शुक्रवार, 16 ऑक्टोबर 2026
(Photo - X)
मुंबई : जातनिहाय जनगणना आणि ओबीसी आरक्षणाच्या मुद्द्यावरून काँग्रेसने पुन्हा एकदा आक्रमक भूमिका मांडली आहे. काँग्रेसच्या टिळक भवन येथील मुख्यालयात ओबीसी कार्यकर्ता प्रशिक्षण शिबिर आणि ‘मंडल विरुद्ध मनुवाद’ या पुस्तकाचा प्रकाशन कार्यक्रम पार पडला. यावेळी काँग्रेस नेत्यांनी जातनिहाय जनगणना, सामाजिक प्रतिनिधित्व आणि आरक्षणाच्या मुद्द्यांवरून आपली भूमिका स्पष्ट केली. (Congress on Caste Census)
काँग्रेसचे प्रभारी डॉ. सिरिवेल्ला प्रसाद यांनी जातनिहाय जनगणनेचा मुद्दा पुढे करत प्रत्येक समाजाला त्याच्या लोकसंख्येच्या प्रमाणात प्रतिनिधित्व मिळायला हवं, असं मत मांडलं. राहुल गांधी यांनी जातनिहाय जनगणनेचा मुद्दा सातत्याने पुढे आणला आणि त्यानंतर केंद्र सरकारने याबाबत निर्णय जाहीर केला, असा दावा त्यांनी केला.
डॉ. सिरिवेल्ला प्रसाद यांनी जातीव्यवस्थेमुळे समाजात विविध जातींमध्ये संघर्ष निर्माण झाल्याचं सांगितलं. ओबीसी समाजाला सामाजिक व्यवस्थेत दुय्यम स्थान देण्यात आल्याचा आरोप करत या व्यवस्थेत बदल होण्याची गरज असल्याचं त्यांनी म्हटलं.
प्रत्येक समाजाची नेमकी लोकसंख्या किती आहे, याची माहिती समोर आल्यानंतर त्या प्रमाणात प्रतिनिधित्व मिळायला हवं, अशी भूमिका त्यांनी मांडली. यासाठी जातनिहाय जनगणना महत्त्वाची असल्याचं त्यांनी सांगितलं.
काँग्रेस प्रदेशाध्यक्ष हर्षवर्धन सपकाळ यांनी महाराष्ट्रातील आरक्षणाच्या मागण्यांवरून राज्य सरकारवर टीका केली. आरक्षणासाठी ५० टक्क्यांची मर्यादा वाढवणे आणि जातनिहाय जनगणना करणे गरजेचं असल्याचं त्यांनी सांगितलं.
महाराष्ट्रात विविध समाजांकडून आरक्षणाच्या मागणीसाठी आंदोलनं सुरू आहेत. अशा परिस्थितीत मराठा आणि ओबीसी समाजामध्ये संघर्ष निर्माण होत असल्याचा आरोप सपकाळ यांनी केला. यासाठी त्यांनी राज्य सरकारच्या धोरणांवर टीका केली.
विधानमंडळ काँग्रेस पक्षाचे नेते विजय वडेट्टीवार यांनी ओबीसी समाजाच्या आरक्षणाच्या मुद्द्यावर भाष्य केलं. राहुल गांधी यांनी ओबीसींच्या हक्कांसाठी आवाज उठवल्याचा दावा करत त्यांनी जातनिहाय जनगणनेच्या मुद्द्याचा उल्लेख केला.
मंडल आयोगाने ओबीसी समाजासाठी २७ टक्के आरक्षणाची शिफारस केली होती. हे आरक्षण सामाजिक आणि शैक्षणिक मागासलेपणाच्या आधारे तसेच सरकारी नोकऱ्यांमध्ये प्रतिनिधित्वासाठी महत्त्वाचं असल्याचं वडेट्टीवार यांनी सांगितलं.
ओबीसी विभागाचे प्रदेशाध्यक्ष प्रा. यशपाल भिंगे यांनी मंडल आयोगाचे माजी अध्यक्ष बी. पी. मंडल यांच्या योगदानाचा उल्लेख केला. मंडल आयोगाने आकडेवारीच्या आधारे ओबीसी समाजासाठी २७ टक्के आरक्षणाची शिफारस केल्याचं त्यांनी सांगितलं.
ओबीसी समाजाने केवळ मतदान करणारा घटक न राहता नेतृत्व करणारा समाज बनलं पाहिजे, अशी भूमिका भिंगे यांनी मांडली. यासाठी ‘हर एक ओबीसी, बनेगा काँग्रेसी’ हा संकल्प करण्यात आल्याचं त्यांनी सांगितलं.
‘मंडल विरुद्ध मनुवाद’ हे पुस्तक सर्वसामान्य काँग्रेस कार्यकर्त्यांना या विषयाची माहिती सहज समजावी, या उद्देशाने लिहिल्याचंही प्रा. भिंगे यांनी स्पष्ट केलं.
