Trillion peso March : 'भ्रष्टाचाराचा पूर आणि जनतेचे दु:ख...';नेपाळनंतर आता 'या' देशात होणार लोकशक्तीचा महास्फोट ( फोटो सौजन्य : सोशल मीडिया)
फिलिपिन्समध्ये २१ सप्टेंबरला ‘ट्रिलियन पेसो मार्च’ होणार असून लाखो नागरिक भ्रष्टाचार आणि नेपो बेबीविरोधात रस्त्यावर उतरणार आहेत.
अब्जावधी डॉलर्सचा पूर नियंत्रण निधी भ्रष्टाचारात गेला, त्यामुळे देशाला भीषण पूर आणि रोगांचा फटका बसला.
सोशल मीडियावर राजकारण्यांच्या मुलांच्या ऐषारामी जीवनशैलीविरोधात संताप उसळला असून हा उठाव नेपाळ व इंडोनेशियातील जनचळवळींसारखाच ठरण्याची शक्यता आहे.
philippines Trillion peso March 2025 : नेपाळनंतर आणि इंडोनेशियाच्या पावलावर पाऊल ठेवत आता फिलिपिन्सच्या जनतेचा राग उफाळून आला आहे. राजधानी मनिला रविवार, २१ सप्टेंबर रोजी लाखो लोकांच्या पायऱ्यांनी हादरून जाईल. या लोकआंदोलनाला “ट्रिलियन पेसो मार्च” असे नाव देण्यात आले आहे. कारण केवळ भ्रष्टाचार नाही, तर पूरामुळे उद्ध्वस्त झालेल्या देशात नागरिकांना जाणवलेली असहाय्यता आणि राजकारण्यांच्या ऐषारामी जीवनशैलीविरुद्धचा संताप हे त्यामागचे खरे कारण आहे.
फिलिपिन्समध्ये मागील काही महिन्यांत आलेल्या भीषण पुरामुळे संपूर्ण देश उद्ध्वस्त झाला. राजधानीतील रस्ते नद्यांमध्ये बदलले, लाखो नागरिकांचे दैनंदिन जीवन थांबले, वाहनं वाहून गेली आणि अडकलेल्या लोकांचे हाल झाले. लेप्टोस्पायरोसिससारखे आजार पसरले. या सर्व परिस्थितीने एकच प्रश्न उभा केला “जनतेच्या करांतून भरलेला निधी नेमका कुठे गेला?” सरकारने पुरनियंत्रण प्रकल्पांसाठी अब्जावधी रुपये खर्च केल्याचा दावा केला. परंतु अलीकडील ऑडिट अहवालाने जनतेच्या संशयाला दुजोरा दिला ७० टक्के निधी फसवणुकीत बुडाला, अनेक प्रकल्प केवळ कागदावरच राहिले. धरणे, संरक्षक भिंती किंवा जलनिस्सारण व्यवस्था प्रत्यक्षात उभी राहिलीच नाही.
जागतिक घडामोडी संबंधित बातम्या वाचण्यासाठी येथे क्लिक करा : Putin : कोण सांभाळणार रशियन साम्राज्याची कमान? व्लादिमीर पुतिन यांनी जाहीर केली पुढील उत्तराधिकारी पदासाठीची योजना
ग्रीनपीसच्या अहवालानुसार, २०२३ मध्ये जवळपास १७.६ अब्ज डॉलर्सचा निधी भ्रष्टाचारात गेला. म्हणजेच अंदाजे १.४ लाख कोटी रुपयांचा अपहार. इतका मोठा घोटाळा उघड झाल्यामुळे राष्ट्रपतींचे सहकारी आणि संसदेचे अध्यक्ष मार्टिन रोमुआल्डेझ यांना राजीनामा द्यावा लागला. अनेक खासदार आणि कंत्राटदारांवर लाचखोरी व गैरव्यवहाराचे आरोप झाले.
या आंदोलनाचा खरा ज्वालामुखी सोशल मीडियावर उसळला आहे. फेसबुक, ट्विटर आणि टिकटॉकवर राजकारण्यांना “मगरी” म्हणून दाखवणारे मीम्स, एआयच्या मदतीने बनवलेले व्हिडिओ आणि “लोभी राक्षस” म्हणून त्यांची खिल्ली उडवली जात आहे. जनतेचा रोष विशेषतः नेपो बेबीज म्हणजे राजकारण्यांच्या मुलांविरुद्ध आहे. लक्झरी गाड्या, महागडे कपडे, डिझायनर बॅगा आणि परदेश प्रवास या सर्व फोटोंनी सामान्य नागरिकांचा अपमानच केला आहे. पूरात जीव वाचवण्यासाठी धडपडणाऱ्या जनतेसमोर ही वैभवशाली जीवनशैली अधिक टोचणारी ठरली.
२१ सप्टेंबर ही तारीख निवडण्यात खास कारण आहे. याच दिवशी १९७२ मध्ये तत्कालीन राष्ट्रपती फर्डिनांड मार्कोस यांनी मार्शल लॉ लागू केला होता. त्या हुकूमशाही, भ्रष्टाचार आणि जनआंदोलनाच्या पार्श्वभूमीवर १९८६ मध्ये त्यांचा पाडाव झाला. आज, विडंबना म्हणजे त्यांचे पुत्र फर्डिनांड “बोंगबोंग” मार्कोस ज्युनियर हेच राष्ट्रपती आहेत. त्यामुळे जनतेचा रोष त्यांच्या सरकारवर केंद्रीत झाला आहे.
परिस्थिती नियंत्रणात आणण्यासाठी राष्ट्रपतींनी सर्वोच्च न्यायालयाच्या माजी न्यायाधीशांच्या अध्यक्षतेखाली तीन सदस्यीय आयोगाची नियुक्ती केली आहे. परंतु जनतेला वाटते की ही केवळ “टाईमपास कमिटी” आहे. खऱ्या जबाबदारांना शिक्षा झाली नाही, तर ही चळवळ नेपाळसारखी क्रांती घडवून आणेल, असा नागरिकांचा सूर आहे.
जागतिक घडामोडी संबंधित बातम्या वाचण्यासाठी येथे क्लिक करा : Geopolitics : पाकिस्तान-सौदी जवळीक जर संरक्षण ढाल; तर India-UAE करार भविष्याच्या गुंतवणुकीची वाटचाल
नेपाळ, इंडोनेशिया आणि आता फिलिपिन्स या तिन्ही देशांत लोकांचा आवाज एकाच गोष्टीसाठी उठतो आहे पारदर्शकता, जबाबदारी आणि सन्मानाने जगण्याचा अधिकार. चीनच्या शेजारील या देशात पेटलेली आग केवळ फिलिपिन्सपुरती मर्यादित राहील का, की ती इतर आशियाई देशांतही पसरून सरकारांना हादरवेल, हा प्रश्न आता उपस्थित झाला आहे. फिलिपिन्समध्ये उफाळलेली असंतोषाची ही लाट केवळ भ्रष्टाचाराविरोधी नाही, तर ती जनतेच्या अस्तित्वाच्या लढ्याची कहाणी आहे. पूरात वाहून गेलेल्या घरांचा, रोगाने त्रस्त झालेल्या नागरिकांचा आणि करांतून पैसे भरूनही काहीच न मिळाल्याच्या वेदनेचा हा आवाज आहे. २१ सप्टेंबरच्या ट्रिलियन पेसो मार्चने फिलिपिन्सचा इतिहास नव्याने लिहिण्याची क्षमता आहे. जगाच्या नजरा आता मनिलाकडे लागल्या आहेत.
