सोमवार, 17 ऑगस्ट 2026
स्फोटांमुळे पाकिस्तान हादरला, बलुचिस्तानमध्ये IED स्फोटात दोन जण ठार, आंतरराष्ट्रीय चौकशीची मागणी ( फोटो सौजन्य : सोशल मीडिया )
पाकिस्तानचा (Pakistan) नद्या आणि नैसर्गिक संसाधनांनी नटलेला पण राजकीयदृष्ट्या अत्यंत संवेदनशील मानला जाणारा बलुचिस्तान प्रदेश पुन्हा एकदा भीषण रक्तांभाताने आणि स्फोटांच्या आवाजाने हादरला आहे. पाकिस्तानच्या नैऋत्येकडील बलुचिस्तान प्रांताची राजधानी क्वेटामध्ये रविवारी दुपारी घडलेल्या एका भीषण आयईडी (Improvised Explosive Device) स्फोटात दोन निष्पाप नागरिकांचा जागीच मृत्यू झाला असून काही जण गंभीर जखमी झाले आहेत. स्थानिक पोलिसांनी दिलेल्या माहितीनुसार, हा स्फोट एका चालत्या वाहनात झाला. हे वाहन पाण्याच्या पाइपलाइनसाठी आवश्यक असणारी उपकरणे आणि साहित्य घेऊन जात असताना त्याला अचानक स्फोटकांनी लक्ष्य करण्यात आले. या घटनेनंतर संपूर्ण क्वेटा शहरात प्रचंड घबराट पसरली असून कायदा व सुव्यवस्थेचा प्रश्न गंभीर बनला आहे.
स्थानिक सूत्रांनी दिलेल्या माहितीनुसार, स्फोटाची तीव्रता इतकी भीषण होती की वाहनाचे मोठे नुकसान झाले आणि आजूबाजूचा परिसर धुराच्या लोटांनी भरून गेला. घटनेची माहिती मिळताच सुरक्षा यंत्रणांनी घटनास्थळी धाव घेऊन परिसर वेढला आणि सर्व मृतदेह तसेच गंभीर जखमींना उपचारासाठी क्वेटा येथील प्रांतीय रुग्णालयात दाखल केले. मात्र, या हल्ल्यामागे नेमका कोणाचा हात होता किंवा या स्फोटाची जबाबदारी कोणत्या विशिष्ट संघटनेने घेतली आहे का, याबद्दल अद्याप कोणतीही अधिकृत माहिती समोर आलेली नाही. या घटनेमुळे स्थानिक नागरिकांमध्ये भीतीचे वातावरण पसले असून सुरक्षेच्या कारणास्तव शहरातील मुख्य रस्त्यांवर नाकाबंदी आणि तपासणी कडक करण्यात आली आहे.
हा हल्ला अशा एका नाजूक व तणावपूर्ण काळात झाला आहे, जेव्हा अवघ्या काही दिवसांपूर्वीच पाकिस्तानी हवाई दलाने सुरबच्या गिद्दार भागातील नागरी आणि निवासी वस्त्यांवर अंदाधुंद बॉम्बहल्ला केला होता. त्या लष्करी कारवाईत निष्पाप महिला आणि लहान मुलांसह ३० हून अधिक नागरिकांचा नाहक बळी गेला होता, तर अनेक जण जखमी झाले होते. लष्कराच्या या आक्रमक कारवाईमुळे स्थानिक नागरिकांच्या मालमत्तेचे आणि घरांचे अतोनात नुकसान झाले होते. हवाई हल्ल्याची ही जखम ताजी असतानाच आता राजधानी क्वेटामध्ये घडलेल्या या स्फोटाने बलोच नागरिकांच्या सुरक्षेचा प्रश्न पुन्हा एकदा ऐरणीवर आणला आहे.
जागतिक घडामोडी संबंधित बातम्या वाचण्यासाठी येथे क्लिक करा : Russia-Ukraine War: झेलेन्स्कींच्या होमटाऊनमध्ये रशियाचा धुमाकूळ; लक्ष्मी मित्तल यांच्या कारखान्यावर डागली क्षेपणास्त्रे, 2 ठार
या ताज्या हिंसाचारावर आणि लष्कराच्या भूमिकेवर बलुच यकजेहाती समितीच्या (BYC) प्रमुख आणि प्रसिद्ध नेत्या सबिहा बलोच यांनी अत्यंत कठोर शब्दांत संताप व्यक्त केला आहे. या हल्ल्याचा आणि पाकिस्तानी राजवटीच्या धोरणांचा जाहीर निषेध करताना त्यांनी म्हटले की, “पाकिस्तान सरकार आणि त्यांचे सैन्य लहान मुलांसह निष्पाप बलुच नागरिकांची सतत हत्या करून स्वतःच्या अस्तित्वाचा आणि ताकदीचा खोटा अभिमान बाळगत आहे.” सबिहा बलोच यांनी लष्कराच्या या संपूर्ण धोरणाला थेट ‘बलोच नागरिकांचा वंशसंहार’ (Genocide) असे संबोधले आहे.
आपल्या अधिकृत सोशल मीडिया प्लॅटफॉर्मवरून परिस्थिती मांडताना सबिहा बलोच यांनी अत्यंत गंभीर आरोप केले आहेत. त्यांनी लिहिले आहे की, “हल्ल्यानंतर आणि लष्करी कारवायांच्या नावाखाली संपूर्ण बाधित परिसर पाकिस्तानी सैन्याने छावणीचे रूप देऊन पूर्णपणे वेढला आहे. सर्वात धक्कादायक बाब म्हणजे, घटनास्थळी किंवा बाधित भागात बचाव पथके, वैद्यकीय कर्मचारी, आपत्कालीन रुग्णवाहिका आणि स्वतंत्र पत्रकारांच्या हालचालींवर पूर्णपणे बंदी घालण्यात आली आहे.” मानवतावादी मदत रोखणे आणि पत्रकारांना दस्तऐवजीकरण करण्यापासून परावृत्त करणे हे आंतरराष्ट्रीय मानवाधिकार नियमांचे आणि मानवी हक्कांचे थेट व उघड उल्लंघन आहे, असे सांगत त्यांनी या भीषण परिस्थितीकडे आंतरराष्ट्रीय समुदायाने, संयुक्त राष्ट्रसंघाने आणि जागतिक मानवाधिकार संघटनांनी तात्काळ लक्ष देण्याची अत्यंत तातडीची गरज असल्याचे प्रतिपादन केले. तसेच, त्यांनी जगभरातील निष्पक्ष पत्रकार, वैद्यकीय पथके आणि मानवतावादी संस्थांना पीडितांपर्यंत पोहोचण्यासाठी पुढे येण्याचे आवाहन केले आहे.
जागतिक घडामोडी संबंधित बातम्या वाचण्यासाठी येथे क्लिक करा : Russia-Ukraine War: झेलेन्स्कींच्या होमटाऊनमध्ये रशियाचा धुमाकूळ; लक्ष्मी मित्तल यांच्या कारखान्यावर डागली क्षेपणास्त्रे, 2 ठार
दुसरीकडे, बलुचिस्तानमधील नागरी हक्कांसाठी लढणाऱ्या ‘बलुच व्हॉईस फॉर जस्टिस’ (BVJ) या प्रमुख मानवाधिकार संस्थेने देखील या संपूर्ण प्रकरणावर आक्रमक भूमिका घेतली आहे. बीव्हीजेने या घटनेची आणि लष्करी कारवायांची तात्काळ, स्वतंत्र, पारदर्शक आणि आंतरराष्ट्रीय देखरेखीखाली निष्पक्ष चौकशी करण्याची जोरदार मागणी लावून धरली आहे. संस्थेने आपल्या निवेदनात स्पष्ट केले आहे की, हल्ल्यात आणि लष्करी कारवायांमध्ये ठार झालेल्या तसेच जखमी झालेल्या प्रत्येक नागरिकाची ओळख, नाव आणि संपूर्ण तपशील पाकिस्तान सरकारने तात्काळ सार्वजनिक केला पाहिजे.
बीव्हीजेच्या प्रवक्त्यांनी ठामपणे सांगितले की, या हिंसाचारासाठी आणि निष्पापांच्या मृत्यूसाठी जे कोणी जबाबदार असतील, मग ते सुरक्षा दल असोत किंवा इतर कोणतेही गट, त्यांना कायद्याच्या चौकटीत आणून उत्तरदायी ठरवले पाहिजे. कोणत्याही सार्वभौम राष्ट्राची आणि प्रशासनाची पहिली व मूलभूत जबाबदारी ही आपल्या नागरिकांचे—विशेषतः महिला आणि निष्पाप मुलांचे—रक्षण करणे ही असते. कोणत्याही लष्करी किंवा सुरक्षा कारवाया करताना आंतरराष्ट्रीय मानवतावादी कायदे (International Humanitarian Law) आणि नागरी जीवनाच्या संरक्षणाच्या जागतिक तत्त्वांचे तंतोतंत पालन केले गेलेच पाहिजे. बलुचिस्तानमध्ये सातत्याने होणारे मानवाधिकार उल्लंघन आणि नागरी वस्त्यांवरील हल्ले थांबले नाहीत, तर हे मानवी संकट अधिकच बिकट होईल, असा इशाराही विविध हक्क संघटनांनी दिला आहे.
