तमाशा (Tamasha) कलेला सुवर्णयुग दाखवणाऱ्या शाहीर पठ्ठे बापूराव यांच्या नावाचा विसर महाराष्ट्राला कधीच पडू शकत नाही. तमाशानं झपाटलेली असामी असं शाहीर पठ्ठे बापूराव (Shahir Patthe Bapurao) यांच वर्णन केलं तर ते चुकीचं ठरणार नाही. आजचा पैसा उद्या पाहायचा नाही आजची लावणी (Lavani) उद्या गायची नाही या तत्वाशी एकनिष्ठ असणाऱ्या शाहीर पठ्ठे बापूराव यांनी स्वत:चं काव्य व पहाडी आवाज या जोरावर तमाशाला नवं वळण दिलं. त्यांनी आपल्या हयातीत दोन लाखांहून अधिक लावण्या लिहिलेल्या आहेत. लावण्यांचं विद्यापीठ असलेल्या या शाहीराची सांगीतिक यशोगाथा (Movie On The Life Of Patthe Bapurao) आता रुपेरी पडद्यावर दिसणार आहे.
[read_also content=”प्रत्येक विद्यार्थ्याचे लसीकरण होणे गरजेचे, आदित्य ठाकरे यांचे प्रतिपादन https://www.navarashtra.com/mumbai/kokan/mumbai/aaditya-thackeray-opinion-about-vaccination-to-students-nrsr-217835.html”]
दिग्दर्शक मिलिंद सकपाळ यांनी या चित्रपटाचं शिवधनुष्य उचललं आहे. प्रा. चंद्रकुमार नलगे यांच्या ‘महाराष्ट्राचे शिल्पकार पठ्ठे बापूराव’ आणि ‘पठ्ठे बापूरावांच्या शोधात’ या पुस्तकांवर आधारित हा चित्रपट असणार आहे. चित्रपटाची कथा-पटकथा राहुल डोरले यांची आहे. गीतकार गुरु ठाकूर यांच्या लेखनीतून गीतं शब्दबद्ध केली जाणार आहेत. छायांकन केको नाकाहारा यांचं आहे. प्रोडक्शन डिझायनर संतोष फुटाणे तर मेकअप अँड हेअर डिझायनर विक्रम गायकवाड आहेत. लवकरच कलाकारांची घोषणा करण्यात येणार आहे. शाहीर पठ्ठे बापूराव यांचा हा चित्रपट रसिकांसाठी लोककलावंतांसाठी एक अमूल्य भेट असेल हे नक्की!
