फोटो सौजन्य - Social Media
केंद्रीय लोकसेवा आयोगाची (UPSC) परीक्षा हा भारतातील सर्वात कठीण आणि आव्हानात्मक स्पर्धात्मक परीक्षांपैकी एक आहे. या परीक्षेत यश मिळवून आयएएस किंवा आयपीएस अधिकारी होणे अनेक विद्यार्थ्यांचे स्वप्न असते, परंतु त्यासाठी दीर्घकालीन तयारी, सातत्यपूर्ण मेहनत आणि शिस्त अनिवार्य असते. अशाच कठीण परीक्षेत दोनदा यश मिळवून प्रत्येकासाठी प्रेरणादायी ठरणारी कथा म्हणजे दिव्या तंवर यांची आहे. हरियाणातील महेंद्रगढ जिल्ह्यातील निंबी गावच्या या तरुणीने २०११ मध्ये वडिलांना गमावले, ज्यामुळे संपूर्ण आर्थिक जबाबदारी त्यांच्या आईवर ओढवली.
त्यांच्या आईने शेतात मजुरी करून घर सांभाळले, तर दिव्या यांनी वेळप्रसंगी शिलाईचे काम करून घरच्या खर्चात हातभार लावला. अशा कठीण परिस्थितीतही त्यांनी शिक्षणात कोणतीही अडचण येऊ दिली नाही आणि आपल्या शिक्षणासाठी कटिबद्ध राहिले. सुरुवातीचे शिक्षण त्यांनी सरकारी शाळेतून पूर्ण केले, त्यानंतर जवाहर नवोदय विद्यालयात प्रवेश मिळवला आणि सायन्समध्ये ग्रॅज्युएशन पूर्ण केले. ग्रॅज्युएशन नंतर त्यांनी UPSC परीक्षेची तयारी सुरु केली, मात्र इतर अनेक विद्यार्थी ज्या प्रकारे कोचिंग क्लासेसवर अवलंबून असतात, त्याउलट दिव्यांनी स्वतःचा मार्ग निवडला.
त्यांनी ऑनलाइन क्लासेस, टेस्ट सीरीज आणि मॉक टेस्टद्वारे अभ्यास करून स्वतःची तयारी केली, ज्यामुळे त्यांना पहिल्याच प्रयत्नात ऑल इंडिया रँक ४३८ मिळवून २१व्या वर्षी आयपीएस अधिकारी होण्याचा मान मिळाला. पण त्यांचे स्वप्न फक्त यावर थांबले नाही; त्यांनी आयएएस अधिकारी होण्याची इच्छा धरली आणि दुसऱ्या प्रयत्नात २०२२ मध्ये UPSC परीक्षा दिली. यावेळी त्यांना १०५ रँक मिळाली आणि त्यांनी IAS अधिकारी म्हणून काम करण्याची संधी मिळवली. दिव्या तंवर यांचा हा प्रवास कठीण परिस्थितीतून सातत्य, शिस्त, आत्मविश्वास आणि मेहनतीच्या जोरावर यश मिळवण्याचे अद्भुत उदाहरण ठरतो, जे प्रत्येक विद्यार्थ्यासाठी प्रेरणादायी आहे.
त्यांच्या संघर्षकथा, संयम आणि प्रयत्न हे दाखवतात की परिस्थिती कितीही कठीण असली तरी मनोबल आणि चिकाटी असल्यास कोणतेही स्वप्न पूर्ण केले जाऊ शकते. त्यांच्या यशातून विद्यार्थ्यांना हे शिकायला मिळते की आर्थिक अडचणी, कौटुंबिक जबाबदाऱ्या किंवा बाह्य अडथळे यामुळे आपल्या ध्येयापासून विचलित होऊ नये; सातत्य आणि योग्य तयारी यशाच्या दिशेने मार्गदर्शन करतात. दिव्या तंवर यांची ही कथा हेच सांगते की योग्य मार्गदर्शनाशिवाय आणि कोचिंगवर अवलंबून न राहता देखील ज्ञान, चिकाटी आणि आत्मशिस्त यामुळे सर्वोच्च यश मिळवता येऊ शकते.
