मंगळवार, 7 जुलै 2026
गोंदिया : अर्जुनी मोरगाव येथील सहा वर्षाच्या बालकासोबत अनैतिक अत्याचार केल्याप्रकरणी जिल्हा व विशेष सत्र न्यायाधीश एस.ए.ए.आर. औटी यांनी त्या नराधम आरोपीस २७ वर्षाचा सश्रम कारावास व ३० हजार रुपये दंडाची कठोर शिक्षा ठोठावली. दिनेश भिकाजी नंदेश्वर (वय ३०) रा. अर्जुनी मोरगाव असे त्या नराधमाचे नाव आहे.
अर्जुनी मोरगाव येथील पिडीत मुलाची आई नेहमीप्रमाणे मजुरीच्या कामावरून घरी आल्यावर सहा वर्षाच्या पिडीत बालकाने आपल्या आईला सांगितले की, घरी असताना आरोपी दिनेश नंदेश्वर याने त्याचे कपडे काढून अनैतिक अत्याचार केला. दरम्यान, पिडीत बालकाच्या अंगावर जखम व रक्त लागलेले दिसून आले. याबाबद फिर्यादीने अर्जुनी मोरगाव पोलिस ठाण्यात आरोपीविरोधात गुन्हा दाखल केला. तक्रारीची दखल घेवून तत्कालीन तपासी अधिकारी सहाय्यक पोलिस निरीक्षक सोमनाथ कदम यांनी आरोपीविरोधात न्यायालयात दोषारोपपत्र सादर केले. प्रकरणात आरोपी विरुद्ध दोष सिद्ध करण्यासाठी सरकार तसेच पिडीत / फिर्यादी पक्षातर्फे अतिरिक्त सरकारी वकील सतीश यु. घोडे व विशेष सरकारी वकील कृष्णा डी. पारधी यांनी न्यायालयासमोर एकूण १० साक्षदारांची साक्ष नोंदवून घेतली.
वैद्यकीय पुरावा व न्यायालयासमोर आलेली परिस्थितीजन्य पुरावे लक्षात घेता तसेच आरोपीचे वकील व सरकारी वकील यांचे सविस्तर युक्तीवादानंतर न्यायाधीश एस.ए.ए.आर. औटी यांनी आरोपीविरूद्ध सरकारी पक्षाचा पुरावा ग्राह्य धरून आरोपीला २० वर्षाचा सश्रम कारावास व २० हजार रुपये दंड, दंड न भरल्यास १ वर्षाचा अतिरिक्त कारावास तसेच बालकांचे लैंगिक अपराधापासून संरक्षण अधिनियम २०१२ अंतर्गत ७ वर्षाचा सश्रम कारावास व १० हजार रुपये दंड व दंड न भरल्यास सहा महिन्याचा अतिरिक्त कारावास अशी एकूण २७ वर्षे व ३० हजार रुपये दंडाची कठोर शिक्षा ठोठावली. सदर दंडाची रक्कम पिडीत बालकाला देण्याचे न्यायालयाने आदेश केले. त्याचप्रमाणे, जिल्हा विधी सेवा प्राधिकरण गोंदियामार्फत पिडीत बालकाला मनोधर्य योजनेंतर्गत आर्थिक मदत व पुनर्वसन करण्याचे आदेश केले आहे. या प्रकरणात पोलिस निरीक्षक चंद्रकांत सूर्यवंशी यांच्या देखरेखीत पैरवी कर्मचारी पोलिस हवालदार गीता ठाकूर, तुरकर यांनी उत्कृष्ट काम पाहिले.
