बुधवार, 21 ऑक्टोबर 2026
काँग्रेसच्या काळात विकास संथगतीने (फोटो सौजन्य: सोशल मीडिया)
वडोदरा : भारताने 2014 नंतर 50000 आधुनिक रेल्वे डबे बांधले. मागील काँग्रेस सरकारला 10 वर्षांत 50000 शौचालयेसुद्धा बांधता आली नाहीत, असा आरोप पंतप्रधान नरेंद्र मोदी यांनी करत देशातील मागील काँग्रेस-प्रणित सरकारवर विकासकामांच्या संथ गतीवरून निशाणा साधला. डेडिकेटेड फ्रेट कॉरिडॉरचा ट्रक चालकांवर होणाऱ्या परिणामाबद्दल आता संतप्त काका प्रश्न उपस्थित करतील, असेही ते म्हणाले.
गुजरातच्या वडोदरा येथे 35000 कोटी रुपयांच्या प्रकल्पांचे उद्घाटन आणि पायाभरणी केल्यानंतर एका जाहीरसभेत ते बोलत होते. पंतप्रधान मोदींनी डेडिकेटेड फ्रेट कॉरिडॉर (पश्चिम) च्या तीन प्रमुख विभागांचे उद्घाटन केले. हा कॉरिडॉर नवी मुंबईतील जवाहरलाल नेहरू बंदराला उत्तर प्रदेशातील दादरीशी जोडतो. या विभागांच्या उद्घाटनाने हा प्रकल्प पूर्ण झाला आहे. डेडिकेटेड फ्रेट कॉरिडॉर हे वेगाने विकसित होणाऱ्या भारताची जीवनरेखा आहेत. हे आधुनिक मालवाहतूक जाळे भारतातील बदलांचा वेग वाढवत आहे. पूर्वी प्रवासी आणि मालगाड्यांना एकाच रुळावरून धावावे लागत असे, ज्यामुळे प्रवासी आणि मालवाहतूक दोन्ही मंदावत असे, परंतु डेडिकेटेड फ्रेट कॉरिडॉरने ही परिस्थिती बदलली आहे.
दरम्यान, पंतप्रधान नरेंद्र मोदी यांनी मंगळवारी काँग्रेस नेते राहुल गांधी यांच्या ‘छात्रों की गुंज’ उपक्रमावर टीका केली. तरुण पिढी सत्याच्या बाजूने उभी राहील आणि खोटेपणाच्या प्रतिध्वनीने दिशाभूल होणार नाही, तरुणांना कृत्रिम बुद्धिमत्ता क्षेत्रात प्राविण्य मिळवण्याचे आवाहनही केले. तुम्हाला सर्वत्र असे लोक आढळतील जे ‘खोटेपणाच्या प्रतिध्वनीने’ तुमची दिशाभूल करण्याचा प्रयत्न करतील, पण आजची तरुण पिढी सत्याच्या बाजूने उभी राहील.
सुमारे १,७८० कोटी रुपयांच्या तीन राष्ट्रीय महामार्ग प्रकल्पांची पायाभरणी होणार आहे. NH-48 वरील कामरेज-चलथान विभागाचे सहापदरीकरण, वडोदरा-सूरत मार्गावर तापी आणि नर्मदा नद्यांवरील प्रमुख पुलांसह अतिरिक्त पायाभूत सुविधा आणि NH-53 वरील अभवा, मिंधोला व खजोद जंक्शनवरील ग्रेड-सेपरेटेड स्ट्रक्चर्सचा यात समावेश आहे. कंदारी चौकडी आणि लुवारा पाटिया येथील सहापदरी उड्डाणपुलांचे उद्घाटनही होणार आहे.
