अहमदाबाद दुर्घटनेत अकोल्याची ऐश्वर्या थोडक्यात बचावली (फोटो- सोशल मीडिया)
अहमदाबाद: काल अहमदाबाद येथे भयानक दुर्घटना घडली. अहमदाबादवरून लंडनला जाणारे विमान मेघानीनगर येथील रहिवाशी भागात क्रॅश झाले. हे विमान बीजे मेडिकल कॉलेजच्या हॉस्टेलवर कोसळले. यामध्ये हॉस्टेलमध्ये शिकणारे काही डॉक्टर जखमी झाले असल्याचे समोर आले आहे. तर काही जणांना आपला जीव गमवावा लागला असे समजते आहे. त्यातच या घटनेत महाराष्ट्राच्या अकोला जिल्हयातील ऐश्वर्या थोडक्यात बचावली आहे. तिने तिथे घडलेला प्रसंग सांगितला आहे.
गुजरातमधील विमान अपघातात अकोल्याची ऐश्वर्या थोडक्यात बचावलीय. विमान कोसळलेल्या मेडिकल कॉलेजमध्ये ती द्वितीय वर्षाला शिकत आहे. तर पाचव्या मजल्यावरून धुरामधून वाट काढत स्वत:भोवती ब्लँकेट लपेटून तिने स्वतःचा जीव वाचवला आहे. गुजरातमधील अहमदाबाद येथे बुधवारी झालेल्या भीषण विमान अपघातात अकोल्याची मुलगी ऐश्वर्या तोष्णीवाल थोडक्यात बचावली आहे. तर या अपघाताच्या वेळी ती हॉस्टेलच्या दुसऱ्या इमारतीच्या पाचव्या मजल्यावर झोपलेली होती. अचानक मोठा आवाज झाला आणि सर्वत्र धुराचे लोट पसरले. आणि त्या परिस्थितीतही ऐश्वर्याने धीर न सोडता धुराच्या गर्दीतून वाट काढत स्वतःचा जीव वाचवला आहे.
तर ऐश्वर्या गुजरात कॅन्सर रिसर्च इन्स्टिट्यूट मेडिकल कॉलेज, अहमदाबाद येथे डीएम अँकोपॅथोलॉजीच्या दुसऱ्या वर्षात शिक्षण घेत आहे. तर ती आपल्या आजोबांचा वाढदिवस साजरा करून अकोल्याहून अहमदाबादला परतली होती. तर झोपेत असताना ती अचानक मोठ्या आवाजाने जागी आली. आणि उठून पाहिलं तर सर्वत्र धुराच धूर होता. परिस्थितीचं गांभीर्य लक्षात येताच तिने स्वतःला ब्लँकेटमध्ये लपेटलं आणि अंधार व धुराच्या गर्दीतून मार्ग शोधत पाचव्या मजल्यावरून खाली उतरून स्वतःचा जीव वाचवला. या दरम्यान तिच्या चेहऱ्यावर, हातावर आणि पायावर भाजले असल्याने जखमा झाल्या आहेत.
‘त्या’ १० मिनिटांमुळे सुखरूप, भूमीने सांगितली कहाणी
भूमी चौहान या अहमदाबादवरून लंडनला जाणाऱ्या फ्लाईटमधून प्रवास करणार होत्या. मात्र त्यांना एअरपोर्टवर 10 मिनिटे उशीर झाला आणि त्या या मोठ्या घटनेतून सुखरूप वाचल्या आहेत. भूमी चौहान या एअर इंडियाच्या विमानातून अहमदाबादवरुण लंडनला जाणार होत्या. मात्र ती विमानाच्या वेळेत पोहोचू शकली नाही.
याबाबत भूमी चौहान यांनी एका वृत्तसंस्थेला दिलेल्या माहितीनुसार, मला वाटेत ट्रॅफिक लागल्याने विमानतळावर पोचण्यास उशीर झाला. त्यामुळे मला विमानात चढू देण्यात आले नाही.” मात्र आता जीव वाचल्याने तिने देवाचे आभारच मानले आहेत. मी सुरक्षित आहे मात्र घडलेला अपघात अत्यंत हृदयद्रावक आहे.
