पुरीच्या जगन्नाथ मंदिरावर दहशतवादी हल्ल्याची धमकी, भाविकांमध्ये घबराट, पोलीस अलर्ट मोडवर (फोटो सौजन्य-X)
Puri Jagannath Temple Threat News in Marathi : पुरीच्या जगन्नाथ मंदिरावर दहशतवादी हल्ल्याची धमकी मिळाली आहे. पोलिसांच्या म्हणण्यानुसार, माँ बुधी ठाकुरानी मंदिराच्या भिंतीवर ओडिया भाषेत लिहिलेले दोन धमकीचे पोस्टर आढळले आहेत. पोलिसांनी या प्रकरणाचा तपास सुरू केला आहे.
भिंतीवर सापडलेल्या पोस्टरवर ‘दहशतवादी श्रीमंदिर पाडतील. मला फोन करा, अन्यथा विनाश होईल’ अशी धमकी लिहिलेली होती. पुरीच्या एका रहिवाशाने सांगितले की मंदिराच्या भिंतीवर अनेक फोन नंबर लिहिलेले आहेत. यासोबतच पंतप्रधान मोदी, दिल्ली असे शब्दही लिहिलेले आहेत.
घटनास्थळी भेट देणारे पुरीचे एसपी पिनाक मिश्रा म्हणाले की, आम्ही या प्रकरणाची दखल घेतली आहे आणि ते खूप गांभीर्याने घेत आहोत. आम्हाला काही माहिती मिळाली आहे आणि अशा धमक्या देणाऱ्यांना अटक करण्यासाठी पोलीस पथके तयार केली जात आहेत. पोलीस परिसरात बसवलेल्या सीसीटीव्ही फुटेजची तपासणी करत असल्याचे एसपी म्हणाले आणि असे दिसते की ही धमकी मंगळवारी रात्री लिहिली गेली होती. ते म्हणाले की, पोलीस या धमकीमागील हेतू शोधण्याचा प्रयत्न करत आहेत. या घटनेनंतर अनेक ठिकाणी सीसीटीव्ही बसवण्यात आले आहेत. सुरक्षा रक्षकही तैनात करण्यात आले आहेत.
पोलिसांची कारवाई सुरु
या प्रकरणात पोलिसांनी एका व्यक्तीला ताब्यात घेतले आहे, जो ‘मानसिकदृष्ट्या अस्थिर’ असल्याचे म्हटले जात आहे. हे चिंताजनक संदेश ओडिया भाषेत लिहिलेले होते आणि मंदिराभोवती उच्च सुरक्षा क्षेत्र असलेल्या परिक्रमा मार्गाच्या बालीशाही प्रवेशद्वाराजवळ असलेल्या बुधी माँ ठाकुरानी मंदिराच्या भिंतींवर आढळले.
घटनेनंतर पुरीचे एसपी पिनाकी मिश्रा यांनी पत्रकारांना सांगितले की, ‘आज सकाळी आम्हाला सोशल मीडिया आणि इतर स्रोतांकडून माहिती मिळाली की काहीतरी लिहिले गेले आहे. तपासात असे आढळून आले की मंदिराला धोका निर्माण करणाऱ्या चुकीच्या गोष्टी त्यात लिहिण्यात आल्या आहेत. आमची विशेष टीम या प्रकरणाची चौकशी करत आहे आणि आम्ही ते गांभीर्याने घेतले आहे. आम्ही सीसीटीव्ही फुटेजची तपासणी करत आहोत. पोलिस पथकाला काही सुगावाही सापडला आहे.’
पुरीचे १२ व्या शतकातील जगन्नाथ मंदिर, जे हिंदूंच्या चार धामांपैकी एक मानले जाते. ओडिशातील पुरी या किनारी शहरात असलेले हे जगप्रसिद्ध मंदिर भगवान विष्णूच्या अवतार श्रीकृष्णाला समर्पित आहे. दरवर्षी लाखो भाविक जगभरातून येथे दर्शनासाठी येतात.
