पुणे पोलीस दामिनी पथकाने दोन महिलांना आत्महत्येपासून परावृत्त केले (फोटो - टीम नवराष्ट्र)
Pune Damini Pathak : पुणे : शहर पोलिसांच्या दामिनी पथक हे फक्त महिलांच्या सुरक्षेसाठी नव्हे, तर संकटसमयी जीवनरक्षक कवच ठरत असल्याचे पुन्हा एकदा सिद्ध झाले आहे. कोथरूड पोलिसांच्या दामिन मार्शलने आत्महत्येच्या वाटेवर असलेल्या दोन उच्च शिक्षित महिलांचे प्राण वाचवले आहेत. त्यांच्या या कामगिरीचे सर्व स्तरातून कौतुक होत आहे.
दामिनी पथकातील पोलीस शिपाई श्रुती कढणे आणि आरती जाधव असे या महिला कर्मचाऱ्यांची नावे आहेत. कोथरूड पोलिस ठाण्याअंतर्गत त्या दामिनी मार्शलवर कर्तव्यावर आहेत. श्रुती कढणे या राष्ट्रीय स्तरावरील सुवर्णपदक विजेत्या बॉक्सिंग खेळाडू आहेत. त्या स्व:अनुभवाचा उपयोग करून शाळा-कॉलेजमधील मुलींना सेल्फ डिफेन्सचे मार्गदर्शन करतात. सतत महिलांशी, विद्यार्थिनींशी व जेष्ठ नागरिकांशी संवाद साधत जनजागृती करण्याचे काम श्रुती कढणे करतात.
राजकीय बातम्या वाचण्यासाठी क्लिक करा
कोथरूडमधील करिष्मा सोसायटीत २६ वर्षीय तरुणीने नैराश्यातून औषधांचे सेवन केले होते. ही माहिती दामिनी पथकाला मिळाली. लागलीच श्रुती कढणे व आरती जाधव यांनी घटनास्थळी धाव घेतली. तिला रुग्णालयात घेऊन जात वेळेत उपचार मिळवून दिले. नंतर तिला धीर देत तिची समजूत घातली. तसेच आत्महत्येच्या मार्गावरून परावृत्त केले. घटस्फोटाच्या मानसिक तणावातून तिने हे पाऊल उचलले होते. दुसऱ्याच दिवशी आणखी एक घटना अशीच घडली. तेथे दामिनी पथकाने धाव घेत या तरुणीला धीर दिला. मयूर कॉलनीत महिला कौटुंबिक कारणातून आई-वडिलांसोबत राहते. तिने तिसऱ्या मजल्यावरून उडी मारण्याच्या तयारीत होती. या वेळीही दामिनी पथकाने तिथे धाव घेत तिचे मन परावृत्त करून प्राण वाचविले. तिला “प्रत्येक अडचणीला मार्ग असतो, स्वतःचा जीव घेणे चूक आहे” असे समजावत सुरक्षितपणे आई-वडिलांकडे सुपूर्द केले. वरिष्ठ पोलीस निरीक्षक संदीप देशमाने यांच्या मार्गदर्शनाखाली त्यांनी ही कामगिरी केली.
महाराष्ट्रसंबंधित बातम्या वाचण्यासाठी क्लिक करा
दामिनी पथकाचे विविध समोजपयोगी उपक्रम
पुणे शहर पोलिसांचे दामिनी मार्शल पथक लोकांमध्ये उतरुन लक्षणीय कामगिरी करत आहे. पुणे हे शिक्षणाचे माहेरघर असून बाहेर गावावरुन अनेक तरुणी शहरामध्ये येत असतात. या सर्व तरुणींच्या सुरक्षेची जबाबदारी दामिनी पथक निभावते आहे. याचबरोबर महिला सुरक्षेसंदर्भात दामिनी पथकाचे अनेक स्त्युत्य उपक्रम सुरु असतात. यामध्ये शाळा-कॉलेजांमध्ये जाऊन दामिनी महिला पोलीस तरुणींना मार्गदर्शन करत असतात. यामध्ये गुड टच – बॅड टच याबाबत जनजागृती केली जाते. त्याचबरोबर पॉस्को कायद्याविषयी माहिती देखील तरुणींना दिली जाते. महिलांच्या रक्षणासाठी आत्मसंरक्षणाचे प्रशिक्षण देखील दामिनी पथक शाळा-कॉलेजांमध्ये जात देत असते. याचबरोबर समाजातील विविध स्तरावरील, विभागामधील आणि वयोगटातील महिला, विद्यार्थिनी व जेष्ठ नागरिकांशी संवाद साधत असतात. यामुळे समाज संरक्षित राहण्यास मोठा फायदा होत आहे.
