Photo credit- Team Navrashtra
Marathi Breaking news live updates: नाशिकमध्ये अलीकडेच ८ बांगलादेशी नागरिक अवैधरित्या भारतात प्रवेश केल्याचे उघडकीस आले आहे. पोलिसांनी विशेष मोहिमेदरम्यान या घुसखोरांना अटक केली. अटक करण्यात आलेल्या आठ घुसखोरांपैकी तिघांकडे जुन्नर तालुक्यातील नारायणगाव या ठिकाणचे आधारकार्ड आढळून आले.
10 Feb 2025 06:26 PM (IST)
गृहमंत्री अमित शहा आणि नॅशनल कॉन्फरन्सचे नेते ओमर अब्दुल्ला यांच्यातील बैठक संपली आहे. सूत्रांनी दिलेल्या माहितीनुसार, बैठक सकारात्मक होती आणि पूर्ण राज्याचा दर्जा, सुरक्षा आणि कायदा आणि सुव्यवस्थेच्या मुद्द्यांवर चर्चा झाली. औद्योगिक धोरणातील बदल आणि पर्यटनाला चालना देण्यासाठी नवीन धोरणांवरही चर्चा झाली.
10 Feb 2025 05:50 PM (IST)
आम आदमी पक्षाचे ज्येष्ठ नेते आणि दिल्लीचे माजी मंत्री सत्येंद्र जैन पक्षाचे राष्ट्रीय संयोजक आणि माजी मुख्यमंत्री अरविंद केजरीवाल यांच्या निवासस्थानी पोहोचले. या बैठकीबाबत राजकीय वर्तुळात चर्चांना वेग आला आहे. जैन यांच्या आगमनाचे राजकीय अर्थ काढले जात आहेत, विशेषतः दिल्लीतील सध्याच्या राजकीय परिस्थितीचा विचार करता.
10 Feb 2025 05:25 PM (IST)
राज्यातील गोड्या पाण्याची मासळीचे उत्पादन वाढवणे आणि मच्छिमारांचा आर्थिकस्तर उंचावणे महत्वाचे आहे. त्यासाठी राज्यातील मासेमारी तलावांचे ‘डीजिटलायझेशन’ महत्वाचे आहे. ही प्रक्रिया तातडीने सुरू करावी असे आदेश मत्स्यव्यवसाय मंत्री नितेश राणे यांनी दिले.
10 Feb 2025 05:01 PM (IST)
उत्तराखंडचे माजी मुख्यमंत्री रमेश पोखरियाल निशंक यांची मुलगी आरुषी निशंक हिच्याकडून चित्रपटात भूमिका आणि गुंतवणूक मिळवून देण्याच्या नावाखाली ४ कोटी रुपयांच्या फसवणुकीचा प्रकार समोर आला आहे. मुंबई मिनी फिल्म्स प्रायव्हेट लिमिटेडचे संचालक मानसी वरुण बागला आणि वरुण प्रमोद कुमार बागला यांनी 'आँखों की गुस्ताखियां' चित्रपटात भूमिका देण्याचे आश्वासन देऊन आरुषीकडून हे पैसे घेतल्याचा आरोप आहे. आरुषीच्या तक्रारीवरून, पोलिसांनी देहरादून कोतवाली येथे एफआयआर नोंदवला आहे आणि तपास सुरू केला आहे. पोलिस लवकरच आरोपीला चौकशीसाठी डेहराडूनला बोलावू शकतात.
10 Feb 2025 04:13 PM (IST)
अमेरिकेचे माजी अध्यक्ष डोनाल्ड ट्रम्प यांनी अमेरिकन एजन्सी फॉर इंटरनॅशनल डेव्हलपमेंट (USAID) वर निर्बंध लावल्यानंतर संपूर्ण जगात खळबळ उडाली आहे. डोनाल्ड ट्रम्प यांनी, हंगेरियन-अमेरिकन अब्जाधीश जॉर्ज सोरोस यांच्या संस्थांना USAID मार्फत 260 दशलक्ष डॉलर (26 कोटी डॉलर) मिळाले. या निधीचा उपयोग भारत आणि बांगलादेशासह अनेक देशांमध्ये अस्थिरता निर्माण करण्यासाठी आणि राजकीय घडामोडींवर प्रभाव टाकण्यासाठी करण्यात आला, असा दावा केला आहे. पण ट्रम्प यांच्या या दाव्यामुळे भारतातही एकच खळबळ उडाली आहे. आता हा मुद्दा भारताच्या संसदेच्या चर्चेत आला आहे.
10 Feb 2025 04:12 PM (IST)
राज्य परिवहन महामंडळ हे जनतेशी संबधित असल्याने अध्यक्षपदी राजकीय व्यक्तीच असावी. यात दुमत नाही. पण परिवहन खात्याचा मंत्री मीच आहे, त्यामुळे माझा निर्णय हाच अंतिम असेल, हे परिवहनमंत्री प्रताप सरनाईक यांचे वक्तव्य हे अधिकाऱ्यांवर दबाव टाकण्यासाठी असून गैरलागू असल्याची टीका महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी केली आहे.
10 Feb 2025 03:28 PM (IST)
शिवसेना उद्धव ठाकरे पक्षाचे आमदार मिलिंद नार्वेकर हे मुख्यमंत्री देेवेंद्र फडणवीस यांच्या भेटीसाठी सागर बंगल्यावर दाखल झाले आहेत. त्यांच्यासोबत माजी मंत्री सुभाष देसाईही आहेत. आज सकाळीच फडणवीस यांनी मनसे अध्यक्ष राज ठाकरे यांची भेट घेतली आहे. त्यानंतर काही तासांत उद्धव ठाकरेंचे विश्वासू नार्वेकर फडणवीसांची भेट घेत असल्याने पुन्हा चर्चांना उधाण आले आहे.
10 Feb 2025 03:27 PM (IST)
बारामुल्लाचे खासदार रशीद इंजिनिअर यांना संसदेच्या अधिवेशनात उपस्थित राहण्यासाठी दिल्ली उच्च न्यायालयाने दोन दिवसांचा कोठडी पॅरोल मंजूर केला आहे. रशीद इंजिनिअरला ११ आणि १३ फेब्रुवारीसाठी कस्टडी पॅरोल मिळाला आहे. उच्च न्यायालयाने एक अट घातली आहे की त्याला कोठडीच्या पॅरोल दरम्यान माध्यमांशी बोलण्यास मनाई असेल. मोबाईल फोन आणि इंटरनेट वापरणार नाही.
10 Feb 2025 02:07 PM (IST)
इंडिया अलायन्सच्या एकतेबद्दल महाराष्ट्र काँग्रेस अध्यक्ष नाना पटोले म्हणाले, “इंडिया अलायन्स कायमस्वरूपी आहे असे स्टॅम्पवर लिहिलेले नाही. ही युती त्यांच्या विचारसरणीनुसार काम करते. एखाद्याच्या विचारसरणीला दोष देणे चुकीचे आहे."
10 Feb 2025 01:30 PM (IST)
भाजप खासदार निशिकांत दुबे यांनी दावा केला आहे की, अमेरिकन संघटना यूएसएआयडीने भारताचे विभाजन करण्यासाठी विविध संघटनांना पैसे दिले आहेत. सोमवारी त्यांनी सरकारकडे मागणी केली की या प्रकरणाची चौकशी करावी आणि दोषी आढळणाऱ्यांना तुरुंगात पाठवावे. शून्य प्रहरात हा मुद्दा उपस्थित करताना भाजप खासदार म्हणाले की, अमेरिकेचे नवे अध्यक्ष डोनाल्ड ट्रम्प यांनी यूएसएआयडी संघटना पूर्णपणे बंद केली आहे कारण ती संघटना वर्षानुवर्षे विविध सरकारे पाडण्यासाठी पैसे खर्च करत होती.
दुबे म्हणाले की, विरोधकांनी सांगावे की, 'यूएसएआयडीने भारताचे विभाजन करण्यासाठी जॉर्ज सोरोसच्या ओपन सोसायटी फाउंडेशनला ५००० कोटी रुपये दिले की नाही.' त्यांनी राजीव गांधी फाउंडेशनला पैसे दिले की नाही. दुबे यांनी प्रश्न उपस्थित केला की यूएसएआयडीने तालिबानला पैसे दिले होते का? ते म्हणाले की, विरोधकांनी हे सांगावे की या अमेरिकन संघटनेने दहशतवादी आणि नक्षलवादी कारवायांना प्रोत्साहन देणाऱ्या काही संघटनांना पैसे दिले की नाही.
10 Feb 2025 01:14 PM (IST)
दिल्लीतील भाजपच्या मुख्यमंत्रिपदाच्या चेहऱ्याबद्दल विचारले असता, भाजप नेते विजेंदर गुप्ता म्हणाले, "याबाबत पक्षाचे उच्च कमांड निर्णय घेईल. पक्षाच्या दृष्टीने, सर्व ४८ आमदार समान आहेत आणि त्यापैकी कोणीही मुख्यमंत्री होऊ शकतो.
10 Feb 2025 01:00 PM (IST)
दिल्लीच्या माजी मुख्यमंत्री आतिशी मार्लेना यांनी काल (9 फेब्रुवारी) मुख्यमंत्रीपदाचा राजीनामा दिला. या राजीनामा देण्यासाठी त्या उपराज्यपाल व्ही. के. सक्सेना यांच्या राजभवनात पोहचल्या. त्यावेळी राज्यपालांना तुम्हाला यमुना मैय्याचा श्राप लागला, असा टोला लगावला.
10 Feb 2025 12:42 PM (IST)
मुंबई मेट्रोच्या विस्तार योजनेंतर्गत, 2025 च्या अखेरीस काही नवीन मेट्रो मार्गांचे पहिले टप्पे कार्यान्वित होण्याची अपेक्षा आहे. मुंबई महानगर प्रदेश विकास प्राधिकरण (MMRDA) सध्या सहा मेट्रो मार्गांवर काम करत आहे, ज्यापैकी 'मेट्रो 2B', 'मेट्रो 4', आणि 'मेट्रो 9' या मार्गांचे पहिले टप्पे डिसेंबर 2025 पर्यंत पूर्ण होण्याची शक्यता आहे.
10 Feb 2025 11:59 AM (IST)
रेल्वे मंत्री अश्विनी वैष्णव म्हणाले, “प्रयागराज महाकुंभाच्या निमित्ताने रेल्वेचे काम ८ स्थानकांवर अतिशय पद्धतशीरपणे सुरू आहे. राज्य प्रशासन आणि न्याय प्रशासन यांच्याशी समन्वय सुरू आहे. काल प्रयागराज जंक्शनवरून ३३० गाड्या निघाल्या... कुठेही कोणतीही अडचण नाही. जर कोणी अफवा पसरवण्याचा प्रयत्न करत असेल तर त्याकडे लक्ष देऊ नका.
10 Feb 2025 11:49 AM (IST)
भारताचे पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांच्यात बैठक होणार आहे. याआधी, अमेरिकेसोबत संभाव्य व्यापार युद्ध टाळण्यासाठी भारत काही अमेरिकन वस्तूंवरील शुल्क कमी करण्याची योजना आखत आहे. १२-१३ फेब्रुवारी रोजी होणाऱ्या या दोन दिवसांच्या भेटीदरम्यान दोन्ही नेते व्यापार, संरक्षण सहकार्य आणि तांत्रिक मुद्द्यांवर चर्चा करतील. अमेरिकेच्या निर्यातीला प्रोत्साहन देण्यासाठी भारत इलेक्ट्रॉनिक्स, सर्जिकल, वैद्यकीय उपकरणे आणि रासायनिक उत्पादने यासारख्या अनेक क्षेत्रांमध्ये शुल्क सवलत देण्याची तयारी करत असल्याचे अहवालात म्हटले आहे.
10 Feb 2025 11:28 AM (IST)
सध्या सुरू असलेल्या महाकुंभमेळ्यादरम्यान राष्ट्रपती द्रौपदी मुर्मू यांनी त्रिवेणी संगमात स्नान केले.
#WATCH | Prayagraj, UP: President Droupadi Murmu takes a holy dip at Triveni Sangam during the ongoing Maha Kumbh Mela. pic.twitter.com/2PQ4EYn08b
— ANI (@ANI) February 10, 2025
10 Feb 2025 11:21 AM (IST)
पंतप्रधानांनी मुलांना बाजरीची माहिती देऊन त्यांच्याशी परीक्षेबद्दल चर्चा करण्यास सुरुवात केली. त्यांनी सांगितले की, २०२३ मध्ये संयुक्त राष्ट्रांनी बाजरीला प्रोत्साहन दिले. हा भारत सरकारचा प्रस्ताव होता. भारतात याला सुपर फूड म्हणतात.
10 Feb 2025 10:55 AM (IST)
शिवतीर्थावर मुख्यमंत्री देवेंद्र फडणवीस आणि मनसे प्रमुख राज ठाकरे यांची नुकतीच भेटीसाठी पोहचले आहेत. ही भेट फडणवीस मुख्यमंत्री झाल्यानंतर पहिल्यांदाच झाली असल्याने याला विशेष महत्त्व प्राप्त झाले आहे.या बैठकीनंतर मनसे नेते अमित ठाकरे यांना राज्यपाल नियुक्त आमदार करण्याची शक्यता वर्तवली जात आहे. राज्यपाल नियुक्त आमदारपद ही राज्य सरकारच्या शिफारसीवर दिली जाणारी एक नामनिर्देशित जागा असते. जर अमित ठाकरे यांना हे पद मिळाले, तर मनसे आणि भाजप यांच्यातील राजकीय जवळीक आणखी वाढण्याची शक्यता आहे.
10 Feb 2025 10:01 AM (IST)
प्रयागराजकडे जाणारे रस्ते पूर्णपणे जाम झाल्याने लाखो भाविकांना मोठ्या अडचणींचा सामना करावा लागला. वाहतूक ठप्प झाल्याने तब्बल २५ किलोमीटरपर्यंत वाहनांच्या लांबच लांब रांगा लागल्या. वाराणसी, लखनऊ, कानपूर आणि रीवा येथून प्रयागराजच्या दिशेने जाणाऱ्या रस्त्यांवर केवळ वाहनेच वाहने दिसत होती. भाविकांची गर्दी प्रचंड वाढण्याची शक्यता असल्याने प्रयागराज जंक्शनवर आपत्कालीन गर्दी व्यवस्थापन लागू करावे लागले. परिस्थिती हाताळण्यासाठी प्रशासनाला प्रयागराजमधील संगम स्टेशन्स बंद करावी लागली
10 Feb 2025 09:18 AM (IST)
सोलापूर जिल्ह्यातील मोहोळ तालुक्यात सोमवारी पहाटे मोठा अपघात झाला. देवदर्शनासाठी निघालेल्या भाविकांची बस सोलापूर-पुणे महामार्गावर कोळेवाडी येथे दुर्घटनाग्रस्त झाली. या अपघातात तिघांचा जागीच मृत्यू झाला असून, तब्बल १५ जण जखमी झाले आहेत. जखमींवर सध्या स्थानिक रुग्णालयात उपचार सुरू आहेत.
10 Feb 2025 09:07 AM (IST)
राज्यातील आपत्ती व्यवस्थापन प्राधिकरणाच्या पुनर्रचनेत मोठा बदल करण्यात आल्याची माहिती समोर आली आहे. मिळालेल्या माहितीनुसार मुख्यमंत्री देवेंद्र फडणवीस यांच्या अध्यक्षतेखालील या समितीत उपमुख्यमंत्री तथा वित्त मंत्री अजित पवार यांना सदस्य म्हणून स्थान देण्यात आले आहे. पण धक्कादायक बाब म्हणजे या नव्या रचनेत उपमुख्यमंत्री एकनाथ शिंदे यांना वगळण्यात आले आहे.
