धाराशिव क्रिकेट संघाचा ऐतिहासिक विजय
छत्रपती संभाजीनगर येथे पार पडली क्रीडा स्पर्धा
धारशिव क्रिकेट संघाने जिंकले प्रथमच विजेतेपद
धाराशिव जिल्ह्याला स्पर्धेचे यजमानपद बहाल
धाराशिव: छत्रपती संभाजीनगर येथे पार पडलेल्या महसूल क्रीडा स्पर्धेत धाराशिव जिल्ह्याच्या क्रिकेट (Cricket) संघाने प्रथमच विजेतेपद पटकावत ऐतिहासिक कामगिरी नोंदवली. जिल्हाधिकारी कीर्ती किरण पुजार यांच्या नेतृत्वाखाली आणि संघाच्या उत्कृष्ट सांघिक खेळाच्या जोरावर हा अभूतपूर्व विजय साकार झाला. विशेष म्हणजे या यशासोबतच पुढील वर्षाच्या स्पर्धेचे यजमानपदही धाराशिव जिल्ह्याला बहाल करण्यात आले.
अंतिम सामन्यात नांदेड संघाने नाणेफेक जिंकून प्रथम गोलंदाजीचा निर्णय घेतला. धाराशिव संघाने दमदार फलंदाजी करत १२ षटकांत १४५ धावांचा भक्कम डोंगर उभा केला. या धावसंख्येचा पाठलाग करताना नांदेड संघ १३४ धावांवर बाद झाला.सामन्याच्या निर्णायक टप्प्यात जिल्हाधिकारी पुजार यांनी गोलंदाजीत महत्त्वपूर्ण भूमिका बजावत २ षटकांत केवळ १३ धावा देत प्रतिस्पर्धी संघाचा प्रमुख फलंदाज बाद केला आणि सामना धाराशिवच्या बाजूने झुकवला.
शरद मोटे आणि अनिकेत राऊत यांनी प्रभावी साथ दिली. या थरारक सामन्यात धाराशिव संघाने संयम व आक्रमक खेळाचे उत्तम मिश्रण दाखवत विजेतेपद पटकावले. संघात कीर्ती किरण पुजार (कर्णधार), हेमंत ढोकले (उपकर्णधार), प्रसाद साळुंके, शरद मोटे, शुभम काळे, विनोद चुकेवाड, ओंकार पवार, रणधीर भोसले, आकाश वानखेडे, रणदीप सूर्यवंशी, अनिकेत राऊत, शिवराज खुर्दे, किरण पाटील, शिवराज शिंदे, सुरज घोसले यांचा समावेश होता.
यजमानपदाचा ध्वज स्विकारला
स्पर्धेच्या समारोप सोहळ्यात पुढील वर्षाच्या यजमानपदाचा मान धाराशिव जिल्ह्याला देण्यात आला. यावेळी जिल्हाधिकारी कीर्ती किरण पुजार यांच्या हस्ते यजमानपदाचा ध्वज औपचारिकरित्या स्वीकारण्यात आला. विजेतेपदासोबतच यजमानपदाचा मान मिळाल्याने धाराशिवच्या शिरपेचात आणखी एक मानाचा तुरा खोवला गेला. उपस्थित मान्यवर, अधिकारी आणि खेळाडूंच्या टाळ्यांच्या गजरात हा सोहळा उत्साहात पार पडला.
यावेळी पुढील वर्षी अधिक भव्य, सुयोजित आणि दर्जेदार स्पर्धा आयोजित करण्याचा निर्धार व्यक्त करण्यात आला.
इतर स्पर्धांमध्येही धाराशिवची चमकदार कामगिरी
क्रिकेटसह विविध वैयक्तिक, सांघिक आणि सांस्कृतिक स्पर्धांमध्येही धाराशिव जिल्ह्याने उल्लेखनीय यश संपादन केले. सांस्कृतिक कार्यक्रमात उत्कृष्ट निवेदक म्हणून मृणाल जाधव (तहसीलदार) आणि संतोष पाटील (नायब तहसीलदार) यांनी प्रथम क्रमांक पटकावला. समूह नृत्य प्रकारात प्रियांका लोखंडे, विशाखा बलकवडे, समाधान जावळे, बालाजी लाकाळ, अनिता पाटील, विष्णू थोरात, प्रकाश चंदनशिवे, महेश क्षीरसागर, रोहन शिंगाडे, शीतल आमझरे, नंदिनी, दीपा मुळूक यांच्या पथकाने विभागीय स्तरावर द्वितीय क्रमांक मिळवला. वैयक्तिक नृत्यात तेजश्री जगदाळे हिने द्वितीय स्थान मिळवले.
क्रीडा स्पर्धांतील वैयक्तिक यश
अफसर शेख २०० मीटरमध्ये द्वितीय, मोनिका मसुडगे भालाफेकमध्ये प्रथम, वैष्णवी मसे १०० मीटर व २०० मीटरमध्ये द्वितीय, विष्णू थोरात ३ किमी चालणेमध्ये प्रथम प्रभावती उंबरे टेबल टेनिसमध्ये प्रथम, रिंग टेनिसमध्ये द्वितीय यांनी अशी कामगिरी बजावली आहे. या सर्व यशामागे जिल्हाधिकारी पुजार, अपर जिल्हाधिकारी ज्योती पाटील, उपजिल्हाधिकारी शिरीष यादव, दत्तू शेवाळे, गणेश शिंदे, प्रवीण धरमकार, संतोष राऊत, स्वाती शेंडे, अरुणा गायकवाड तसेच निवासी उपजिल्हाधिकारी विद्याचरण कडवकर यांचे मार्गदर्शन लाभले. धाराशिव जिल्ह्याने सर्वच क्षेत्रात भरीव कामगिरी करत इतिहासात प्रथमच या दुहेरी कामगिरीसह विजेतेपद आणि यजमानपद प्राप्त केले असून, हा क्षण जिल्ह्यासाठी अभिमानाचा ठरला असल्याचे सांगितले जात आहे.
