AI (Photo Credit- X)
आज आर्टिफिशियल इंटेलिजन्स (AI) आपल्या दैनंदिन जीवनाचा एक अविभाज्य भाग बनला आहे. कामात मदत असो, अभ्यास असो किंवा इतर कोणतीही माहिती मिळवायची असो, लोक ChatGPT, Grok, Copilot, किंवा Meta AI सारख्या चॅटबॉट्सचा सर्रास वापर करतात. लहान मुलांपासून ते मोठ्यांपर्यंत सगळेच याचा वापर करत आहेत, पण सोयीसोबतच धोकेही वाढले आहेत.
नुकत्याच ChatGPT आणि Grok वरून डेटा लीक झाल्याच्या घटनांनी हे स्पष्ट केले आहे की, या चॅटबॉट्सवर शेअर केलेली माहिती नेहमीच सुरक्षित नसते. लाखो युजर्सच्या खासगी चॅट आणि संवेदनशील डेटा लीक झाल्याची प्रकरणे समोर आली आहेत.
याच कारणामुळे, जेव्हाही तुम्ही AI चा वापर कराल तेव्हा एक गोष्ट नेहमी लक्षात ठेवा की हा माणूस नाही, तर एक सिस्टीम आहे जी तुम्ही दिलेली माहिती साठवून ठेवते आणि प्रोसेस करते. त्यामुळे, जर तुम्ही तुमची वैयक्तिक किंवा गोपनीय माहिती यात टाकली तर ती सायबर गुन्हेगारांपर्यंत सहज पोहोचू शकते.
तुम्ही तुमची कोणती माहिती AI ला दिल्यास ती तुमच्यासाठी धोकादायक ठरू शकते, हे जाणून घेऊया:
१. वैयक्तिक आणि ओळखपत्रे: तुमचं नाव, पत्ता, मोबाईल नंबर, ईमेल आयडी किंवा बँक खात्याचा तपशील यांसारखी माहिती हॅकर्ससाठी सोन्यासारखी असते. याचा वापर ते तुमची ओळख चोरण्यासाठी, आर्थिक फसवणूक करण्यासाठी किंवा सायबर हल्ला करण्यासाठी करू शकतात. त्याचप्रमाणे, पासपोर्ट, ड्रायव्हिंग लायसन्स, ओळखपत्र किंवा खासगी फोटो यांसारखी महत्त्वाची कागदपत्रे कधीही AI वर शेअर करू नका, कारण यामुळे तुमची ओळख चोरीला जाण्याची शक्यता अनेक पटींनी वाढते.
२. आर्थिक माहिती: बँक खाते क्रमांक, डेबिट किंवा क्रेडिट कार्डचा तपशील आणि पासवर्ड कधीही AI वर शेअर करू नये. ही माहिती लीक झाल्यास तुमचे आर्थिक व्यवहार हॅकर्ससाठी सहज लक्ष्य बनू शकतात.
३. खासगी आणि व्यावसायिक डेटा: अनेक लोक आपल्या खासगी गोष्टी, वैद्यकीय नोंदी किंवा ऑफिसचा गोपनीय डेटाही AI प्लॅटफॉर्मवर टाकतात. ही चूक खूप महागात पडू शकते. वैद्यकीय नोंदी लीक झाल्यास तुमची गोपनीयता धोक्यात येऊ शकते, तर कंपनीचा डेटा लीक झाल्यास व्यवसायाचे मोठे नुकसान होऊ शकते.
४. कायदेशीर किंवा संवेदनशील बाबी: चॅटबॉटकडून कायदेशीर सल्ला घेणेही सुरक्षित नाही. अनेक वेळा लोक त्यांच्या खटल्यांशी किंवा करारांशी संबंधित माहिती AI ला सांगतात, पण AI हा काही वकील नाही आणि त्याचा सल्ला पूर्णपणे विश्वासार्ह नसतो. यामुळे तुमची कायदेशीर स्थिती आणखी बिघडू शकते.
५. वादग्रस्त आणि गोपनीय संवाद: अनैतिक किंवा अश्लील कंटेट AI चॅटबॉट्सवर शेअर केल्यास तुमचे खाते निलंबित होऊ शकते. तसेच, ज्या गोष्टी तुम्हाला कधीही सार्वजनिक होऊ नयेत असे वाटते, त्या गोष्टी AI सोबत शेअर करणे टाळा. कारण हे प्लॅटफॉर्म तुमचे सामान्य संभाषणही रेकॉर्ड करू शकतात.
थोडक्यात, AI तुमच्या कामात नक्कीच मदत करतो, पण त्याच्यासोबत केलेली निष्काळजी तुम्हाला हॅकर्सचे लक्ष्य बनवू शकते. म्हणून, त्याचा वापर केवळ सामान्य माहिती मिळवण्यासाठी करा आणि कोणत्याही प्रकारचा खासगी आणि संवेदनशील डेटा शेअर करणे नेहमीच टाळा.
