महाराष्ट्राच्या विधानसभा निवडणुकीमध्ये मतदार यादीत भाजपकडून घोटाळा झाला असल्याचा जितेंद्र आव्हाडांनी आरोप केला आहे (फोटो - सोशल मीडिया)
Voter List Fraud : मुंबई : लोकसभेचे विरोधी पक्षनेते राहुल गांधी यांनी देशामध्ये नवीन मुद्द्याला हात घातला आहे. देशातील अनेक राज्यांमध्ये मतचोरी झाली असल्याचा आरोप राहुल गांधींनी केला आहे. याबाबत त्यांनी निवडणूक आयोगावर गंभीर आरोप करुन पुरावे देखील सादर केले आहेत. यामध्ये जीवंत मतदारांना मृत दाखवणे, मतदार याद्यांमधून नावे गहाळ करणे किंवा एकाच व्यक्तीची अनेक राज्यांमध्ये मतदान केल्याचे आरोप राहुल गांधींनी केले आहे. महाराष्ट्राच्या विधानसभा निवडणुकीमध्ये देखील हा घोटाळा केला असल्याचा आरोप करण्यात आला आहे. या संदर्भात आता आमदार जितेंद्र आव्हाड यांनी सोशल मीडिया पोस्ट केली आहे.
राष्ट्रवादी शरद पवार गटाचे आमदार जितेंद्र आव्हाड यांनी सोशल मीडिया पोस्ट करत निवडणूक आयोगावर गंभीर आरोप केला आहे. जितेंद्र आव्हाड यांनी लिहिले आहे की, “महाराष्ट्रात जे विधानसभा निवडणुकीत जे घडले ते केवळ निवडणुकीतील गैरप्रकार नव्हते. ते लोकशाहीवर एक पद्धतशीर, तंत्रज्ञानाने चढविलेला हल्ला होता. १९ ऑक्टोबर २०२४ रोजी, मतदान सुरू होण्यापूर्वीच महाविकास आघाडीने निवडणूक आयोगाला औपचारिकपणे भाजपकडून अनेक मतदारसंघांमध्ये मोठ्या प्रमाणात मतदार याद्यांमध्ये करत असलेल्या फेरफार बद्दल सतर्क केले होते. ही निवडणूकोत्तर तक्रार नव्हती. ती पूर्वसूचना होती,” असा आरोप जितेंद्र आव्हाड यांनी केला आहे.
निवडणूक धांधली बाबत निवडणूक प्रक्रियेतील महत्वाच्या अधिकाऱ्यांनी नोंदवलेली तक्रार #वोट_चोरी pic.twitter.com/zGLDF48E3W — Dr.Jitendra Awhad (@Awhadspeaks) August 20, 2025
राजकीय बातम्या वाचण्यासाठी क्लिक करा
पुढे त्यांनी लिहिले आहे की, “आमच्या तक्रारीत भाजपचे कार्यकर्ते विरोधी मतदारांना ओळखण्यासाठी आणि हटविण्यासाठी डिजिटल साधनांचा वापर करत होते, तर बनावट आधार कार्ड आणि फेरफार केलेल्या डेटाचा वापर करून बनावट मतदार कसे जोडत होते याचे तपशीलवार वर्णन केले होते. विरोधी मतदारांना लाल रंगात चिन्हांकित केले गेले होते म्हणजेच हटवण्याचे लक्ष्य होते. भाजप समर्थकांना हिरवे चिन्हांकित केले गेले होते म्हणजेच काढून टाकण्यापासून संरक्षण दिले गेले होते. या याद्या निवडणूक आयोगाच्या मतदार मान्यता प्रणालीवर परिणाम करणाऱ्या खाजगी सर्व्हरवर अपलोड केल्या गेल्या. फसव्या मतदारांची मोठ्या प्रमाणात नोंदणी करण्यासाठी सायबर कॅफे आणि आधार सेतू केंद्रांना जोडण्यात आले होते. प्रत्येक मतदारसंघात अंदाजे १०,००० बनावट मतदार होते,” असा गंभीर आरोप जितेंद्र आव्हाड यांनी भाजप आणि निवडणूक आयोगावर केला आहे.
महाराष्ट्रसंबंधित बातम्या वाचण्यासाठी क्लिक करा
पुढे आव्हाडांनी लिहिले आहे की, “७ ऑक्टोबर रोजी, निवडणूक आयोगाच्या एका अधिकाऱ्याने धाराशिवमध्ये एफआयआर दाखल केला, ज्यामध्ये तुळजापूरमध्ये बनावट मतदार नोंदणींचा पूर उघडकीस आला – त्यात सहभागी असलेल्यांची नावे घेतली आणि हे किती खोलवर गेले आहे हे दाखवून दिले. आम्ही १३ मतदारसंघांमधून ठोस पुरावे सादर केले: शिर्डी, चंद्रपूर, कोथरूड, नागपूर, गोंदिया आणि इतर. आणि तरीही, निवडणूक आयोगाने मौन बाळगले. पण आम्ही गप्प बसणार नाही, आम्ही भाजपला आमचे संविधान आणि लोकशाही चिरडून टाकू देणार नाही. आम्ही लढू कारण लोकशाही केवळ निवडणूक रणनीतींबद्दल नाही, ती विश्वासाबद्दल आहे. आम्ही कोणत्याही परिस्थितीत भारतीय संविधान आणि लोकशाहीचे रक्षण करण्यासाठी असलेल्या संस्थांना मार्गावरून हटवू देणार नाही,” असा आक्रमक पवित्रा जितेंद्र आव्हाड यांनी घेतला आहे. त्यामुळे आता पुन्हा एकदा महाराष्ट्र विधानसभा निवडणुकीचा निकाल वादाच्या भोवऱ्यात अडकला आहे.
