फोटो सौजन्य - Social Media
आजच्या काळात करिअरसाठी अनेक नवीन पर्याय उपलब्ध झाले आहेत. मात्र, जसजशी नवीन क्षेत्रे निर्माण होत आहेत, तसतसे त्यातील स्पर्धा देखील वाढत आहे. अनेक विद्यार्थ्यांमध्ये स्पोर्ट्स कमेंट्रीबद्दल विशेष आकर्षण आहे. क्रिकेट, फुटबॉल किंवा इतर खेळ टीव्हीवर पाहताना आणि ऐकताना अनेकांना या क्षेत्रात करिअर करण्याची प्रेरणा मिळते. आज विविध भाषांमध्ये स्पोर्ट्स कमेंट्री दिली जाते, त्यामुळे या क्षेत्रातील संधी अधिक वाढल्या आहेत. जर तुम्हालाही स्पोर्ट्स कमेंट्रीमध्ये करिअर करायचे असेल, तर ही माहिती उपयुक्त ठरेल.
सध्या मोठ्या रेडिओ स्टेशन आणि टेलिव्हिजन ब्रॉडकास्टिंग कंपन्यांना कुशल स्पोर्ट्स कमेंटेटर्सची गरज आहे. क्रिकेट, कबड्डी, फुटबॉलसह विविध खेळांचे आयोजन मोठ्या प्रमाणावर केले जाते, त्यामुळे प्रशिक्षित कमेंटेटर्सना चांगली संधी उपलब्ध होते. डिजिटल मीडिया आणि ऑनलाइन स्ट्रीमिंग प्लॅटफॉर्ममुळेही या क्षेत्राची व्याप्ती वाढली आहे.
स्पोर्ट्स कमेंटेटर होण्यासाठी काही आवश्यक गोष्टी लक्षात ठेवणे महत्त्वाचे आहे. सर्वप्रथम, तुम्हाला स्पोर्ट्स जर्नालिझम किंवा ब्रॉडकास्टिंगमधील पदवी घेतली पाहिजे. यासोबतच पूर्णवेळ किंवा अर्धवेळ माध्यम संस्थांसोबत काम करून प्रत्यक्ष अनुभव घेणे गरजेचे आहे. तुम्हाला खेळासंदर्भातील सखोल माहिती असणे आवश्यक आहे, तसेच विविध खेळांची नावे, खेळाडूंच्या कामगिरीविषयी बारकाईने अभ्यास करावा लागेल. स्पोर्ट्स कमेंट्रीसाठी तुमच्या आवाजावर चांगली पकड असली पाहिजे आणि उच्चार स्पष्ट असायला हवेत, जेणेकरून प्रेक्षकांना ऐकताना कोणताही अडथळा जाणवू नये. तसेच, तुमच्या भावना संतुलित ठेवण्याचे कौशल्य विकसित करणे गरजेचे आहे, कारण लाइव्ह कमेंट्रीदरम्यान संतुलन राखणे अत्यंत महत्त्वाचे असते. तुम्हाला भाषांचे ज्ञान असले पाहिजे आणि किमान एका भाषेवर उत्कृष्ट प्रभुत्व असणे आवश्यक आहे.
याशिवाय, तुमच्या बोलण्याची शैली प्रभावी असावी, तसेच तुम्ही स्पष्टपणे आणि प्रवाहीपणे बोलू शकले पाहिजे. या क्षेत्रात यशस्वी होण्यासाठी तुम्ही सतत सराव करणे आवश्यक आहे. विविध माध्यमसंस्थांमध्ये वॉइस ओव्हर करण्याची संधी शोधावी, जेणेकरून तुमच्या कौशल्यात सुधारणा होईल. याशिवाय, तुम्हाला चालू घडामोडी आणि सामान्य ज्ञानाची सतत माहिती ठेवावी लागेल. एकूणच, स्पोर्ट्स कमेंट्री हे एक रोमांचक करिअर असले तरी त्यात यश मिळवण्यासाठी प्रयत्न करावे लागतात. योग्य अभ्यास, सातत्यपूर्ण सराव आणि उत्तम संवादकौशल्य यात महत्त्वाची भूमिका बजावतात. जर तुम्ही या सर्व गोष्टींची योग्य तयारी केली, तर तुम्हीही एक यशस्वी स्पोर्ट्स कमेंटेटर बनू शकता.
