दोन्ही राष्ट्रवादी काँग्रेस पक्ष एकत्र येणार? प्रदेशाध्यक्ष सुनील तटकरेंचे मोठे विधान; म्हणाले, “अधिकृत प्रस्ताव…”

कराड: दोन्ही राष्ट्रवादी काँग्रेस पक्षांच्या एकत्रिकरणाच्या चर्चा आहेत. मात्र, याबाबत कुठेही तसा अधिकृत प्रस्ताव आलेला नाही, असा खुलासा राष्ट्रवादी काँग्रेस अजित पवार पक्षाचे प्रदेशाध्यक्ष सुनील तटकरे यांनी केला.  येथील प्रीतिसंगमावरील यशवंतराव चव्हाण यांच्या समाधीस्थळी प्रदेशाध्यक्ष सुनील तटकरे यांनी अभिवादन केले. यावेळी राज्य महिला आयोगाच्या अध्यक्षा रूपाली चाकणकर, उदयसिंह पाटील-उंडाळकर, शिवाजीराव नाईक यांच्यासह पदाधिकाऱ्यांची उपस्थिती होती.

याप्रसंगी दोन्ही राष्ट्रवादी काँग्रेस पक्षाच्या एकत्रीकरणाच्या प्रश्नावर त्यांनी वरील उद्गार काढले. माध्यमांशी संवाद साधताना तटकरे म्हणाले, दिवंगत नेते यशवंतराव चव्हाण साहेबांच्या विचारांवर बहुजन समाजाचे हित असेल तर, तुम्ही सरकारमध्ये असले पाहिजे. आम्ही नरेंद्र मोदी यांच्या नेतृत्वाखाली एनडीएमध्ये सहभागी झालो. शिव, शाहू, फुले, आंबेडकरांच्या सामाजिक समतेच्या विचारांपासून आम्ही तसूभरही बाजूला गेलो नाही. यशवंतराव चव्हाण साहेबांच्या विचारांपासूनही आम्ही बाजूला गेलो नाही. या भूमिकांवर आम्ही ठाम असून भविष्यातही ठाम राहणार आहोत. आमच्या निर्णयावर राज्यातील बारा कोटी जनतेने शिक्कामार्फत केले असल्याचेही त्यांनी यावेळी सांगितले.

महायुतीतील तिन्ही घटक पक्षांमध्ये इनकमिंग चालू आहे. त्यामुळे आगामी विधानसभा स्वतंत्रपणे लढण्याची ही तयारी आहे का? यावर  तटकरे म्हणाले, आम्ही एनडीए म्हणून एकत्रित आहोत. पंडित नेहरूनंतर नरेंद्र मोदींना सलग तीनवेळा पंतप्रधानपद भूषवण्याची संधी 130 कोटी जनतेने त्यांना दिली. मुख्य भाजपासह शिवसेना आणि राष्ट्रवादी आम्ही तिन्ही एनडीएचे घटक आहोत. त्यामुळे लोकसभा आणि विधानसभा स्वतंत्र लढवणे हा विचारही कधी कोणाच्या मनात येऊ शकत नाही.

स्थानिक स्वराज्य संस्थांच्या निवडणुकीतही एकत्रितपणे कसे सामोरे जाता येईल, यावर तिन्ही पक्षांचे प्रमुख एकत्रित बसून चर्चा करतील. या निवडणुकांमध्ये जिल्हा, तालुका स्तरावर, तसेच महानगरपालिका, नगरपालिका स्तरावर वेगवेगळी राजकीय परिस्थिती असते. त्यामुळे याचा विचार करता सर्वांना एकत्रितपणे घेऊन या निवडणुकांना कसे सामोरे जाता येईल, यादृष्टीने प्रयत्न असल्याचे त्यांनी सांगितले.

छगन भुजबळ यांच्या मंत्रिमंडळ समावेशाच्या प्रश्नावर ते म्हणाले, छगन भुजबळ यांचा समावेश आणि नाशिक जिल्ह्याचे पालकमंत्रीपद याचा काहीही संबंध नाही. नाशिक आणि रायगड जिल्ह्याच्या पालकमंत्री पदाचे निर्णय ज्या वेळेला झाले, त्याला स्थगिती देण्यात आली आहे. या संदर्भातील निर्णय लवकरात लवकर व्हावा, अशी राष्ट्रवादीची भूमिका आहे. शेवटी सरकारमधील निर्णय मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजितदादा पवार हे एकत्रितपणाने लवकरच घेतील.

उपमुख्यमंत्री अजित पवार यांनी बीडचे पालकमंत्रीपद स्वीकारले तरीही, तेथील कायदा व सुव्यवस्थेचा प्रश्न मिटलेला नाही? या प्रश्नावर तटकरे म्हणाले, अजितदादांनी पालकमंत्रीपद स्वीकारल्यावर त्यांनी संपूर्ण बीडचा दौरा केला. रेल्वे, रस्ते, अंबाजोगाई मेडिकल कॉलेज असे अन्य विविध प्रश्न त्यांनी तत्परकेने हाती घेतले आहेत. काही घटना घडल्यावर त्याचे परिणाम संपूर्ण राज्यभर उमटत असतात. गुन्हेगारी घटनांबाबत गृहमंत्री देवेंद्र फडणवीस व पालकमंत्री अजितदादा पवार कटाक्षाने लक्ष ठेवून असल्याचे त्यांनी सांगितले.