्रणित पाटील यांनी सांगितले.
