कर्नाळा खिंडीमध्ये खासगी बसचा भीषण अपघात, एक ठार तर 26 प्रवासी जखमी
Panvel Accident News in Marathi : मुंबई-गोवा राष्ट्रीय महामार्गावर पनवेलजवळ कर्नाळा खिंडीत रविवारी उशिरा रात्री अकरा वाजण्याच्या सुमारासखाजगी प्रवासी बस पलटल्याची गंभीर घटना घडली. ओमकार ट्रॅव्हल्सच्या बसमध्ये एकूण 49 प्रवासी होते. या अपघातात एकाचा मृत्यू झाला तर 26 प्रवासी जखमी झाले असून त्यापैकी 2 जणांची प्रकृती गंभीर आहे. अमोल तळवडकर या प्रवाशाचा या अपघातात दुर्दैवी मृत्यू झाला आहे.
ही खासगी बस मुंबईहून कोकणाकडे निघाली होती. रात्री सुमारे 11 वाजता कर्नाळा घाट उतरत असताना चालकाचे वाहनावरील नियंत्रण सुटल्याने बस रस्त्याच्या कडेला उलटली. या घटनेची माहिती मिळताच पोलीस, अग्निशमन दल आणि स्थानिक नागरिकांनी तत्काळ घटनास्थळी धाव घेत बचावकार्य सुरू केले. काही प्रवासी बसखाली अडकले होते, त्यांना जेसीबीच्या मदतीने बाहेर काढण्यात आले. सर्व जखमींना कामोठे येथील एमजीएम रुग्णालयात दाखल करण्यात आले आहे. यावेळी स्थानिक प्रशासन आणि रुग्णालय प्रशासनाकडून जखमींवर उपचार सुरू आहेत. अपघाताचे कारण शोधण्यासाठी पोलीस तपास सुरू आहे. निष्काळजीपणे वाहन चालवून अपघात घडवून आणल्यामुळे बसचालक सुनील गुरव याच्याविरुद्ध गुन्हा दाखल करण्यात आला आहे. सध्या चालक फरार असल्याची माहिती मिळत आहे.
ओमकार ट्रॅव्हल्सची (एमएच-47-वाय-7487) बोरिवली ते सावंतवाडी ही बस रात्री 11 वाजण्याच्या सुमारास कर्नाळा खिंडीतून जात होती. अचानक चालकाचे नियंत्रण सुटले आणि बस उलटली. या बसमध्ये 35 प्रवासी होते. त्यातील एकाचा मृत्यू झाला आहे. या अपघातामुळे कर्नाळा खिंडीतील प्रचंड वाहतूक कोंडी झाली होती. उन्हाळी सुट्टी लागल्याने अनेक प्रवासी कोकणात गावी जात होते.
