Maharashtra Breaking News Updates Today:
29 Apr 2026 09:43 AM (IST)
जागतिक ऊर्जा क्षेत्रात सध्या एका मोठ्या युगाचा अंत होताना दिसत आहे. संयुक्त अरब अमिरातीने (UAE) १ मे २०२६ पासून तेल उत्पादक देशांची संघटना ‘ओपेक’ (OPEC) आणि ‘ओपेक+’ मधून बाहेर पडण्याची अधिकृत घोषणा केली आहे. इराणसोबत सुरू असलेल्या युद्धामुळे (US-Israel vs Iran) आणि होर्मुझच्या सामुद्रधुनीतील विस्कळीत तेल पुरवठ्यामुळे आधीच तेलाचे दर प्रति बॅरल ११० ते ११३ डॉलर्सच्या वर गेले असताना युएईचे हे पाऊल अत्यंत महत्त्वाचे मानले जात आहे.
29 Apr 2026 09:30 AM (IST)
गोध्रा: गुजरातच्या राजकारणातून सामाजिक सलोख्याचा एक अत्यंत महत्त्वाचा आणि सकारात्मक संदेश समोर आला आहे. धार्मिक संदर्भांनी चर्चेत राहणाऱ्या गोध्रा शहरात, स्थानिक स्वराज्य संस्थेच्या निवडणुकीत एका हिंदू महिला उमेदवाराने मुस्लिम बहुल वॉर्डातून विजय मिळवून नवा इतिहास रचला आहे.
गोध्रा नगरपालिकेच्या वॉर्ड क्रमांक ७ मधून अपेक्षाबेन नैनेशभाई सोनी या अपक्ष उमेदवाराने मोठ्या मताधिक्याने विजय संपादन केला. विशेष म्हणजे, या वॉर्डात १०० टक्के मुस्लिम मतदार असून अपेक्षाबेन स्वतः या वॉर्डाच्या मतदारही नाहीत.
29 Apr 2026 09:25 AM (IST)
मुंबई: विधान परिषद निवडणुकीच्या ९ जागांसाठी अर्ज भरण्यास अवघे दोन दिवस शिल्लक असताना राज्याच्या राजकारणात मोठी खळबळ उडाली आहे. शिवसेना शिंदे गटाचे नेते संजय निरुपम यांनी दहावा उमेदवार रिंगणात उतरवण्याचे संकेत दिले असून, यामुळे महाविकास आघाडीच्या गोटात चिंतेचे वातावरण निर्माण झाले आहे.
संजय निरुपम यांनी माध्यमांशी बोलताना स्पष्ट केले की, महायुतीचे दोन उमेदवार संख्याबळाच्या जोरावर सहज निवडून येतील, मात्र अतिरिक्त मते आणि अपक्ष आमदारांच्या पाठिंब्यावर दहावा उमेदवार मैदानात उतरवण्याबाबत विचार सुरू आहे. अनेक छोटे पक्ष आणि अपक्ष आमदार थेट मुख्यमंत्री एकनाथ शिंदे यांच्या संपर्कात असल्याचा दावाही त्यांनी केला. दरम्यान, महाविकास आघाडीकडून उद्धव ठाकरे यांनी स्वतः निवडणूक लढवावी, यासाठी घटक पक्षांनी आग्रह धरला असतानाच शिंदे गटाच्या या पवित्र्यामुळे निवडणुकीत मोठी चुरस पाहायला मिळण्याची शक्यता आहे.
29 Apr 2026 09:20 AM (IST)
मुंबई: राष्ट्रवादी काँग्रेसचे खासदार पार्थ पवार यांनी 'व्हीएसआर' (VSR) कंपनीच्या विमानाने प्रवास केल्याने राजकीय चर्चांना उधाण आले असतानाच, त्यांनी यावर आपली भूमिका स्पष्ट केली आहे. हा प्रवास जाणीवपूर्वक केलेला नसून ती एक 'प्रशासकीय चूक' असल्याचे त्यांनी म्हटले आहे.
पार्थ पवार यांनी 'एक्स'वर पोस्ट करत माहिती दिली की, शरद पवार यांच्या स्नेहभोजनासाठी मुंबई ते पुणे प्रवासाचे नियोजन घाईघाईत करण्यात आले होते. "विमान प्रवासाचे बुकिंग शेवटच्या क्षणी झाल्यामुळे कर्मचाऱ्यांकडून अनावधानाने या कंपनीचे विमान बुक झाले. विमानापर्यंत पोहोचेपर्यंत मला ते विमान 'व्हीएसआर' कंपनीचे असल्याचे माहित नव्हते," असे त्यांनी स्पष्ट केले. या चुकीची गंभीर दखल घेत संबंधित बुकिंग एजंटचा करार रद्द केल्याचेही त्यांनी सांगितले.
29 Apr 2026 09:15 AM (IST)
दुबई: जागतिक तेल बाजारात मोठी खळबळ उडालेली असून, संयुक्त अरब अमिरातीने (UAE) तेल उत्पादक देशांची प्रमुख संघटना असलेल्या 'ओपेक' (OPEC) आणि 'ओपेक प्लस'मधून बाहेर पडण्याचा ऐतिहासिक निर्णय घेतला आहे. १ मे पासून यूएई या दोन्ही संघटनांचे सदस्यत्व अधिकृतपणे सोडणार आहे.
सौदी अरेबिया आणि यूएई यांच्यात तेल उत्पादन धोरणावरून निर्माण झालेल्या अंतर्गत मतभेदांमुळे हा निर्णय घेतल्याचे समजते. अमेरिका आणि इराणमधील संघर्षामुळे होर्मुझची सामुद्रधुनी बंद होऊन आधीच तेल पुरवठा विस्कळीत झाला असताना, यूएईच्या या पावलामुळे जागतिक तेल बाजारात मोठे फेरबदल होण्याची शक्यता आहे. १९६० मध्ये स्थापन झालेली 'ओपेक' संघटना जागतिक स्तरावर तेल उत्पादन आणि किंमतींवर नियंत्रण राखण्याचे काम करते.
29 Apr 2026 09:10 AM (IST)
मुंबई: आगामी विधान परिषद निवडणुकीसाठी भारतीय जनता पक्षाने मंगळवारी पाच उमेदवारांची अधिकृत यादी जाहीर केली. यामध्ये सुनील कर्जतकर, माधवी नाईक, संजय भेंडे, विवेक कोल्हे आणि प्रमोद जठार यांच्या नावांचा समावेश आहे. दिल्लीतील पक्ष नेतृत्वाने प्रदीर्घ चर्चेनंतर या पाच नावांवर शिक्कामोर्तब केले असून, याद्वारे पक्षाने संघटनेतील जुन्या कार्यकर्त्यांना बळ देण्याचा प्रयत्न केला आहे. या उमेदवार निवडीत भाजपने जातनिहाय समीकरणे आणि 'सोशल इंजिनिअरिंग'वर विशेष भर दिला आहे. आयारामांना झुकते माप दिले जाते या टीकेला उत्तर देत, यंदा पक्षाने निष्ठावंत चेहऱ्यांना संधी देऊन कार्यकर्त्यांमध्ये सकारात्मक संदेश पोहोचवला आहे.
29 Apr 2026 09:05 AM (IST)
पुणे: महाराष्ट्र दिनाचे औचित्य साधून १ मे रोजी पुण्यातील गुलटेकडी कृषी उत्पन्न बाजार समितीचे सर्व व्यवहार बंद ठेवण्याचा निर्णय घेण्यात आला आहे. मार्केट यार्डातील तरकारी, गूळ-भुसार, फूलबाजार, कांदा-बटाटा, पान आणि केळी बाजार यांसह सर्व प्रमुख विभाग शुक्रवारी बंद राहतील.
याशिवाय, बाजार समितीच्या कार्यक्षेत्रातील पेट्रोल पंप, वजन काटा विभाग आणि मोशी, खडकी, उत्तम नगर, मांजरी हे उपबाजारही पूर्णपणे बंद राहणार आहेत. या दिवशी खरेदी-विक्रीचे कोणतेही व्यवहार होणार नसल्याने शेतकरी बांधवांनी आपला शेतमाल विक्रीसाठी बाजारात आणू नये, असे आवाहन बाजार समिती प्रशासनाकडून करण्यात आले आहे.
नवी दिल्ली: मनी लॉन्डरिंग प्रकरणाचा तपास करत असताना अंमलबजावणी संचालनालयाने (ED) ‘रहेजा डेव्हलपर्स’ आणि त्यांचे प्रवर्तक नवीन रहेजा यांच्यावर मोठी कारवाई केली आहे. सुमारे २,४०० कोटी रुपयांच्या कथित घोटाळ्याप्रकरणी ईडीने मंगळवारी कंपनीची १,११४ कोटी रुपयांची मालमत्ता जप्त केली.
या जप्त मालमत्तांमध्ये रहेजांशी संबंधित ‘NA Buildwell’ आणि ‘Riyasat Palaces’ या कंपन्यांसह नवीन रहेजा यांच्या कुटुंबीयांच्या नावावरील स्थावर मालमत्तांचा समावेश आहे. घर खरेदीदारांची फसवणूक केल्याच्या तक्रारीवरून आर्थिक गुन्हे शाखेने नोंदवलेल्या गुन्ह्याच्या आधारे हा तपास सुरू होता. तपासात असे समोर आले आहे की, ४,६०० ग्राहकांकडून जमा केलेला सुमारे २,४२६ कोटी रुपयांचा निधी शेल कंपन्यांच्या माध्यमातून संचालक आणि त्यांच्या नातेवाईकांच्या वैयक्तिक फायद्यासाठी वळवण्यात आला.
