टेंभू उपसा सिंचन विभागातील कार्यकारी अभियंता आनंद रामदास काळमेघ (वय 51, रा. सिल्वर ओक बिल्डिंग, सैदापूर कराड, मूळ रा. मार्केट यार्ड, पुणे) व कनिष्ठ अभियंता माधुरी साई देवरे (वय 35, रा. सिल्वर गार्डन अपार्टमेंट, बनवडी फाटा, कराड) अशी लाचलुचपत विभागाने कारवाई केलेल्यांची नावे आहेत. लाचलुचपत विभागाकडून मिळालेल्या माहितीनुसार, ओगलेवाडी येथील टेंभू उपसा सिंचन यांत्रिक विद्युत पथक योजनेला सेक्युरिटी एजन्सीमार्फत सुरक्षा रक्षक पुरविण्याचे काम तक्रारदार करतात. त्याअंतर्गत त्यांनी प्रतिदिन 610रुपयेप्रमाणे तीन सुरक्षारक्षक पुरवले होते. या सुरक्षारक्षकांचे एकूण 5लाख 94हजार 720 रुपये बिल कृष्णा खोरे विकास महामंडळ कार्यालयाला टेंभू कार्यालयाकडून पाठविण्यात आले. दि. 12 नोव्हेंबर रोजी या बिलापैकी 4 लाख 66 हजार 960 रुपये तक्रारदाराच्या खात्यावर जमा झाले. मात्र, हे बिल मंजुरीला पाठवल्याच्या मोबदल्यात बिलाच्या 3 टक्केप्रमाणे कनिष्ठ अभियंता माधुरी देवरे यांनी लाच मागितली होती.
‘लाचलुचपती’ची ‘टेंभू’त कारवाई
19 नोव्हेंबर रोजी पंचांसमक्ष माधुरी देवरे यांनी 17 हजारांच्या लाचेची मागणी केली होती. तसेच कार्यकारी अभियंत्यांनाही भेटण्यास सांगीतले. त्याप्रमाणे 26 नोव्हेंबर रोजी पडताळणी कारवाईवेळी कार्यकारी अभियंता आनंद काळमेघ यांनी तक्रारदाराकडे 30हजार रुपये लाचेची मागणी केली. तडजोडीअंती 25हजार रुपये देण्याचे ठरले. त्यानुसार दि. 28 रोजी सापळा रचण्यात आला. यावेळी आनंद काळमेघ हे 25 हजार रुपये तर माधुरी देवरे या 17 हजार रुपये लाच स्वीकारताना रंगेहाथ आढळल्या. लाचलुचपत प्रतिबंधक विभागाने दोघांनाही ताब्यात घेतले. त्यांच्यावर कराड शहर पोलिस ठाण्यात गुन्हा दाखल केला आहे.
