पुणे : ‘मतदान करा, मत ताकद आहे’, ‘मतदार राजा जागा हो, लोकशाहीचा धागा हो’ अशा घोषणा देत शिरुर लोकसभा मतदारसंघातील निरगुडसर येथे ढोल ताशांच्या गजरात पंडित जवाहरलाल नेहरू विद्यालयाचे विद्यार्थी गावातील ज्येष्ठ नागरिकांपर्यंत पोहोचले आणि ‘आजोबा मतदानाला यायचं हं!’ असे म्हणत त्यांना जागरुक नागरिक या नात्याने मतदान करण्याचे आवाहन केले.
‘होय मी मतदान करणार’ असा आशय असलेल्या ‘सेल्फी फ्रेम’मागे उभे करीत विद्यार्थी नागरिकांचा फोटोही घेतात. देशाची भावी पिढी लोकशाही बळकट करण्यासाठी मोहिमेला निघालेली पाहून ग्रामस्थांकडूनही विद्यार्थ्यांच्या या उपक्रमाचे कौतुक होत आहे.
उपक्रमात जिल्हा परिषद प्राथमिक शाळेच्या मुख्याध्यापिका संगीता शेटे, डॉ. शांताराम गावडे, अशोक कडलग, साहील शहा, पंडित जवाहरलाल नेहरु विद्यालयाचे प्राचार्य कांताराम टाव्हरे, पर्यवेक्षक संतोष वळसे, नवनाथ थोरात, जिल्हा परिषद प्राथमिक शाळेचे विद्यार्थी व ग्रामस्थ सहभागी झाले होते.
दृकश्राव्य माध्यमाद्वारे जनजागृती
लोकसभा निवडणुकीत नागरिकांनी मतदानात सहभागी व्हावे यासाठी उपक्रम घेण्यात आला. एकात्मिक बाल विकास सेवा योजना प्रकल्प, पंचायत समिती शिरूरच्यावतीने अंगणवाडी स्तरावर दृकश्राव्य माध्यमाद्वारे मतदान जनजागृती कार्यक्रमाचे आयोजन करण्यात आले होते.
