रविवार, 25 ऑक्टोबर 2026
Bangladesh : चौकात फाशी की शिरच्छेद? मक्का येथे २ बांगलादेशींच्या फाशीवर ढाकाचा सौदीला ६ प्रश्नांचा झटका ( फोटो सौजन्य : सोशल मीडिया )
सौदी अरेबियात दोन बांगलादेशी (Bangladesh) नागरिकांना दिलेल्या फाशीच्या शिक्षेमुळे आंतरराष्ट्रीय आणि राजनैतिक वर्तुळात प्रचंड खळबळ उडाली आहे. मक्का प्रांतात घडलेल्या या घटनेनंतर सौदी प्रशासनाने दाखवलेल्या गोपनीयतेमुळे बांगलादेश सरकार (ढाका) कमालीचे नाराज झाले आहे. कोणत्याही पूर्वसूचनेशिवाय आणि स्पष्ट गुन्ह्याचा उल्लेख न करता १४ ऑक्टोबर रोजी नझरुल इस्लाम अब्दुल बशीर आणि स्वीटी अख्तर या दोघांना मृत्युदंड देण्यात आला. या अचानक झालेल्या कारवाईमुळे संतप्त झालेल्या बांगलादेश सरकारने आता सौदी अरेबियाला एक औपचारिक राजनैतिक पत्र पाठवून एकूण ६ अतिशय गंभीर प्रश्न विचारले आहेत.
बांगलादेशचे जेद्दाहमधील महावाणिज्यदूत मोहम्मद सखावत हुसेन यांनी १९ ऑक्टोबर रोजी सौदी परराष्ट्र मंत्रालयाच्या मक्का शाखेचे महासंचालक फरीद बिन साद अल-शेहरी यांची भेट घेऊन हे राजनैतिक पत्र सुपूर्द केले. सौदी प्रशासनाने या दोन नागरिकांना नेमक्या कोणत्या आरोपाखाली आणि कशी फाशी दिली, याबद्दल अद्याप कोणतीही स्पष्ट माहिती दिलेली नाही. त्यामुळे बांगलादेश सरकारने सौदीकडे तातडीने अधिकृत उत्तराची आणि कोर्टाच्या निर्णयाची प्रत मागितली आहे.
बांगलादेशच्या महावाणिज्य दूतावासाने पाठवलेल्या राजनैतिक पत्रात सौदी प्रशासनाला उघडे पाडणारे आणि आंतरराष्ट्रीय नियमांवर बोट ठेवणारे ६ प्रश्न उपस्थित केले आहेत:
नझरुल इस्लाम आणि स्वीटी अख्तर यांनी केलेला गुन्हा नेमका कोणता होता? ही घटना नक्की कधी आणि मक्का परिसरातील कोणत्या ठिकाणी घडली?
त्या दोघांविरुद्ध गुन्ह्याची अधिकृत तक्रार कधी नोंदवण्यात आली आणि सौदी पोलिसांनी त्यांना प्रत्यक्ष कधी ताब्यात घेतले?
सौदीच्या संबंधित न्यायालयाकडून या दोन्ही बांगलादेशी नागरिकांविरुद्ध देण्यात आलेल्या अंतिम निकालाची (Judgment) अधिकृत आणि प्रमाणित प्रत बांगलादेश दूतावासाला दिली जावी.
मृत्यूदंडाची अंमलबजावणी नेमकी कशी करण्यात आली? सौदीच्या परंपरेनुसार सार्वजनिक चौकात तलवारीने त्यांचे शिरच्छेद करण्यात आले, की अन्य कोणत्याही पद्धतीने शिक्षा दिली गेली?
जागतिक घडामोडी संबंधित बातम्या वाचण्यासाठी येथे क्लिक करा : Starlink Ukraine: मस्क यांच्या एका निर्णयाने युक्रेन सैन्याची धावपळ; आक्रमक ड्रोन हल्ल्यांवर स्टारलिंकने लावले निर्बंध
शिक्षेच्या अंमलबजावणीनंतर दोन्ही मृतदेह सध्या कुठे ठेवण्यात आले आहेत? ते त्यांच्या कुटुंबीयांकडे बांगलादेशात पाठवले जाणार आहेत की सौदी अरेबियामध्येच दफन केले जाणार आहेत?
तपास आणि न्यायालयीन सुनावणीदरम्यान आरोपींना स्वतःची बाजू मांडण्यासाठी वकील किंवा कोणतीही कायदेशीर मदत पुरवण्यात आली होती का?
सौदी अरेबियाच्या गृह मंत्रालयाने जारी केलेल्या अधिकृत वक्तव्यात या दोन नागरिकांनी मक्का येथील एका मशिदीत ‘अनैतिक कृत्य’ केल्याचा ठपका ठेवला आहे. सौदी कायद्यानुसार, न्यायाधीशांनी आपल्या विवेकाधिकाराचा (Ta’zir – तझीर) वापर करून ही कठोर शिक्षा सुनावली. मात्र, बांगलादेशला सप्टेंबर महिन्यात मिळालेल्या कैद्यांच्या यादीत नझरुलवर माहिती तंत्रज्ञान (सायबर) गुन्ह्याचा आणि स्वीटीवर व्यभिचाराचा (Adultery) आरोप नोंदवला होता.
विशेष म्हणजे, या यादीत कुठेही त्यांना मृत्युदंड सुनावल्याचा किंवा न्यायाधिकरणाचा अंतिम निर्णय झाल्याचा उल्लेख नव्हता. दोन्ही आरोपी सौदीमध्ये स्वच्छता कर्मचारी (Cleaners) म्हणून कार्यरत होते. त्यांच्या कुटुंबीयांनी दिलेल्या माहितीनुसार, कामाच्या ठिकाणी झालेल्या वादातून त्यांना अडकवण्यात आले होते. त्यांच्यात कोणतेही वैवाहिक किंवा अनैतिक संबंध नव्हते, असा दावाही कुटुंबीयांनी केला आहे.
जागतिक घडामोडी संबंधित बातम्या वाचण्यासाठी येथे क्लिक करा : Kim Jong Un: किम जोंग उन अचानक चीनमध्ये! वांग हुनिंग यांच्या भेटीनंतर दक्षिण कोरियात खळबळ; सैन्य हाय अलर्टवर
या घटनेमुळे बांगलादेशच्या परराष्ट्र मंत्रालयावरही देशांतर्गत स्तरावर प्रचंड टीका होत आहे. परराष्ट्र व्यवहार राज्यमंत्री हुमायून कबीर यांनी ही घटना अत्यंत निराशाजनक असल्याचे म्हटले आहे. मात्र, सौदीमध्ये २,४०० हून अधिक बांगलादेशी नागरिक विविध तुरुंगात असताना, आपल्या नागरिकांना कायदेशीर संरक्षण देण्यात बांगलादेश दूतावास अपयशी ठरल्याचा आरोप मानवाधिकार संघटना करत आहेत.
परदेशी भूमीवर आपल्या नागरिकांवर होणाऱ्या अन्यायाविरुद्ध आणि गुप्तपणे दिलेल्या फाशीच्या शिक्षेविरुद्ध ढाकाने घेतलेली ही आक्रमक भूमिका सौदी-बांगलादेश संबंधांमध्ये तणाव निर्माण करू शकते. आता सौदी अरेबिया बांगलादेशच्या या ६ प्रश्नांवर काय अधिकृत खुलासा करतो, याकडे संपूर्ण जगाचे लक्ष लागले आहे.
Ans: बांगलादेशच्या जेद्दाहमधील महावाणिज्य दूतावासाने १९ ऑक्टोबर रोजी पत्राद्वारे सौदी अरेबियाला गुन्ह्याचे स्वरूप, फाशीची पद्धत, मृतदेहांची स्थिती आणि कायदेशीर मदतीबाबत ६ कडक प्रश्न विचारले आहेत.
Ans: सौदी अधिकाऱ्यांनी १४ ऑक्टोबर रोजी मक्का प्रांतात नझरुल इस्लाम आणि स्वीटी अख्तर या दोन बांगलादेशी नागरिकांना पूर्वसूचना न देता फाशी दिली.
Ans: सौदी गृह मंत्रालयानुसार त्यांच्यावर मक्का येथील मशिदीच्या परिसरात अनैतिक कृत्य केल्याचा आरोप होता, ज्याखाली न्यायाधीशांनी तझीर (विवेकाधिकार) अंतर्गत मृत्युदंड सुनावला.
