Pune News : पुण्यातील वाहतूक कोंडी सोडवण्यासाठी नवा प्लॅन; पुणे पालिकेचा सर्वंकष मोबिलिटी प्लॅन

पुणे : शहराच्या ईशान्य भागातील वाढती वाहतूककोंडी सोडविण्यासाठी पुणे महापालिकेने विमानतळ क्षेत्र एकात्मता आराखड्यासह नगर रस्त्याचा सर्वंकष मोबिलिटी प्लॅन तयार करण्याचा निर्णय घेतला आहे. या वेगाने विकसित होत असलेल्या भागाला भेडसावणाऱ्या तीव्र रहदारीच्या समस्येवर दीर्घकालीन उपाय शोधण्यासाठी महापालिका सल्लागार नेमणार आहे.

खासगी वाहनांची झपाट्याने होणारी वाढ, शहरी भागाचा विस्तार आणि अपुऱ्या वाहतुकीच्या पायाभूत सुविधांमुळे पुण्यातील वाहतुकीची समस्या निर्माण झाली आहे. शहराच्या ईशान्य भागात, ज्यात नगर रोड, विश्रांतवाडी, विमान नगर, पुणे विमानतळ परिसर आणि वाघोलीचा समावेश आहे. या सर्व भागात अलीकडील काही वर्षांत निवासी, व्यावसायिक आणि संस्थात्मक आस्थापनांमध्ये मोठी वाढ झाली आहे. विमानतळ परिसर शहराचे महत्त्वाचे प्रवेशद्वार म्हणून काम करतो, तर नगर रोड दक्षिणेकडील महत्त्वाच्या आयटी झोन आणि ईशान्येकडील विस्तारित उपनगरांना जोडतो. मात्र, समन्वयाचा अभाव वाहतुकीचे नियोजन नसल्यामुळे विशेषत: गर्दीच्या वेळी ट्रॅफिक जॅम असते.

राजकीय बातम्या वाचण्यासाठी क्लिक करा

वाहतुकीचे नियमन करण्यासाठी महापालिकेने सदलबाबा चौक आणि शास्त्रीनगर चौक, असे दोन उड्डाणपूल आणि ग्रेड सेपरेटर प्रस्तावित केले आहेत. त्याशिवाय वनाज-रामवाडी मेट्रो मार्ग वाघोलीपर्यंत वाढविण्यात आला आहे. महाराष्ट्र स्टेट इन्फ्रास्ट्रक्चर डेव्हलपमेंट कंपनी लिमिटेडने (एमएसआयडीसीएल) विमाननगर ते शिरूर एलिव्हेटेड उड्डाणपूल प्रस्तावित केला आहे. नगर रोड हा पुण्यातील प्रमुख रस्त्यांपैकी एक असला, तरी तो सर्वाधिक वर्दळीचा रस्ता बनला आहे. या समस्येवर मात करण्यासाठी महापालिकेने उड्डाणपूल, ग्रेड सेपरेटर, मेट्रो प्रकल्पाचा विस्तार असे अनेक उपाय सुचवले आहेत. राज्य सरकारने रिंगरोड आणि पुणे ते शिरूर, असा ५३ किलोमीटरचा एलिव्हेटेड रोड तयार केला आहे. या सर्व घडामोडी लक्षात घेऊन महापालिकेने सर्वसमावेशक मोबिलिटी प्लॅन तयार करण्याचा निर्णय घेतला आहे.