रविवार, 18 ऑक्टोबर 2026
Prasad Oak (फोटो सौजन्य- सोशलमीडिया)
मराठी सिनेमाचा लाडका अभिनेता प्रसाद ओकने ‘धर्मवीर‘ आणि ‘धर्मवीर 2’ या दोन्ही सिनेमात आनंद दिघे साहेबांची अक्षरशः जिवंत भूमिका केली आहे. हा सिनेमा लोकांना एवढा आवडला की थिएटर हाऊसफुल्ल झाले. प्रसादला या भूमिकेसाठी अनेक पुरस्कार पण मिळाले. लोक अजूनही त्याला दिघे साहेब म्हणूनच ओळखतात. Prasad Oak
आता रत्नागिरीत एका कार्यक्रमात प्रसाद ओकने जे केले, त्याने सगळ्यांचे डोळे पाणावले. त्याने स्टेजवरून आनंद दिघे साहेबांना काल्पनिक फोन लावला आणि मनातले सगळे बोलून दाखवले.
प्रसाद स्टेजवर भावूक झाला होता. तो म्हणाला, “दिघे साहेब, जय महाराष्ट्र. माझे दुर्दैव आहे की मी तुम्हाला कधीच प्रत्यक्ष पाहिले नाही. कधी भेटलो नाही. तुमचा सहवास मला कधीच मिळाला नाही.”तो पुढे म्हणाला, “मी आयुष्यात दोन वेळा तुमचे नाव ऐकले होते आणि तेव्हाच तुमचे नाव किती मोठे आहे हे कळले.
पहिला प्रसंग म्हणजे नथुराम गोडसे हे नाटक बंद पडले होते, ते तुम्ही सुरू करून दिले. आणि दुसरा प्रसंग यदा कदाचित हे नाटक बंद झाले होते, ते पण तुम्हीच सुरू केले. तेव्हा मला कळले की जेव्हा कलेचा प्रश्न येतो, तेव्हा तुम्ही पक्ष, राजकारण सगळे बाजूला ठेवून कलाकाराच्या मागे खंबीरपणे उभे राहता. ही गोष्ट माझ्या मनाला खूप भावली होती.
“प्रसाद म्हणाला की, मी स्वप्नात सुद्धा विचारा केला नव्हता की, मी तुमची भूमिका साकारेन. पण जेव्हा मला ती भूमिका मिळाली, तेव्हा तुमचे शिष्य, तुमचे कार्यकर्ते मला खूप मदत करायला आले. मी दिघे साहेबांची भूमिका करतोय हे कळल्यावर नांदेड, सोलापूर, कोल्हापूर, नाशिक अशा लांब लांब ठिकाणांहून लोक मला भेटायला यायचे. तुमच्या बद्दलच्या आठवणी सांगायचे, किस्से सांगायचे. त्याचाच मला सिनेमात खूप उपयोग झाला.
शेवटी प्रसाद अगदी भावूक होऊन म्हणाला, “आज धर्मवीर 1 आणि धर्मवीर 2 या दोन्ही सिनेमांना जे यश मिळाले, माझ्या कामाचे कौतुक झाले, ते फक्त तुमच्या आशीर्वादामुळेच आहे. दीघे साहेब तुम्ही आमच्याजवळ आहात म्हणून मी हे करु शकलो. पण या सगळ्यापलीकडे जाऊन एकच सांगतो साहेब, आज महाराष्ट्रात जी परिस्थिती चालू आहे, ती तुम्ही असता तर 100 टक्के नसती. तुम्ही परत आलात तरच महाराष्ट्र वाचेल. प्लीज परत या.”
प्रसादचे हे शब्द ऐकून तिथे उपस्थित असलेल्या सगळ्यांच्या अंगावर काटा आला. अनेकांच्या डोळ्यात पाणी आले. त्याचा हा व्हिडिओ आता सोशल मीडियावर खूप व्हायरल होत आहे. लोक म्हणत आहेत की दिघे साहेबांची भूमिका करण्यासाठी प्रसाद ओक शिवाय दुसरा कोणी असूच शकत नाही.
