Pune Crime: आधी दांडक्याने बेदम मारहाण अन् नंतर पिस्तुलातून…; पुण्याच्या ‘या’ भागात नेमके घडले तरी काय?

पुणे:  नगर रस्त्यावरील वाडेबोल्हाई परिसरात गुरुवारी रात्री पिस्तुलातून हवेत गोळीबार करण्यात आल्याची घटना गुरुवारी रात्री घडली. गोळीबारापूर्वी आरोपींनी एकाला दांडक्याने बेदम मारहाण देखील केली. याप्रकरणी लोणीकंद पोलिसांनी दोघांना अटक केली. या प्रकरणी गणेश संजय चैाधरी (वय २९), ओंकार अंकुश लांडगे (वय २५, दोघे रा. वाडेबोल्हाई) यांना अटक केली आहे. त्यांच्याबरोबर साथीदारांवर गुन्हा दाखल केला आहे. याबाबत अजित महादेव जाधव (वय २६, रा. जाधव वस्ती, बकोरी) याने लोणीकंद पोलीस ठाण्यात तक्रार दिली आहे. मारहाणीत जुनैद शेख जखमी झाला असून, त्याच्यावर रुग्णालयात उपचार सुरू असल्याची माहिती पोलिसांनी दिली.

पोलिसांच्या माहितीनुसार, आरोपी गणेश चौधरी आणि अजित जाधव यांच्यात वाद झाला होता. त्या वेळी अजितने गणेशच्या कानशिलात लगावली होती. तेव्हापासून गणेश हा अजितवर चिडून होता. वाद मिटविण्यासाठी गणेश आणि अजित मित्रांना घेऊन गुरुवारी (१३ मार्च) नगर रस्त्यावरील वाडेबोल्हाई परिसरात आले. वाडेबोल्हाई मंदिराजवळ रात्री साडेबाराच्या सुमारास अजित आणि गणेश यांच्यात पु्न्हा बाचाबाची झाली. त्या वेळी वाडेबोल्हाई मंदिराजवळून चौघे जण तेथे आले. त्यांनी पिस्तुलातून हवेत गोळीबार केला. गोळीबाराचा आवाज ऐकल्यानंतर दाेन्ही गटातील तरुण पळाले. जाधवचा मित्र जुनैद शेख दुचाकीवर थांबला होता. त्याला दांडके, तसेच लाथाबुक्क्यांनी बेदम मारहाण करण्यात आली.

गोळीबाराची माहिती मिळताच लोणीकंद पोलीस ठाण्याचे वरिष्ठ पोलीस निरीक्षक सर्जेराव कुंभार, सहायक निरीक्षक रवींंद्र गोडसे यांनी घटनास्थळी धाव घेतली. आरोपी गणेश आणि साथीदार ओंकार यांना अटक करण्यात आली आहे. त्यांच्याबरोबर असलेल्या साथीदारांचा शोध घेण्यात येत आहे. पोलिसांनी घटनास्थळावरुन दोन पुंगळ्या जप्त केल्या आहेत, अशी माहिती सहायक निरीक्षक रवींद्र गोडसे यांनी दिली.

पुण्याच्या मेट्रो स्थानकातील आंदोलनाचा सूत्रधार कोण?

मोफत शिक्षण, नोकऱ्यांसह विविध मागण्यांसाठी मेट्रोच्या रुळावर उतरून आंदोलन करणाऱ्या राष्ट्रवादी काँग्रेस शरदचंद्र पवार पक्षाचा निलंबित कार्यकर्ता नरेंद्र पावटेकर, त्याचे वडील ज्ञानेश्वर पावटेकर यांच्यासह नऊ जणांना न्यायालयाने दोन दिवसांची पोलिस कोठडी सुनावली आहे. तर उर्वरित आठ आरोपींच्या पोलिस कोठडीचा हक्क अबाधित ठेवून त्यांची न्यायालयीन कोठडीत रवानगी करण्यात आली आहे.

Pune News: पुण्याच्या मेट्रो स्थानकातील आंदोलनाचा सूत्रधार कोण? पोलिस घेणार शोध; ‘या’ कायद्यांतर्गत गुन्हे दाखल

अतिरिक्त मुख्य न्यायदंडाधिकारी जे. एस. भाटिया यांनी हा आदेश दिला. पुणे मेट्रोच्या पुणे महापालिका स्थानकाजवळच्या रुळावर पेट्रोल घेऊन आंदोलन करणाऱ्यांनी रुळासह वायरीचे नुकसान केले आहे. मेट्रोसारख्या संवेदनशील ठिकाणीच आंदोलन करण्यामागे आंदोलकांचा घातपाताचा हेतू होता का, त्यांनी मेट्रो स्थानकावर येण्यापूर्वी कोणाला फोन, मेसेज केले होते, तसेच या घटनेमागचा सूत्रधार कोण, याबाबत तपास करायचा असल्याचे पोलिसांनी सोमवारी न्यायालयात सांगितले.