फोटो सौजन्य - Social Media
महिलांच्या शिक्षण आणि सशक्तीकरणासाठी महत्त्वपूर्ण ठरलेल्या ‘कन्याथॉन २०२५’ मॅरेथॉन स्पर्धेचे आयोजन आमदार महेंद्र थोरवे फाउंडेशन आणि विजयभूमी युनिव्हर्सिटी यांच्या संयुक्त विद्यमाने करण्यात आले. कर्जत आणि खालापूर तालुक्यातील नागरिक, विद्यार्थी, सरकारी अधिकारी तसेच राजकीय नेत्यांनी मोठ्या संख्येने या स्पर्धेत भाग घेतला. याशिवाय काही सेलिब्रिटींनी देखील मॅरेथॉनमध्ये सहभाग घेतला. सलग चौथ्या वर्षी आयोजित झालेल्या या मॅरेथॉनमध्ये १० किमी, ५ किमी आणि ३ किमी अशा वेगवेगळ्या गटांमध्ये शर्यती घेण्यात आल्या. याशिवाय ३ किमी फन वॉकचेही आयोजन करण्यात आले होते. २ मार्च रोजी सकाळी सहा वाजता कर्जत-मुरबाड राष्ट्रीय महामार्गावरील पोसरी येथून या स्पर्धेला सुरुवात झाली. आमदार महेंद्र थोरवे यांनी झेंडा दाखवून स्पर्धेचे उद्घाटन केले आणि स्वतः देखील धावत सहभागींचा उत्साह वाढवला.
उद्घाटनप्रसंगी विजयभूमी युनिव्हर्सिटीचे उपकुलगुरू रविकेश श्रीवास्तव, मुख्य कार्यकारी अधिकारी राजू पुजारी, रजिस्टर श्रीवास्तव, संस्थापक प्रायका ओझा यांच्यासह मनोहर थोरवे, संकेत भासे, प्रसाद थोरवे आदी मान्यवर उपस्थित होते. या स्पर्धेच्या यशस्वी आयोजनासाठी 40+50+ क्रिकेट संघटना कर्जत, शिवशंभो युवा हायकर्स कर्जत, दहिवली गाव परिसर विचारमंच, साईनगर गृहनिर्माण संस्था दहिवली आणि SSC १९७६-७७ बॅच यांनी सहकार्य केले.
यंदाच्या कन्याथॉनमध्ये ‘कन्याथॉन स्कॉलरशिप’ पुरस्काराने सायली भोसले आणि बेबी ख़ातून यांना सन्मानित करण्यात आले. महिलांच्या शिक्षणासाठी तसेच सामाजिक क्षेत्रातील उल्लेखनीय योगदानासाठी त्यांना हा पुरस्कार देण्यात आला. महिलांच्या सशक्तीकरणासाठी आणि त्यांच्या उज्ज्वल भविष्यासाठी हा उपक्रम महत्त्वाचा ठरत असून, या पुरस्कारामुळे समाजातील इतर महिलांनाही प्रेरणा मिळेल.
स्पर्धेतील विजेते पुढीलप्रमाणे आहेत – १० किमी गटात प्रवीण कांबले आणि दामिनी चंद्रकांत पेडनेकर यांनी उत्कृष्ट कामगिरी करत प्रथम क्रमांक पटकावला. ५ किमी गटात स्वराज देवानंद पाटील आणि प्रणाली उमेश सावंत विजयी ठरले, तर ३ किमी गटात मंगेश पार्डी आणि धनश्री सुनील कराळे यांनी पहिल्या क्रमांकावर आपली पकड मिळवली. या विजेत्यांनी कठोर मेहनत आणि सातत्यपूर्ण सरावाच्या जोरावर उत्कृष्ट धावपटू म्हणून स्वतःला सिद्ध केले. या स्पर्धेत तब्बल ३,००० हून अधिक धावपटूंनी सहभाग घेतला, ज्यामध्ये विविध वयोगटांतील आणि स्तरांतील धावपटूंचा समावेश होता. लहान मुलांपासून ते जेष्ठ नागरिकांपर्यंत सर्वांनीच जोमाने सहभाग घेतला. कर्जत-मुरबाड महामार्ग या स्पर्धकांनी गजबजून गेला होता आणि संपूर्ण परिसरात एक वेगळाच उत्साह आणि चैतन्य अनुभवायला मिळाले. धावपटूंनी केवळ शर्यतीत भाग घेतला नाही तर महिलांच्या शिक्षण आणि सशक्तीकरणाचा संदेशही प्रभावीपणे दिला.
आमदार महेंद्र थोरवे यांनी या स्पर्धेच्या माध्यमातून भविष्यात कर्जत आणि खालापूर तालुक्यातून ऑलिम्पिक दर्जाचे धावपटू तयार होतील, असा विश्वास व्यक्त केला. त्यांनी सांगितले की, अशा स्पर्धांमुळे युवकांना एक उत्तम व्यासपीठ मिळते आणि त्यांच्यातील क्रीडा कौशल्य विकसित होण्यास मदत होते. त्यांनी उपस्थित सर्व सहभागी आणि विजेत्यांचे कौतुक करताना, भविष्यातही अशा प्रकारचे उपक्रम सातत्याने राबवले जातील, असे आश्वासन दिले.
