शनिवार, 17 ऑक्टोबर 2026
पुणे : महावितरण’च्या वीजग्राहकांच्या बिलांची थकबाकी तब्बल ७३ हजार ३६१ कोटी रुपयांवर पोहोचली आहे. यामध्ये सवलतीच्या दरात वीजपुरवठा घेणाऱ्या १५ लाख १९ हजार शेतीपंपधारक ग्राहकांनी मागील पाच वर्षांपासून एकदाही वीजबिल भरलेले नसून, त्यांच्याकडे २१ हजार ६७ कोटी रुपयांच्या थकबाकीचा समावेश आहे.
तर तीन लाख २३ हजार शेती पंपधारकांनी गेल्या पंधरा वर्षांहून अधिक काळ एकही वीजबिलाचा भरणा केला नसून, त्यांच्याकडे ५ हजार २१६ कोटी रुपये थकित आहेत. ‘महावितरण’चे अध्यक्ष व व्यवस्थापकीय संचालक विजय सिंघल यांनी ही माहिती दिली.
‘घरगुती, औद्योगिक, व्यावसायिक व शेतीपंपधारक ग्राहकांनी अखंडित वीजपुरवठा सुरू ठेवण्यासाठी वीजबिले भरून सहकार्य करावे,’ असे आवाहन त्यांनी केले आहे. ‘वीजेमुळे शेतीचे सिंचन होते. त्यातून शेतकऱ्यांचे उत्पन्न वाढून त्यांना चांगले आयुष्य जगता येते. तरीही त्यांच्या एकूण खर्चाच्या तुलनेत अल्प असलेले वीजबिल भरण्यास काही शेतकऱ्यांची अनास्था दिसते. काही ग्राहक मोबाइल बिल, डीटीएचचे बिल नियमित भरतात. मात्र, अत्यावश्यक सुविधा असलेल्या विजेचे बिल भरण्यास टाळाटाळ करतात, हे आश्चर्यकारक आहे,’ असे सिंघल यांनी नमूद केले.
‘वीज ही अत्यावश्यक सेवा आहे. पाणीपुरवठा, आरोग्य सेवा, वाहतूक नियंत्रण, कार्यालयीन कामकाज, बँकिंग, इमारतीतील लिफ्ट अशा अनेक सेवा वीजपुरवठ्यावर अवलंबून आहेत. अखंडित वीजपुरवठ्यासाठी ‘महावितरण’ला वीज खरेदी करावी लागते. महावितरणच्या एकूण उत्पन्नापैकी ८० टक्के रक्कम वीजखरेदीवर खर्च होते.
मागील आर्थिक वर्षांत (२०२१-२२) ‘महावितरण’ने वीज खरेदीवर ६९ हजार ४७८ कोटी रुपये खर्च केले आहेत. वीजबिलांचे पैसे हा महावितरणचा उत्पन्नाचा एकमेव स्रोत आहे. त्यातून वीजखरेदीचे पैसे, कर्मचाऱ्यांचे वेतन व वीज प्रकल्पांचा खर्च भागविला जातो. त्यामुळे वीजग्राहकांनी वीजबिले नियमित भरणे अधिक गरजेचे आहे,’ असेही ते म्हणाले.
