फोटो सौजन्य - सोशल मिडिया
बँक ऑफ बडोदाने (Bank of Baroda) नुकतीच एक मोठी भरती जाहीर केली आहे. स्थानिक शाखा अधिकारी (Local Branch Officer – LBO) या पदासाठी तब्बल 2500 जागा उपलब्ध असून यासाठी परीक्षेची तारीखदेखील जाहीर करण्यात आली आहे. बँकिंग क्षेत्रात करिअर करू इच्छिणाऱ्या आणि पदवीधर असलेल्या तरुण-तरुणींसाठी ही सुवर्णसंधी आहे. या भरतीचा उद्देश बँकेच्या शाखांमध्ये स्थानिक स्तरावर ग्राहक सेवेची गुणवत्ता वाढवणे, लोकांपर्यंत बँकिंग सेवा अधिक परिणामकारकपणे पोहोचवणे आणि बँकेचे नेटवर्क मजबूत करणे हा आहे.
या भरतीसाठी अर्ज प्रक्रिया पूर्णपणे ऑनलाईन असून इच्छुक उमेदवारांनी बँक ऑफ बडोदाच्या अधिकृत करिअर पोर्टलला भेट द्यावी. 04 जुलै 2025 रोजी अधिकृत जाहिरात प्रसिद्ध झाली आणि त्याच दिवशी अर्ज प्रक्रिया सुरू झाली. अर्ज करण्याची अंतिम तारीख सुरुवातीला 03 ऑगस्ट 2025 अशी ठेवण्यात आली होती; मात्र ती नंतर वाढवण्यात आली आहे. उमेदवारांसाठी सर्वात महत्त्वाची बाब म्हणजे या भरतीची ऑनलाईन परीक्षा 06 सप्टेंबर 2025 रोजी होणार आहे, त्यामुळे इच्छुकांनी तयारीला लागणे गरजेचे आहे.
भरतीचे तपशील पाहता, एकूण 2500 पदं भरण्यात येणार आहेत. या पदासाठी पात्रता म्हणून उमेदवाराकडे किमान पदवीधर शिक्षण, स्थानिक भाषेचे ज्ञान आणि किमान एक वर्षाचा कामाचा अनुभव असणे आवश्यक आहे. नोकरीचे ठिकाण संपूर्ण भारतभर असेल. अर्ज प्रक्रिया www.bankofbaroda.in या अधिकृत संकेतस्थळावरूनच केली जाणार आहे.
अर्ज शुल्क अपेक्षेनुसार, सामान्य, OBC आणि EWS प्रवर्गातील उमेदवारांसाठी ₹850/-, तर SC, ST आणि PwD प्रवर्गासाठी केवळ ₹175/- ठेवण्यात आले होते. हे शुल्क डेबिट/क्रेडिट कार्ड किंवा UPI द्वारे ऑनलाईन भरता आले. राज्यानुसार जागांची संख्या देखील मोठ्या प्रमाणात जाहीर झाली आहे. गुजरातमध्ये सर्वाधिक 1160 जागा, महाराष्ट्रात 485, कर्नाटकमध्ये 450, गोव्यात 15, केरळात 50, पंजाबात 50, ओडिशामध्ये 60, तर पश्चिम बंगालमध्ये 50 जागा उपलब्ध आहेत.
वयोमर्यादा पाहता, उमेदवाराचे वय 01 जुलै 2025 रोजी 21 ते 30 वर्षांच्या दरम्यान असावे. मात्र आरक्षित प्रवर्गातील उमेदवारांना शासन नियमांनुसार वयोमर्यादेत आवश्यक सवलत दिली जाईल. निवड प्रक्रिया तीन टप्प्यांत होणार आहे. प्रथम ऑनलाईन लेखी परीक्षा, त्यानंतर स्थानिक भाषेची चाचणी, आणि शेवटी दस्तऐवज पडताळणी. या सर्व टप्प्यांत यशस्वी झालेल्या उमेदवारांनाच अंतिम निवड मिळेल. बँक ऑफ बडोदामध्ये स्थानिक शाखा अधिकारी म्हणून नोकरी करण्याची ही एक मोठी आणि प्रतिष्ठेची संधी आहे. स्थिर करिअर, बँकिंग क्षेत्रातील अनुभव आणि समाजसेवेची संधी एकाचवेळी मिळवण्याकरिता उमेदवारांनी वेळेत अर्ज करून तयारी सुरू करणे आवश्यक आहे.
