मंगळवार, 6 ऑक्टोबर 2026
8 तासांच्या ठिय्यानंतर राहुल गांधी, प्रियंका गांधी पोलिसांच्या ताब्यात (Photo - X)
नवी दिल्ली : देशाचे मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी दिल्लीमध्ये आंदोलन करणारे काँग्रेस नेते राहुल गांधी अखेर पोलिसांच्या ताब्यात गेले आहेत. राहुल गांधी यांच्यासोबत काँग्रेस नेत्या प्रियंका गांधी, केसी वेणुगोपाल यांच्यासह इंडिया आघाडीच्या इतर नेत्यांनाही दिल्ली पोलिसांनी ताब्यात घेतलं. तब्बल आठ तासांहून अधिक काळ आकाशवाणी भवनमध्ये ठिय्या मांडल्यानंतर ही कारवाई करण्यात आली. (Rahul Gandhi Detained)
मंगळवारी सकाळपासून इंडिया आघाडीच्या खासदारांनी निवडणूक आयोगाविरोधात आंदोलनाची भूमिका घेतली होती. राहुल गांधी यांच्यासह खासदार निवडणूक आयोगाच्या कार्यालयाकडे जात असताना दिल्ली पोलिसांनी त्यांना अडवलं.
पोलिसांनी रस्त्यावर बॅरिकेड्स लावल्यानंतर राहुल गांधी यांनी बॅरिकेड्सवर चढून तिरंगा फडकावला. त्यानंतर पोलिसांनी त्यांना ताब्यात घेण्याची कारवाई केली.
राहुल गांधींना घेऊन जाणाऱ्या पोलिसांच्या वाहनाला इंडिया आघाडीच्या खासदारांनी घेराव घातला. यानंतर राहुल गांधी आणि प्रियंका गांधी तिथून बाहेर पडले आणि जवळच असलेल्या आकाशवाणी भवनमध्ये पोहोचले.
निवडणूक आयोगाच्या कार्यालयापासून आकाशवाणी भवन अवघ्या 300 मीटर अंतरावर आहे. राहुल गांधी यांनी याच ठिकाणी ठिय्या मांडत मुख्य निवडणूक आयुक्त ज्ञानेश कुमार यांची भेट घेण्याची मागणी लावून धरली.
राहुल गांधी मुख्य निवडणूक आयुक्तांना भेटून काही प्रश्न विचारायचे आहेत, या भूमिकेवर ठाम होते. मात्र, या ठिकाणी आंदोलन करता येणार नाही, त्यामुळे आंदोलन थांबवावं, असं दिल्ली पोलिसांकडून वारंवार सांगण्यात येत होतं.
राहुल गांधी आणि काँग्रेसच्या खासदारांनी तब्बल आठ तासांहून अधिक काळ ठिय्या दिला. राहुल गांधी यांनी आकाशवाणी भवनमध्येच रात्र घालवण्याची तयारी दर्शवली होती. मात्र त्याआधीच दिल्ली पोलिसांनी त्यांना ताब्यात घेतलं.
राहुल गांधी यांच्यासोबत प्रियंका गांधी, केसी वेणुगोपाल आणि इतर काँग्रेस नेत्यांनाही पोलिसांनी ताब्यात घेतलं. नेत्यांना ताब्यात घेतल्यानंतर पोलिसांनी परिसरातील बॅरिकेड्स हटवले आणि रस्ता वाहतुकीसाठी मोकळा केला.
दरम्यान, निवडणूक आयोगाविरोधातील या आंदोलनामुळे दिल्लीतील राजकीय वातावरण चांगलंच तापलं आहे. राहुल गांधी आणि इंडिया आघाडीच्या नेत्यांनी मुख्य निवडणूक आयुक्त ज्ञानेश कुमार यांच्या राजीनाम्याची मागणी लावून धरली आहे.
