कराडमध्ये एका कारने सात वाहनांना उडवले (Photo : Accident)
कराड : शहरानजीकच्या विद्यानगर, कृष्णा कॅनॉल बाजूकडून शहरात जाणाऱ्या इको कारने सुमारे 300 मीटर अंतरात सात वाहनांना उडविल्याची थरारक घटना घडली. यामध्ये इको कारसह चार दुचाकी, दोन रिक्षा व एका कारचे मोठे नुकसान झाले. तसेच अपघातात सहाजण जखमी झाले असून, त्यांच्यावर उपजिल्हा रूग्णालय व खाजगी रूग्णालयात उपचार सुरू आहेत.
पोलिसांनी अपघातप्रकरणी इको चालक संजय सर्जेराव पवार (वय ६३, रा. शिवाजी हौसिंग सोसायटी, कराड) यांना ताब्यात घेतले असून, रात्री उशिरापर्यंत गुन्हा दाखल करण्याचे काम सुरू होते. याबाबत घटनास्थळ व पोलिसांनी मिळालेली माहिती अशी की, शुक्रवारी दुपारी चार वाजण्याच्या सुमारास संजय पवार व त्यांच्या पत्नी सुषमा पवार त्यांच्या ईको कारने कृष्णा कॅनॉल बाजूकडून कराड शहरात येत होते. कॅनॉलच्या पुढच्या बाजूला ईको कारने प्रथम रिक्षाला धडक दिली. यानंतर एका दुचाकीला धडक दिली.
कृष्णा पुलावरून शहरात आल्यावर इको कारने बालाजी हॉस्पिटलजवळ एका कारला जोराची धडक दिली. या कारजवळ पार्क केलेल्या एका दुचाकीलाही धडक देऊन इको कारने बालाजी हॉस्पिटलसमोर उभा असलेल्या रिक्षा व दोन दुचाकींनाही धडक दिली. यामध्ये दुचाकीवर रिक्षा पलटी झाली. तसेच या रिक्षावर इको कारही पलटी झाली. कारच्या धडकेने बालाजी हॉस्पिटलजवळ असलेले एक झाड उन्मळून पडले आहे. यावेळी उपस्थित असलेल्या नागरिकांनी पलटी झालेली कार सरळ करून त्यातील महिला व नागरिकाला बाहेर काढून बालाजी हॉस्पिटलमध्ये उपचारासाठी दाखल केले.
दरम्यान, कृष्णा कॅनॉलपासून रस्त्यात दिसेल त्या वाहनाला धडक देत कराड शहरात आलेल्या इको कारमुळे नागरिकांमध्ये दहशतीचे वातावरण निर्माण झाले होते. बालाजी हॉस्पिटलसमोरील परिसरात इको कारसह तीन अपघातग्रस्त दुचाकी पडल्या होत्या. वाहनांचे मोठ्या प्रमाणात नुकसान झाल्याने बघ्यांची मोठी गर्दी झाली होती. त्यामुळे काहीकाळ वाहतूक विस्कळीत झाली होती.
अपघात विभागाचे पोलीस घटनस्थळी दाखल झाल्यानंतर त्यांनी प्रथम बघ्यांची गर्दी हटवून वाहतूक सुरळीत केली. तसेच सर्व अपघातग्रस्त वाहने कराड शहर पोलीस ठाण्यात आणण्यात आली. या अपघातात संजय पवार, सुषमा पवार यांच्यासह रफिक मुजावर (वय ३४, रा. चौंडेश्वरीनगर), विशाल उथळे (वय २२), कल्याण बेडके (वय ३४, रा. सैदापूर), समीर चौधरी (वय २६, रा. सातारा), शिवानी भोसले (रा. खोडशी) आदी जखमी झाले आहेत. त्यांच्यावर उपजिल्हा रूग्णालय व खाजगी रूग्णालयात उपचार करण्यात आले.
