Pallavi Joshi (Photo Credit- X)
कोलकाता: प्रसिद्ध चित्रपट निर्माते विवेक रंजन अग्निहोत्री (Vivek Agnihotri) यांच्या आगामी ‘द बंगाल फाइल्स’ (The Bengal Files) या चित्रपटावरून पुन्हा एकदा वाद निर्माण झाला आहे. आज या चित्रपटाचा ट्रेलर लाँच होणार होता, मात्र कोलकातामध्ये (Kolkata) या कार्यक्रमात मोठा गोंधळ झाल्याने ट्रेलर कार्यक्रम प्रदर्शित होऊ शकला नाही. या गोंधळाचा व्हिडिओ सोशल मीडियावर व्हायरल होत असून, आता या प्रकरणाची जोरदार चर्चा सुरू आहे.
एएनआयने (ANI) आपल्या अधिकृत एक्स (पूर्वीचे ट्विटर) अकाउंटवर एक व्हिडिओ शेअर केला आहे. या व्हिडिओमध्ये लोकांची मोठी गर्दी दिसत असून, अभिनेत्री पल्लवी जोशी आपली बाजू मांडताना दिसत आहेत. या पोस्टमध्ये म्हटले आहे की, ‘द बंगाल फाइल्स’च्या ट्रेलर लाँचवेळी कोलकातामध्ये मोठा गोंधळ झाला.
#WATCH | West Bengal | A ruckus erupted during the release of ‘The Bengal Files’ trailer in Kolkata today. Actor Pallavi Joshi alleges the trailer launch was not allowed. Actor Pallavi Joshi says, ” I absolutely did not like the way my film was stopped. Is there freedom of… pic.twitter.com/nKC3ACIV7a — ANI (@ANI) August 16, 2025
एएनआयशी बोलताना अभिनेत्री पल्लवी जोशी यांनी आरोप केला की, त्यांना ट्रेलर लाँच करण्याची परवानगी दिली नाही. “हे सर्व पाहिल्यानंतर तुम्हाला अजूनही वाटत नाही का की ‘द बंगाल फाइल्स’ बनवणे किती आवश्यक होते? बंगालमध्ये काय घडत आहे, ते पाहा. मला वाटते की भारतातील प्रत्येक व्यक्तीने बंगालचे सत्य जाणून घेण्यासाठी हा चित्रपट पाहिला पाहिजे.”
पल्लवी जोशी पुढे म्हणाल्या की, त्या राजकारणाबद्दल बोलणार नाहीत, पण ज्या प्रकारे त्यांच्या चित्रपटावर बंदी घालण्यात आली, ते त्यांना अजिबात आवडले नाही. कोणत्याही चित्रपट निर्मात्याला आणि कलाकाराला सन्मान देणे ही राज्याची जबाबदारी आहे आणि हे शतकानुशतके चालत आले आहे, असेही त्यांनी सांगितले.
“त्यांना कोणत्या गोष्टीचा धोका जाणवत आहे? असे तर काश्मीरमध्येही झाले नाही,” असे म्हणत पल्लवी जोशींनी प्रश्न विचारला. “आपण हे मानू शकतो का, की काश्मीरची परिस्थिती बंगालपेक्षा चांगली आहे? हा चित्रपट खूप महत्त्वाचा आहे.” आता पुढे काय होणार, हे पाहणे महत्त्वाचे ठरेल.
‘द बंगाल फाइल्स’ हा चित्रपट पश्चिम बंगालमधील कथित हिंसा आणि मानवी हक्कांच्या उल्लंघनावर आधारित असल्याचे सांगितले जाते. विवेक अग्निहोत्री यांनी यापूर्वी ‘द काश्मीर फाइल्स’ आणि ‘द दिल्ली फाइल्स’ सारखे वादग्रस्त चित्रपट बनवले आहेत, त्यामुळे त्यांच्या या नव्या चित्रपटाकडूनही प्रेक्षकांना मोठ्या अपेक्षा आहेत. या चित्रपटाच्या ट्रेलर लाँचमध्ये झालेल्या गोंधळाने आता राजकीय आणि सामाजिक वर्तुळात नवा वाद निर्माण झाला आहे.
