सोमवार, 24 ऑगस्ट 2026
शहबाज शरीफ यांच्या विरोधात गुन्हा दाखल झाला आहे, मग इम्रान खान यांनी मोहसिन नक्वी यांना का सोडले? ( फोटो सौजन्य : सोशल मीडिया )
पाकिस्तानच्या (Pakistan News) राजकारणात रोज नवीन घडामोडी घडत असतात, परंतु नुकत्याच घडलेल्या एका कायदेशीर आणि राजकीय घटनेने संपूर्ण देशाचे लक्ष वेधून घेतले आहे. अदियाला तुरुंगात बंदिस्त असलेले पाकिस्तानचे माजी पंतप्रधान आणि ‘पाकिस्तान तहरीक-ए-इंसाफ’ (PTI) पक्षाचे संस्थापक इम्रान खान यांनी देशाचे विद्यमान पंतप्रधान शाहबाज शरीफ, कायदा मंत्री आणि माहिती मंत्र्यांविरोधात सर्वोच्च न्यायालयात अवमान याचिका (Contempt Petition) दाखल केली आहे. इम्रान खान यांच्या वैद्यकीय उपचारांसंदर्भात आणि त्यांना शिपा रुग्णालयात हलवण्यासंदर्भात सर्वोच्च न्यायालयाने दिलेल्या स्पष्ट आदेशांचे पालन न केल्याचा आरोप या याचिकेत करण्यात आला आहे.
या संपूर्ण प्रकरणात सर्वात धक्कादायक बाब म्हणजे इम्रान खान यांचे सर्वात कट्टर विरोधक मानले जाणारे पाकिस्तानचे विद्यमान गृहमंत्री मोहसिन नक्वी यांचे नाव या याचिकेतून पूर्णपणे गायब आहे. इम्रान खान हे नेहमीच पंतप्रधान शाहबाज शरीफ, गृहमंत्री मोहसिन नक्वी आणि लष्करप्रमुख जनरल आसिम मुनीर यांच्यावर जाहीरपणे टीका करत आले आहेत. तरीही इतक्या महत्त्वाच्या कायदेशीर प्रकरणात नक्वी यांना आरोपीच्या पिंजऱ्यात न उभे करणे, ही एका मोठ्या राजकीय डावाची किंवा पडद्यामागच्या कराराची नांदी मानली जात आहे.
जिओ न्यूजच्या एका अहवालानुसार आणि पाकिस्तानच्या राजकीय विश्लेषकांच्या मते, इम्रान खान यांनी सुरुवातीला केवळ प्रशासकीय अधिकाऱ्यांवरच खटला भरण्याची शिफारस केली होती. परंतु शेवटच्या क्षणी या याचिकेत पंतप्रधान शाहबाज शरीफ, माहिती मंत्री आणि कायदा मंत्री यांची नावे जोडली गेली. जेव्हा इम्रान खान यांचे वकील सलमान अक्रम राजा यांना गृहमंत्री मोहसिन नक्वी यांच्या नावाच्या अभावाबद्दल विचारण्यात आले, तेव्हा त्यांनी सांगितले की न्यायालयाचा आदेश प्रत्यक्षात अंमलात आणण्याची जबाबदारी ज्या अधिकाऱ्यांची आणि मंत्र्यांची होती, त्यांचीच नावे कायदेशीर पुराव्यांच्या आधारे नमूद केली आहेत.
जागतिक घडामोडी संबंधित बातम्या वाचण्यासाठी येथे क्लिक करा : BRICS Summit 2026: रशियात ‘चाणक्य’ जयशंकर अन् चीनमध्ये अजित डोवाल; भारताच्या दोन दिग्गजांची जागतिक पटलावर मोठी खेळी
तथापि, कायदेतज्ज्ञ आणि राजकीय निरीक्षक या स्पष्टीकरणावर पूर्णपणे समाधानी नाहीत. कारण इम्रान खान यांना रातोरात शिपा आंतरराष्ट्रीय रुग्णालयातून (Shifa International Hospital) हलवून पुन्हा अदियाला तुरुंगात टाकण्याच्या पोलीस कारवाईत गृह मंत्रालयाची भूमिका अत्यंत महत्त्वाची मानली जात होती. तरीही नक्वी यांना या प्रकरणात बाजूला ठेवल्यामुळे पाकिस्तानच्या राजकीय वर्तुळात अनेक तर्कवितर्क लावले जात आहेत.
पाकिस्तानच्या राजकारणात दीर्घकाळापासून लष्कर आणि इम्रान खान यांच्यात एक गुप्त तडजोड किंवा करार (Deal) घडवून आणण्याच्या चर्चा सुरू आहेत. या संभाव्य करारात गृहमंत्री मोहसिन नक्वी हे अत्यंत महत्त्वाची भूमिका बजावत असल्याचे बोलले जाते. मोहसिन नक्वी हे लष्करप्रमुख आसिम मुनीर यांच्या अत्यंत जवळचे आणि विश्वासू मानले जातात. काही दिवसांपूर्वीच नक्वी यांनी पाकिस्तानी व्यवस्थेला भ्रष्ट म्हटले होते, ज्यामुळे ते आणि लष्कर एकाच भूमिकेवर असल्याचे दिसून आले होते.
ज्येष्ठ पाकिस्तानी पत्रकार आरिफ हमीद भट्टी यांच्या मते, इम्रान खान यांच्या प्रकृतीच्या खालावलेल्या स्थितीमुळे त्यांना तातडीने रुग्णालयात हलवण्याचे आदेश थेट अमेरिकेच्या हस्तक्षेपाने देण्यात आले होते. इम्रान खान यांची मुले कासिम आणि सुलेमान यांनी अमेरिकेतील व्हाईट हाऊसशी संपर्क साधला होता, ज्यानंतर व्हाईट हाऊसने पाकिस्तानचे लष्करप्रमुख मुनीर यांच्याशी संवाद साधल्याची माहिती समोर आली आहे. सुरुवातीला सर्व प्रक्रिया सुरळीत पार पडत होती आणि इम्रान यांना रुग्णालयात नेण्यात आले, परंतु ऐनवेळी त्यांना पुन्हा तुरुंगात धाडण्यात आले.
जागतिक घडामोडी संबंधित बातम्या वाचण्यासाठी येथे क्लिक करा : Viral Video: आंतरराष्ट्रीय सीमेवर देशाची मान खाली घालवणारी घटना; हुसैनीवालातील भारतीय तरुणाच्या ‘या’ व्हायरल व्हिडिओने लोक संतप्त
शाहबाज शरीफ यांना थेट लक्ष्य करताना मोहसिन नक्वी यांना सोडून देणे, हे लष्कराशी संबंध सुधारण्याचे इम्रान खान यांचे नवे राजकीय धोरण असू शकते. शाहबाज शरीफ सरकारवर दबाव वाढवणे आणि लष्कराच्या मध्यस्थीने स्वतःची तुरुंगातून सुटका करून घेणे, हाच यामागील मुख्य हेतू असण्याची दाट शक्यता वर्तवली जात आहे. येत्या दिवसांत सर्वोच्च न्यायालय या अवमान याचिकेवर काय निर्णय देते, यावर पाकिस्तानच्या राजकारणाची पुढची दिशा ठरणार आहे.
