सोमवार, 2 नोव्हेंबर 2026
(Photo - X)
Manoj Jarange Patil : नांदेडमध्ये खासगी फायनान्स कंपनीच्या कार्यालयात शेतकऱ्याचा मृतदेह आढळल्याच्या घटनेने राज्यात खळबळ उडाली आहे. या घटनेवर मराठा आंदोलक मनोज जरांगे पाटील यांनी तीव्र प्रतिक्रिया दिली आहे. संबंधित शेतकरी कुटुंबाची आपण भेट घेणार असून हा विषय सरकार दरबारी लावून धरणार असल्याचं त्यांनी स्पष्ट केलं. यावेळी शेतकऱ्यांना आत्महत्या न करण्याचं भावनिक आवाहनही त्यांनी केलं.
शेतकऱ्यांच्या अडचणींवर बोलताना जरांगे पाटील भावुक झाले. संकटं आपल्या पाठीशी लागली आहेत, मात्र दुष्काळाचं संकटही निघून जाईल. त्यामुळे शेतकऱ्यांनी टोकाचं पाऊल उचलू नये, असं ते म्हणाले.
‘आत्महत्या करू नका, तुमच्या पाया पडतो. लेकराबाळांचं लय हाल होतात,’ अशा शब्दांत त्यांनी शेतकऱ्यांना हात जोडून विनंती केली.
क्रांतिकारी शेतकरी संघटनेने फायनान्स कंपनीचं कार्यालय फोडल्याच्या घटनेवरही जरांगे यांनी प्रतिक्रिया दिली. शेतकरी कुटुंबाच्या पाठीशी ताकदीने उभं राहणार असल्याचं सांगत त्यांनी फायनान्स कंपन्यांच्या वसुलीच्या पद्धतीवर आक्षेप घेतला.
फायनान्सवाल्यांना पैसे द्यायचे नाहीत, महाराष्ट्रात कोणीही पैसे भरायचे नाहीत, असं आवाहनही त्यांनी केलं. त्यांच्या या विधानामुळे कर्जवसुलीचा मुद्दा पुन्हा चर्चेत आला आहे.
यावेळी जरांगे पाटील यांनी राज्य सरकारवरही गंभीर आरोप केले. मराठा समाजातील काही लोकांना आपल्याविरोधात बोलण्यासाठी पुढे केलं जात असल्याचं त्यांनी म्हटलं. एकनाथ शिंदे आणि देवेंद्र फडणवीस यांच्या समर्थकांकडून आपल्याविरोधात वातावरण तयार केलं जात असल्याचंही ते म्हणाले. मात्र, आपण अशा टीकेला उत्तर देत बसणार नसल्याचं त्यांनी स्पष्ट केलं.
आगामी राजकारणाबाबत बोलताना जरांगे पाटील यांनी २०२९ च्या निवडणुकीचा उल्लेख केला. योग्य वेळी मतदानाबाबत भूमिका जाहीर करू, असं सांगत सत्तेत मराठा समाजाचे चार ते पाच मंत्री असायलाच हवेत, अशी अपेक्षा त्यांनी व्यक्त केली.
इतर समाजांना अडचणीच्या वेळी त्यांच्या समाजातील मंत्र्यांचा आधार मिळतो. मात्र मराठा समाजाला तसा आधार मिळत नसल्याची खंतही त्यांनी व्यक्त केली.
एकीकडे शेतकऱ्यांच्या प्रश्नांवर आक्रमक भूमिका आणि दुसरीकडे २०२९ च्या राजकारणाचे संकेत, यामुळे जरांगे पाटील यांच्या विधानांची सध्या चर्चा सुरू झाली आहे.
Ans: शेतकऱ्यांनी कोणत्याही परिस्थितीत आत्महत्या करू नये. दुष्काळ आणि आर्थिक संकट दूर होऊ शकतं, त्यामुळे कुटुंबाचा विचार करून टोकाचं पाऊल उचलू नका, असं भावनिक आवाहन त्यांनी केलं.
Ans: संबंधित शेतकरी कुटुंबाची भेट घेणार असून हा विषय सरकार दरबारी लावून धरणार असल्याचं त्यांनी सांगितलं.
Ans: २०२९ मध्ये योग्य वेळी मतदानाबाबत भूमिका जाहीर करू, असं त्यांनी सांगितलं. तसेच सत्तेत मराठा समाजाचे चार ते पाच मंत्री असायला हवेत, अशी अपेक्षा व्यक्त केली.
