डोळे फडफडतायत? : बऱ्याच वेळा आपले डोळे फडफडत असतात त्यामुळे आपण त्याचा अंदाज शुभ-अशुभ या नजरेने पाहतो. डोळे फडफडण्याबाबत अनेक तर्कवितर्क आणि बऱ्याच प्रकारचे गैरसमज आहेत जे आपल्या डोक्यामध्ये असतात. बरेच जण याबद्दल सांगतात की, पुरुषाचा उजवा डोळा फडफडणं चांगलं आहे आणि स्त्रीचा डावा डोळा फडफडणं चांगलं आहे. खरंतर, डोळे फडफडणे ही सामान्य समस्या मानली जाते. मात्र, जर तुमचे डोळे वारंवार फडफडत असतील आणि तुम्हाला त्याचा त्रास होत असेल तर त्याकडे लक्ष देणं गरजेचं आहे. यामागील मुख्य कारण तुमच्या शरीरात मॅग्नेशियमची कमतरता देखील असू शकते.
हाडे मजबूत आणि स्नायू मजबूत ठेवण्यासाठी मॅग्नेशियम हे अत्यंत महत्त्वाचे खनिज आहे. मॅग्नेशियम देखील हृदय निरोगी ठेवण्यासाठी एक अतिशय महत्वाचा घटक आहे. शरीरात मॅग्नेशियमच्या कमतरतेमुळे डोळे फडफडण्या बरोबरच इतरही अनेक समस्या उद्भवतात. त्याच्या लक्षणांकडे दुर्लक्ष करू नये. आज आम्ही तुम्हाला याचसंदर्भात सांगणार आहोत. खरंतर, मॅग्नेशियम शरीराच्या स्नायूंना आराम देण्यासाठी देखील उपयुक्त आहे आणि जेव्हा या खनिजाची कमतरता असते तेव्हा स्नायूंचा ताण वाढू शकतो. त्यामुळे डोळे फडफडण्याची समस्या उद्भवू शकते.
शरीरात आवश्यकतेनुसार मॅग्नेशियमचा पुरवठा झाला नाही तर डोळा फडफडण्या बरोबरच वारंवार डोकेदुखीचा त्रास सहन करावा लागतो. अशी लक्षणे दिसल्यास वेळीच डॉक्टरांचा योग्य सल्ला घेणे आवश्यक आहे. जरी काम केल्यानंतर थकवा जाणवणं ही सामान्य बाब असली तरी, मॅग्नेशियमच्या कमतरतेमुळे तुम्हाला खूप अशक्तपणा आणि थकवा जाणवू शकतो. याशिवाय भूक लागण्याच्या पद्धतीतही बदल होतो. यामुळे उलट्या होतात, भूक लागत नाही यांसारख्या समस्या निर्माण होतात. स्नायूंना निरोगी ठेवण्यासाठी खनिजे आवश्यक असतात, म्हणून जेव्हा शरीरात मॅग्नेशियमची कमतरता असते तेव्हा पायांमध्ये जळजळ होते आणि पाय मुरगळतो. रात्री झोपताना पाय दुखत असतील तर त्यामागील कारण शरीरात मॅग्नेशियमची कमतरता असू शकते. मॅग्नेशियम आतड्यांमधील पाण्याचे प्रमाण वाढवण्यास मदत करते. यामुळे तुमची पचनक्रिया सुरळीत होते. जर तुम्हाला वारंवार बद्धकोष्ठतेचा त्रास होत असेल तर ते मॅग्नेशियमच्या कमतरतेचे लक्षण असू शकते.
