मंगळवेढ्यात पाच जागांसाठी लढत ; बाजार समिती निवडणुकीसाठी ९ उमेदवार रिंगणात

मंगळवेढा : मंगळवेढा कृषी उत्पन्न बाजार समितीसाठी अर्ज माघार घेण्याच्या अखेरच्या दिवशी जिल्हा मध्यवर्ती बँकेचे माजी उपाध्यक्ष बबनराव आवताडे व आमदार समधान आवताडे यांच्या गटाच्या १३ जागा बिनविरोध झाल्या आहेत. दरम्यान ५ जागांसाठी ९ उमेदवार निवडणूक रिंगणात उभे आहेत.
मंगळवेढा कृषी उत्पन्न बाजार समितीवर  जिल्हा मध्यवर्ती बँकेचे माजी उपाध्यक्ष बबनराव आवताडे गटाची सत्ता होती. १८ जगांसाठी १४४ अर्ज दाखल झाले होते. पैकी १० बाद झाले होते. दिनांक २० अखेर ११२ जणांनी अर्ज माघारी घेतले आहेत.

सोसायटी मतदार संघातून बिनविरोध झालेले सदस्य-विष्णुपंत अवताडे, सिद्धेश्वर अवताडे, सुशील अवताडे, नानासो चोपडे, मनोज चव्हाण, प्रकाश जुंदळे,धनंजय पाटील.

ओबीसी प्रवर्गातून बिराप्पा माळी, एनटीप्रवर्गातून सहदेव लवटे आदी बिनविरोध निवडून आले आहेत.
आर्थिक दुर्बल गटातून आनंद हर्षराज बिले, व्यापारी मतदार संघातून बबनराव आवताडे, बसवंत माळी, हमाल तोलार मतदार संघातून प्रवीण कोंडूभैरी बिनविरोध निवडून आले आहेत.

सोसायटी महिला मतदारसंघातून दोन जागेसाठी तीन अर्ज राहिले असून सविता यादव, कविता बेदरे, संगीता कट्टे यांच्यात लढत होणार आहे. ग्रामपंचायत सर्वसाधारण गटात दोन जागेसाठी तीन अर्ज राहिले असून जगन्नाथ रेवे, गंगाधर काकणकी, सोमनाथ माळी अशी लढत होत आहे. मागासवर्गीय गटातून एका जागेसाठी तीन अर्ज राहिले असून पांडुरंग कांबळे हौसाप्पा शेवडे, वैभव सोनवले अशी लढत होत आहे.  राष्ट्रवादीच्या महिला अध्यक्षा संगीता कट्टे, भाजपचे पदाधिकारी असलेले हौसापा शेवडे यांनी ही आपला अर्ज कायम ठेवला आहे. विरोधी गटाचे केवळ चार अर्ज राहिल्याने ही निवडणूक लागली आहे.

बबनराव, समाधान आवताडे एकत्र

येथील समविचारी आघाडीने आपले सर्व अर्ज माघारी घेतल्याचे जाहीर केले असले तरी त्यांच्या समर्थकांनी तीन ठिकाणी आपले अर्ज कायम ठेवल्याने ५ जागांसाठी निवडणूक अखेर लागली आहे. कृषी उत्पन्न बाजार समिती निवडणुकीसाठी जिल्हा मध्यवर्ती बँकेचे माजी उपाध्यक्ष बबनराव अवताडे व आमदार समाधान आवताडे दोघे एकत्र आले आहेत.

सोमनाथ माळी यांचा अर्ज कायम
अर्ज माघारीच्या अखेरच्या दिवशी समविचारी आघाडीने नेते व उमेदवारांची बैठक घेत सर्व आर्ज माघारी घेण्याचे ठरविले. बहुतेक सर्व अर्ज माघारी घेण्यात आले, परंतु समविचारीला मानणारे राष्ट्रवादीचे माजी शहराध्यक्ष व नगराध्यक्ष सोमनाथ माळी यांनी मात्र आपला अर्ज कायम ठेवला आहे.