फोटो सौजन्य - Social Media
मराठी चित्रपटसृष्टीत आशयप्रधान कथांसोबतच उच्च निर्मितीमूल्यांचा दर्जाही सातत्याने वाढताना दिसत आहे. त्यातच मल्टीस्टारर चित्रपटांचा ट्रेंडही सध्या जोरात असून, प्रेक्षकांना एकाच पडद्यावर अनेक दिग्गज कलाकार पाहण्याची संधी मिळत आहे. याच पार्श्वभूमीवर रहस्य आणि थराराने भरलेला ‘सालबर्डी’ हा नवा मराठी चित्रपट १७ एप्रिल रोजी प्रदर्शित होणार आहे.
या चित्रपटात पूजा सावंत, शशांक शेंडे, ओंकार भोजने, भारत गणेशपुरे, अंशुमन विचारे, रोहित कोकाटे, कमलाकर सातपुते, चित्तरंजन गिरी, अनिल नगरकर, माधव अभ्यंकर, प्रवीण डाळिंबकर, अभय गिते, राजेंद्र सातार्डेकर आणि कोमल चौधरी अशी कलाकारांची भक्कम फळी पाहायला मिळणार आहे. दमदार कलाकारांची उपस्थिती हीच या चित्रपटाची मोठी ताकद मानली जात आहे.
‘नेब्यूला फिल्म्स’च्या बॅनरखाली अनिल देवडे पाटील, डॉ. गजानन जाधव आणि राम जाधव यांनी या चित्रपटाची निर्मिती केली आहे. ‘गुल्हर’, ‘बाबो’ आणि ‘पाणीपुरी’सारख्या वेगळ्या धाटणीच्या चित्रपटांनंतर दिग्दर्शक रमेश साहेबराव चौधरी यांनी ‘सालबर्डी’च्या माध्यमातून प्रेक्षकांसाठी एक थरारक अनुभव आणला आहे. चित्रपटाची कथा एका छोट्याशा ‘सालबर्डी’ गावाभोवती फिरते. या गावात घडणाऱ्या विचित्र आणि भीतीदायक घटनांमुळे निर्माण झालेली दहशत आणि त्या मागचे गूढ सत्य उलगडण्याचा प्रवास हा चित्रपटाचा गाभा आहे. भय आणि भ्रम यांच्या छायेत उलगडणारी ही कथा प्रेक्षकांना खिळवून ठेवेल, अशी अपेक्षा व्यक्त केली जात आहे.
तांत्रिक बाबतीतही चित्रपट मजबूत आहे. छायांकन आणि संकलन सिद्धेश संतोष मोरे यांनी केले असून पटकथा व संवाद रोहित शुक्रे यांचे आहेत. गुरु ठाकूर आणि मुकुंद भालेराव यांच्या गीतांना पद्मनाभ गायकवाड यांचे संगीत लाभले आहे, तर पार्श्वसंगीत अमर मोहिले यांनी दिले आहे. अजय गोगावले, जावेद अली आणि आनंदी जोशी यांच्या आवाजाने गाणी अधिक आकर्षक झाली आहेत. नृत्यदिग्दर्शन फुलवा खामकर आणि आशीष पाटील यांनी केले असून, वेशभूषा प्रणिता चिंदगे, रंगभूषा श्रीनिवास मेनूगे आणि कलादिग्दर्शन प्रदीप गुरव यांचे आहे. एकूणच रहस्य, थरार आणि भक्कम कलाकारांचा संगम असलेला ‘सालबर्डी’ प्रेक्षकांना वेगळा सिनेमॅटिक अनुभव देण्यासाठी सज्ज झाला आहे.
