शुक्रवार, 23 ऑक्टोबर 2026
संग्रहित फोटो
मोशी कचरा डेपोतील दुर्घटनेनंतर शहरात दररोज जमा होणाऱ्या सुमारे १५०० टन कचऱ्यावर प्रक्रिया करण्यासाठी पालिकेने पर्यायी जागांचा शोध सुरू केला होता. या पार्श्वभूमीवर रावेत येथील जलशुद्धीकरण केंद्रालगत असलेल्या २५ एकर एमआयडीसीच्या जागेत २७ मेगावॉट क्षमतेचा ‘वेस्ट टू एनर्जी’ प्रकल्प उभारण्याची हालचाल प्रशासनाकडून सुरू करण्यात आली. मात्र, हा प्रकल्प रहिवासी भाग, जलशुद्धीकरण केंद्र आणि पर्यावरणाचा महत्त्वाचा भाग असलेल्या दुर्गा टेकडीच्या अगदी जवळ असल्याने नागरिकांमध्ये भीती आणि तीव्र नाराजीचे वातावरण निर्माण झाले आहे.
आरोग्य आणि पर्यावरणाला धोका
नागरिकांच्या मते, निगडी प्राधिकरण आणि रावेत हा संपूर्ण परिसर शांत व विकसित निवासी भाग म्हणून ओळखला जातो. अशा वस्तीजवळ कचरा प्रकल्प आल्यास दुर्गंधी, वायुप्रदूषण आणि गंभीर आजारांचा धोका निर्माण होऊन नागरिकांचे आरोग्य धोक्यात येईल. लाखो नागरिकांना पाणीपुरवठा करणाऱ्या जलशुद्धीकरण केंद्राजवळ असा प्रकल्प उभारणे अत्यंत धोकादायक असल्याचे मत पर्यावरणप्रेमींनी व्यक्त केले आहे.
पुनावळेपाठोपाठ आता रावेतमध्येही संतापाची लाट
यापूर्वी पुनावळे येथील नियोजित कचरा डेपोच्या आरक्षणाला स्थानिक रहिवाशांनी तीव्र जनआंदोलन करून हाणून पाडले होते. त्यानंतर प्रशासनाने रावेतचा पर्याय समोर आणला. मात्र, आता रावेत, निगडी आणि प्राधिकरणातील रहिवाशांनीही संघटित होत मोशी दुर्घटनेची पुनरावृत्ती आमच्या भागात होऊ देणार नाही, अशी ठाम भूमिका घेतली आहे.
२४ ऑक्टोबरला ज्ञानप्रबोधिनी शाळेत जाहीर बैठक
या प्रस्तावित प्रकल्पाविरोधात पुढील दिशा ठरवण्यासाठी ‘कचरा डेपो विरोधी कृती समिती, निगडी प्राधिकरण’ यांच्या वतीने शनिवार, २४ ऑक्टोबर रोजी सायंकाळी ५:३० वाजता निगडी येथील ज्ञानप्रबोधिनी शाळा (मनोहर गेटमधून प्रवेश) येथे नागरिकांची विशेष बैठक आयोजित करण्यात आली आहे. लोकशाही मार्गाने लढा उभारून हा प्रकल्प रद्द होईपर्यंत आंदोलन तीव्र करण्याचा निर्धार समिती आणि स्थानिक रहिवाशांनी व्यक्त केला आहे.
हे सुद्धा वाचा : आकुर्डीत जुन्या वादाचा थरार! दोन तरुणांना बेदम मारहाण; नेमकं काय घडलं?
Ans: रावेत येथील जलशुद्धीकरण केंद्रालगतच्या २५ एकर एमआयडीसीच्या जागेवर हा प्रकल्प प्रस्तावित आहे.
Ans: दुर्गंधी, वायुप्रदूषण आणि आरोग्याला धोका निर्माण होण्याची भीती नागरिकांनी व्यक्त केली आहे.
Ans: शनिवार, २४ ऑक्टोबर रोजी सायंकाळी ५:३० वाजता निगडीतील ज्ञानप्रबोधिनी शाळेत बैठक होणार आहे.
