ChinaNews : चीनने नागरिकांना दिला Japanला प्रवास न करण्याचा सल्ला; जपानी पंतप्रधानांच्या वक्तव्याने वादंग ( फोटो सौजन्य : सोशल मीडिया)
तैवानबाबत जपानी पंतप्रधानांनी केलेल्या वक्तव्यावर चीनची तीव्र नाराजी, दोन्ही देशांनी एकमेकांच्या राजदूतांना बोलावले.
चीनने आपल्या नागरिकांना जपानला प्रवास न करण्याचा इशारा, सुरक्षा धोक्यांचा उल्लेख.
तैवान प्रश्नावरून चीन-जपान संबंध पुन्हा ताणले, धोरणात्मक अस्पष्टतेपासून उघड वक्तव्यांकडे जपानचा कल.
China travel advisory Japan : चीन (China) आणि जपानमधील(Japan) संबंध पुन्हा एकदा गंभीर टप्प्यावर पोहोचले आहेत. तैवानवरील संभाव्य संघर्षाबाबत जपानचे नवे पंतप्रधान साने ताकाची यांनी केलेल्या थेट वक्तव्यामुळे बीजिंग संतप्त झाले आहे. याच पार्श्वभूमीवर चीनने आपल्या नागरिकांना जपानला प्रवास टाळण्याचा कठोर इशारा दिला असून, या प्रकरणाने आशिया-प्रशांत क्षेत्रातील भू-राजकीय चिंता अधिकच वाढवल्या आहेत.
७ नोव्हेंबर रोजी जपानी संसदेत बोलताना पंतप्रधान ताकाची यांनी स्पष्ट केले की, चीनने तैवानवर बळाचा वापर केल्यास जपान “लष्करी प्रत्युत्तर” देऊ शकते. जपानच्या सुरक्षेसाठी हा थेट धोका असल्यामुळे त्यांना कारवाई करावी लागू शकते, असे त्यांनी स्पष्ट केले. तैवानला स्वतःचा प्रदेश मानणारा चीन हे विधान उघड चिथावणीखोर असल्याचे म्हणत प्रचंड नाराज झाला. काही तासांतच दोन्ही देशांनी एकमेकांच्या राजदूतांना बोलावून कडक निषेध नोंदवला.
जागतिक घडामोडी संबंधित बातम्या वाचण्यासाठी येथे क्लिक करा : Nuclear Tests : डोनाल्ड ट्रम्प यांनीच केली पाकिस्तानची पोलखोल; पाकच्या अनु चाचण्यांवर केले ‘असे’ खळबळ उडवणारे वक्तव्य
शुक्रवारी रात्री जपानमधील चिनी दूतावासाने WeChat वर एक इशारा पोस्ट केला. त्यात म्हटले होते,
“जपानी नेत्यांनी तैवानबद्दल उघड उत्तेजक भाष्य केले आहे, ज्यामुळे चीन-जपान लोकसंपर्कावर परिणाम होतो आणि जपानमधील चिनी नागरिकांच्या सुरक्षिततेला गंभीर धोका निर्माण होतो.”
त्यामुळे चीनने आपल्या नागरिकांना जपानला प्रवास करणे टाळण्याचा जोरदार सल्ला दिला. ही पोस्ट काही वेळातच व्हायरल झाली. मात्र काही तासांत ती हटवण्यात आली. पण चीनने दिलेला संदेश स्पष्ट होता, तैवानबाबत जपानच्या भूमिकेमुळे संबंध धोक्यात आले आहेत.
जपानचे माजी पंतप्रधान बहुतेक वेळा तैवानबाबत थेट टिप्पणी करण्याचे टाळत. परंतु ताकाची यांचा दृष्टिकोन वेगळा आहे.
चीनविरोधी विचारसरणी आणि सुरक्षा प्रश्नांवरील कठोर भूमिका यासाठी ते ओळखले जातात.
ते म्हणाले :
“तैवानमध्ये आणीबाणी निर्माण झाली तर तो जपानच्या अस्तित्वासाठी धोका ठरू शकतो.”
२०१५ मध्ये जपानमध्ये पारित झालेल्या सुरक्षा कायद्यानुसार जपानला सामूहिक स्वसंरक्षणाचा अधिकार आहे. ताकाची यांनी त्याच अधिकाराचा दाखला दिला.
ताकाची यांच्या विधानानंतर ओसाका येथील चिनी कॉन्सुल जनरल झ्यू जियान यांनी सोशल मीडियावर एक विवादित पोस्ट केली, जी थेट जपानी पंतप्रधानांवर टीका करणारी होती. जपानने या पोस्टचा निषेध केला आणि काही तासांत पोस्ट हटवण्यात आली. या घटनेने वातावरण अधिकच तंग झाले.
जागतिक घडामोडी संबंधित बातम्या वाचण्यासाठी येथे क्लिक करा : Ukraine-Russia War : महायुद्धात युक्रेनचा दणदणीत प्रहार; स्वदेशी ‘फ्लेमिंगो’ क्षेपणास्त्राने घातला थेट रशियाच्या काळजाला घाला
तैवानचा प्रश्न हा आशिया-प्रशांत क्षेत्रातील सर्वात संवेदनशील मुद्दा आहे.
• चीन तैवानला स्वतःचा भाग मानतो.
• जपानचा भौगोलिक आणि सुरक्षा दृष्टिकोनातून तैवानशी जवळचा संबंध आहे.
• अमेरिका तैवानला समर्थन देते, मात्र “धोरणात्मक अस्पष्टता” टिकवून ठेवते.
अशा परिस्थितीत ताकाची यांच्या स्पष्ट वक्तव्यामुळे चीनला मोठा धक्का बसला आहे.
दोन्ही देशांमध्ये तणाव वाढला असला तरी, चीन आणि जपान हे मोठे व्यापार भागीदार आहेत. त्यामुळे संघर्ष पूर्णपणे उफाळण्याची शक्यता कमी आहे. पण तैवान प्रश्नावर दोन्ही देशांच्या भूमिकांमध्ये आता स्पष्ट अंतर दिसू लागले आहे, जे भविष्यात मोठ्या भू-राजकीय संघर्षाचे कारण ठरू शकते.
