Maharashtra Breaking News Today 2026: औषध निरीक्षक भरती पेपरफुटी प्रकरणी अधिकारी आणि आरोपींवर धडक कारवाई

27 Aug 2026 05:58 PM (IST)

सुप्रिया सुळेंबाबतचं ‘ते’ वक्तव्य विजय वडेट्टीवारांनी घेतलं मागे

काँग्रेस नेते विजय वडेट्टीवार यांनी राष्ट्रवादी काँग्रेस शरद पवार पक्षाच्या खासदार सुप्रिया सुळे यांच्याबाबत केलेल्या ओबीसी प्रमाणपत्राच्या दाव्यावर आता स्पष्टीकरण दिले आहे. सुप्रिया सुळे यांच्याकडे ओबीसी प्रमाणपत्र असल्याचा उल्लेख आपल्याकडून अनावधानाने झाल्याचे सांगत वडेट्टीवार यांनी खेद व्यक्त केला आहे. मात्र, ओबीसी प्रमाणपत्र घेऊन सत्तेचा लाभ घेणाऱ्या मराठा नेत्यांबाबतची आपली भूमिका कायम असल्याचे त्यांनी स्पष्ट केले.

27 Aug 2026 05:45 PM (IST)

सौरव, आता तुझी वेळ येणार!’; अभिजीत दीपकेंचा सहकाऱ्याला गमतीशीर इशारा

कॉकरोच जनता पार्टीच्या अभूतपूर्व आंदोलनानंतर सीजेपीचे संस्थापक अभिजीत दीपके सातत्याने चर्चेत आहेत. जंतरमंतरवरील आंदोलन आणि त्यानंतर आता सुरू करण्यात आलेली स्कूल ठिक करो मोहिमेमुळे देशभरात अभिजीत दिपकेंसह त्यांच्या इतर दोन सहकारी आशुतोष रांका आणि सौरव दास चर्चेचा विषय बनले आहेत. अभिजीत दिपके सध्या स्कूल ठिक करो मोहिमेअंतर्गत ते जिल्हा परिषदेच्या शाळेत जे विद्यार्थी शिकतात त्यांना उदभवणाऱ्या समस्यांकडे सरकारचे लक्ष वेधताना दिसत आहेत. या सर्व घडामोडींच्या पार्श्वभूमीवर नुकतीच अभिजीत दिपके यांनी एका वृत्त वाहिनीला एक मुलाखत दिली.

27 Aug 2026 05:40 PM (IST)

रक्षाबंधनला बँका बंद की सुरू?

रक्षाबंधनाचा सण शुक्रवार, 28 ऑगस्ट 2026 रोजी साजरा केला जाणार आहे. या सणाच्या दिवशी बँकेशी संबंधित महत्त्वाचे काम करण्याचे नियोजन असेल तर सर्वात आधी प्रश्न पडतो तो म्हणजे बँक सुरू असेल की बंद? कारण बँकांच्या सुट्ट्या देशभरात एकसारख्या नसतात. राज्य आणि स्थानिक सणांनुसार त्यामध्ये फरक असू शकतो.

दिलेल्या RBI हॉलिडे कॅलेंडरच्या माहितीनुसार, रक्षाबंधनानिमित्त 28 ऑगस्ट रोजी महाराष्ट्रातील बँक शाखांना सुट्टी नसणार आहे.

27 Aug 2026 05:30 PM (IST)

20 हजार रिक्षा-टॅक्सी चालकांचा गौरव; एकनाथ शिंदेंच्या हस्ते प्रमाणपत्र वितरण

महाराष्ट्र सरकारकडून व्यावसायिक वाहन चालक (रिक्षा, टॅक्सी आणि अॅप- आधारित कॅब) आणि सर्व माध्यमाच्या शाळांसाठी राज्यभरात मराठी भाषेची सक्ती लागू केली आहे. याचदरम्यान “मराठीवर सक्ती करणारी नव्हे, तर मराठीवर भक्ती करणारी गर्दी आज येथे पाहायला मिळत आहे. जन्मभूमी उत्तर प्रदेश, बिहार किंवा अन्य राज्य असले तरी कर्मभूमी महाराष्ट्र आहे. त्यामुळे महाराष्ट्राच्या मराठी भाषेवर प्रेम करा,” असे आवाहन उपमुख्यमंत्री एकनाथ शिंदे यांनी केले. बोरिवली येथील कोरा केंद्र ग्राउंडवर २० हजार हिंदी भाषिक रिक्षा व टॅक्सी चालकांना मराठी व्यवहार भाषा प्रशिक्षणाचे उत्तीर्ण प्रमाणपत्र वितरण कार्यक्रमात ते बोलत होते.

27 Aug 2026 05:15 PM (IST)

भारताला लयं रडवलं! ट्रॉफी भारताची, पण हवा श्रीलंकेचीच; कोलंबो टेस्ट ड्रॉ

भारत विरुद्ध श्रीलंका यांच्यात नुकतीच दोन सामन्यांची टेस्ट सिरिज खेळवण्यात आली होती. त्यातील दुसरा सामना आज संपला. आज शेवटच्या दिवशी हा सामना कोणता संघ जिंकणार अशी उत्सुकता असतानाचा श्रीलंकेच्या संयमी फलंदाजीमुळे हा सामना ड्रॉ झाला आहे. दुसरा कसोटी सामना ड्रॉ झाला असून, भारतीय संघाने ही सिरिज आपल्या खिशात घातली आहे.

27 Aug 2026 04:57 PM (IST)

‘अमित साटम यांना भुंकायलाच ठेवलंय, तेच काम उत्तम करत आहेत,’ अमित ठाकरे यांची जहरी टीका

महाराष्ट्र नवनिर्माण विद्यार्थी सेनेचे महाराष्ट्र अध्यक्ष अमित ठाकरे (Amit Thackeray) सध्या नागपूर दौऱ्यावर आहेत. पाचपावली परिसरातील सिंधू महाविद्यालयाला भेट देत त्यांनी विद्यार्थ्यांशी संवाद साधला. तसेच मनसे विद्यार्थी सेनेच्या सभासद नोंदणी मोहिमेची पाहणी केली. यानंतर झालेल्या पत्रकार परिषदेत त्यांनी विविध राजकीय आणि विद्यार्थी प्रश्नांवर भाष्य केले. यावेळी भाजपचे मुंबई अध्यक्ष अमित साटम यांनी राज ठाकरे यांच्या मराठी भाषेसंदर्भातील भूमिकेवर केलेल्या टीकेबाबत अमित ठाकरे यांना प्रश्न विचारण्यात आला. राज ठाकरे यांनी आपल्या नातवाला बालमोहन विद्यालयात प्रवेश द्यावा आणि त्यानंतर मराठीच्या मुद्द्यावर बोलावे, असे आव्हान साटम यांनी दिले होते. वाचा सविस्तर...

27 Aug 2026 04:47 PM (IST)

Nepal Flood: नेपाळच्या पुरात भारतीयांची चिंता वाढली! 288 जणांशी संपर्क तुटला, MEA ची मोठी माहिती

Nepal Flood: नेपाळ-तिबेट सीमावर्ती भागात आलेल्या विनाशकारी पुरानंतर 288 भारतीय नागरिकांशी अद्याप संपर्क होऊ शकलेला नसल्याची माहिती परराष्ट्र मंत्रालयाने (MEA) दिली आहे. चीनच्या नियंत्रणाखालील तिबेटमध्ये मानसरोवर यात्रेशी संबंधित सुमारे 200 भारतीय अडकले असून त्यांनी भारत सरकारकडे मदत मागितल्याची माहितीही MEA ने दिली आहे.

27 Aug 2026 04:37 PM (IST)

LPG Connection New Rule: कधीपासून मिळणार एलपजी सिलेंडरचे नवे कनेक्शन, सरकारने दिली अपडेट

LPG Connection New Rule: जर तुमच्या घरी एलपीजी कनेक्शन असेल, तर एका महत्त्वाच्या अपडेटबद्दल नक्की जाणून घ्या. अलीकडील मध्य-पूर्वेतील तणावामुळे, सरकारने एलपीजी पुरवठा आणि वितरणासंदर्भात अनेक बदल केले आहेत. अमेरिका आणि इराण यांच्यात सुरू असलेल्या युद्धामुळे, देशभरात नवीन घरगुती एलपीजी कनेक्शन देण्यावर तात्पुरती बंदी घालण्यात आली आहे. तेल कंपन्या सध्या नवीन कनेक्शनसाठी बुकिंग स्वीकारत नाहीत, परंतु विद्यमान ग्राहकांना गॅस सिलिंडरचा पुरवठा सुनिश्चित करत आहेत. वाचा सविस्तर...

27 Aug 2026 04:17 PM (IST)

Delhi Crime: मुस्कान हत्या प्रकरणात मोठे वळण; CCTV फुटेजमुळे तपासाला वेग

दिल्लीमधील टिळकनगर परिसरातील मॉडेल मुस्कान हिची हत्या करण्यात आली होती. त्या हत्येच्या प्रकरणातील सीसीटीव्ही फुटेज समोर आले आहे. त्या फुटेज मधील आरोपी इम्रान भाड्याच्या घरातुन पळ काढताना दिसत आहे. पोलिसांच्या म्हण्यानुसार आरोपी सध्या फरार असून, त्याच्या शोधासाठी अनेक पथके तैनात करण्यात आली आहेत. मुस्कानला घरात घुसून चाकूने भोसकून हत्या करण्यात आली होती.  मुस्कान ही टिळकनगरमधील न्यू महावीरनगर भागात भाड्याच्या घरात राहत होती. वाचा सविस्तर...

27 Aug 2026 04:07 PM (IST)

गूल, गूल दांडी गूल! Sonal Dinusha पडला टीम इंडियाला भारी, बॉलर्स रडकुंडीला

सध्या कोलंबो येथे भारत विरुद्ध श्रीलंका यांच्यात टेस्ट सिरिजमधला दुसरा सामना सुरू आहे. आज या कसोटी सामन्याचा शेवटचा दिवस आहे. मात्र हा सामना ड्रॉ होण्याची शक्यता वाढली आहे. श्रीलंकेच्या फलंदाजांनी भारताला चांगलेच रडवले आहे. सोनल दीनुशाने शानदार शतक करत भारताला रडकुंडीस आणले आहे. त्यामुळे भारताला फलंदाजीची संधी मिळणार की नाही याकडे आता लक्ष लागले आहे.

27 Aug 2026 03:01 PM (IST)

पार्किंगच्या वादातून महिलेला नंबरप्लेटने मारहाण

भेकराईनगरमधील हॉस्पिटलमध्ये पार्किंगवरून झालेल्या वादात महिलेच्या डोक्यात दुचाकीची नंबरप्लेट मारण्यात आली. आरोपींनी तिची दुचाकी ढकलून नंबरप्लेटचेही नुकसान केले. याप्रकरणी बबिता ऊर्फ सपना संतोष सानप (वय ३८), साक्षी संतोष सानप (वय १९) आणि एका अनोळखी व्यक्तीवर फुरसुंगी पोलिसांत गुन्हा दाखल करण्यात आला आहे. याबाबत पूजा सुदर्शन म्हांगरे (वय ३५, रा. श्री शांती सोसायटी, वडकी) यांनी फिर्याद दिली आहे. माहितीनुसार, दि. २४ ऑगस्ट रोजी सायंकाळी सव्वासहा वाजता भेकराईनगरमधील ओम हॉस्पिटल येथे पार्किंगच्या कारणावरून वाद झाला. आरोपींनी म्हांगरे यांना धक्काबुक्की करून खाली ढकलले. त्यांच्या होंडा अॅक्टिव्हाच्या नंबरप्लेटचे नुकसान केले. त्यानंतर साक्षीने नंबरप्लेट काढून म्हांगरे यांच्या डोक्यात मारली. सोबतच्या अनोळखी व्यक्तीने शिवीगाळ केली.

27 Aug 2026 02:50 PM (IST)

रिक्षात बसलेल्या तरुणांवर लोखंडी हत्यार

हडपसरमध्ये रस्त्याच्या कडेला उभ्या रिक्षात गप्पा मारत बसलेल्या तरुणांवर तिघांनी लोखंडी हत्यार आणि सिमेंटच्या गट्टूने हल्ला केला. हल्ल्यात एका तरुणाच्या दोन्ही गुडघ्यांना, तर भांडण सोडविण्यास गेलेल्या त्याच्या मित्राच्या मनगटाला दुखापत झाली. याप्रकरणी गणेश सिद्धराम गायकवाड (रा. गोसावी वस्ती, हडपसर), व्यंकटेश अनिल पवार (रा. पंचशीलनगर, कोरेगाव पार्क) आणि अली मुदस्सर शेख (रा. गोसावी वस्ती, हडपसर) यांच्यावर वानवडी पोलिसांत गुन्हा दाखल करण्यात आला आहे. याबाबत रमाकांत अशोक साळवे (वय ३१, रा. जुनी म्हाडा कॉलनी, हडपसर) यांनी तक्रार दिली आहे. माहितीनुसार, दि. २५ ऑगस्ट रोजी मध्यरात्री सव्वाबारा वाजता साळवे हे दोन मित्रांसह जुनी म्हाडा कॉलनीजवळ रिक्षात बसले होते. आरोपी दुचाकीवरून तेथे आले. त्यांनी साळवे यांचा मित्र नयन याला ‘आमच्याकडे काय पाहतोस,’ असे म्हणत वाद घातला. गायकवाडने लोखंडी हत्याराने हल्ला केला. पवार आणि शेख यांनी रस्त्यावरील सिमेंटचे गट्टू उचलून नयनच्या दोन्ही गुडघ्यांवर मारले. भांडण सोडविण्यास गेलेल्या साळवे यांच्या मनगटावरही लोखंडी हत्याराने प्रहार करण्यात आला.

27 Aug 2026 02:37 PM (IST)

वाद सोडविण्यास गेलेल्या तरुणावर लोखंडी हत्याराने वार

कॅम्प भागात दुकानदारासोबत भांडण करू नका, असे सांगणाऱ्या तरुणाच्या उजव्या डोळ्याजवळ लोखंडी हत्याराने वार करण्यात आला. आरोपीच्या साथीदारांनीही तरुणाला शिवीगाळ करून मारहाण केली. याप्रकरणी आकाश कांबळे ऊर्फ चाबी (रा. कोहिनूर हॉटेलजवळ, कॅम्प), आरिफ शेख (रा. गुलटेकडी) आणि त्यांच्या दोन साथीदारांवर लष्कर पोलिसांत गुन्हा दाखल करण्यात आला आहे. याबाबत अविनाश राजेश पवार (वय ३२, रा. न्यू मोदीखाना, कॅम्प) यांनी तक्रार दिली आहे. माहितीनुसार, दि. २४ ऑगस्ट रोजी रात्री साडेनऊ वाजता न्यू मोदीखाना कॅम्पमधील गणपती मंदिराजवळ आरोपी व त्यांच्या साथीदारांचे एका दुकानदाराशी भांडण सुरू होते. पवार यांनी आकाश कांबळेला भांडण करू नकोस व तेथून निघून जा, असे सांगितले. त्याचा राग आल्याने आरोपीने पवार यांच्या उजव्या डोळ्याजवळ लोखंडी हत्याराने प्रहार केला. इतर साथीदारांनी त्यांना हाताने मारहाण केली.

27 Aug 2026 02:25 PM (IST)

कारचा आरसा लागल्यावरून मारहाण

पुणे रेल्वेस्थानकाजवळ कारचा आरसा लागल्यावरून चौघांनी कारचालक आणि त्याच्या भाच्याला लाकडी काठी आणि हाताने मारहाण केली. हल्ल्यात दोघांना दुखापत झाली. याप्रकरणी आदेश जगदीश कागडे (वय २७), सफराज अख्तर खान (वय २४), रोहितसिंग तोमर (वय २५) आणि गोरख, सर्व रा. येरवडा परिसर, यांच्यावर बंडगार्डन पोलिसांत गुन्हा नोंद करण्यात आला आहे. याबाबत सागर रामदास आव्हाळे (वय ३३, रा. रुक्मिणी मंदिराजवळ, आव्हाळवाडी, वाघोली) यांनी तक्रार दिली आहे. माहितीनुसार, दि. २५ ऑगस्ट रोजी सकाळी नऊ वाजता आव्हाळे मोटारीने पुणे रेल्वेस्थानक ते अलंकार चौक रस्त्यावरून जात होते. त्यांच्या कारचा आरसा एका व्यक्तीला लागला. त्यावरून कागडे आणि खान यांनी आव्हाळे यांना लाकडी काठीने मारहाण केली. त्यांचा भाचा वेदांत हंबीर यालाही मारहाण करण्यात आली. उर्वरित आरोपींनी शिवीगाळ करीत हाताने मारहाण केली.

27 Aug 2026 02:14 PM (IST)

पुण्यात 'या' तारखेला तंत्रज्ञान अन् नवकल्पना परिषद

अत्याधुनिक तंत्रज्ञान, संशोधन, उद्योग आणि नवकल्पनांचा संगम घडवून आणणाऱ्या ‘AWTIS 2026’ तंत्रज्ञान व नवकल्पना परिषदेचे आयोजन १८ ,१९ व २० सप्टेंबर २०२६ रोजी करण्यात आले आहे. पुण्यातील जेडब्ल्यू मॅरियट हॉटेलमध्ये होणाऱ्या या तीन दिवसीय परिषदेत 'आर्यन्स'च्या विविध अत्याधुनिक तंत्रज्ञान क्षेत्रांतील प्रकल्प, उत्पादने आणि नवकल्पनांचे सादरीकरण करण्यात येणार आहे. यानिमित्ताने विविध विषयांवर मान्यवरांची व्याख्यानेही होणार आहेत. या परिषदेला ‘आर्यन्स ग्रुप ऑफ कंपनीज’चे संचालक अजय जगताप, संजय शेंडगे, कामेश मोदी, हायड्रोजन विभाग प्रमुख डॉ. विकास शिंदे, सौरऊर्जा विभागप्रमुख भूषण देशमुख आदी उपस्थित राहणार आहेत.

27 Aug 2026 01:55 PM (IST)

आयआयटी रोपरचे शक्तिशाली एआय सांगणार पिकांना पाणी अन् खत देण्याची अचूक वेळ

हवामानातील अचानक होणारे बदल, अनियंत्रित पाऊस, दुष्काळ आणि पिकांवर पडणारा कीड-रोगांचा प्रादुर्भाव ही आजघडीला भारतातील सर्वच शेतकऱ्यांसमोरील सर्वात मोठी आव्हाने बनली आहेत. अनेकदा हवामानाचा अचूक अंदाज न मिळाल्याने किंवा खत-पाण्याचे योग्य नियोजन न जमल्यामुळे शेतकऱ्यांचे मोठे आर्थिक नुकसान होते. आतापर्यंत शेती ही प्रामुख्याने अनुभवावर आणि अंदाजावर आधारित केली जात होती. मात्र, आता हाच पारंपरिक अंदाज मागे टाकून शेतीला आधुनिक तंत्रज्ञानाची जोड देण्यासाठी आयआयटी रोपर (IIT Ropar) पुढे आले आहे. आयआयटी रोपर भारत सरकारच्या सहकार्याने ANNAM.AI नावाचा एक क्रांतिकारी आर्टिफिशियल इंटेलिजन्स (AI) प्लॅटफॉर्म विकसित करत आहे.

27 Aug 2026 01:45 PM (IST)

‘9:05 ला मेसेज, 9:14 ला संपर्क तुटला’; ईशा फाऊंडेशनचे 80 कैलास यात्रेकरू बेपत्ता

नेपाळ आणि चीनच्या तिबेट सीमेवर (Nepal Flash Flood) निसर्गाच्या भीषण प्रलयाने हाहाकार माजवला आहे. कैलास मानसरोवर यात्रेवरून परतणाऱ्या ईशा फाऊंडेशनच्या (Isha Foundation) ८० सदस्यांचा एक संपूर्ण गट या विनाशकारी पुरात अचानक अडकला असून ते सर्वजण बेपत्ता झाले आहेत. आध्यात्मिक गुरू आणि ईशा फाऊंडेशनचे संस्थापक सद्गुरू जग्गी वासुदेव यांनी या अत्यंत हृदयद्रावक दुर्घटनेवर तीव्र दुःख व्यक्त केले आहे. त्यांनी परिस्थिती अत्यंत गंभीर आणि चिंताजनक असल्याचे सांगत, घटनास्थळी पोहोचून बचावकार्यात मदत करण्यासाठी भारतीय, चिनी आणि नेपाळ प्रशासनाकडे तातडीने परवानग्या मागितल्या आहेत.

27 Aug 2026 01:35 PM (IST)

‘अन्न सुरक्षा नियम सर्वांसाठी समान, भेसळीवर तडजोड नाही’; तुकाराम मुंढेंनी दिला स्पष्ट इशारा

अन्नाच्या गुणवत्तेला जात, धर्म, व्यवसाय किंवा ठिकाणाची सीमा नसते. त्यामुळे गणेशोत्सवातील महाप्रसाद असो, रस्त्यावरील खाद्यपदार्थ असो किंवा पंचतारांकित हॉटेलमधील जेवण, अन्न सुरक्षा नियम सर्वांसाठी समान आहेत. अन्नातील भेसळीबाबत कोणतीही तडजोड केली जाणार नाही, असा स्पष्ट संदेश अन्न व औषध प्रशासनाचे आयुक्त तुकाराम मुंढे यांनी दिला.

27 Aug 2026 01:30 PM (IST)

सुट्या खाद्यतेलाच्या विक्रीवरील एफडीएची बंदी उठवली

महाराष्ट्रातील पारंपरिक तेल व्यापारी, किराणा व्यावसायिक आणि सर्वसामान्य ग्राहकांसाठी अत्यंत महत्त्वाची बातमी समोर आली आहे. अन्न व औषध प्रशासनाने (Maharashtra FDA) नुकताच सुट्या खाद्यतेलाच्या आणि चरबीच्या विक्रीवर घातलेला कडक बंदीचा आदेश मागे घेण्याची तयारी दर्शवली असून, या संदर्भात नवीन मानक कार्यपद्धती (Standard Operating Procedure – SOP) लागू केली जाणार आहे. मुख्यमंत्री देवेंद्र फडणवीस यांनी या प्रकरणात थेट हस्तक्षेप करत अन्न सुरक्षेशी तडजोड न करता लहान व्यापाऱ्यांचे हित जपणारा “मध्यम मार्ग” काढण्याचे निर्देश प्रशासनाला दिले आहेत.

27 Aug 2026 01:25 PM (IST)

भाजप प्रवेशासाठी निघालेल्या ठाकरे गटाच्या नगरसेवकांचा यू-टर्न

धाराशिवच्या राजकारणातून एक मोठी खळबळजनक बातमी समोर आली आहे. उद्धव ठाकरे गटाचे काही नगरसेवक पक्षांतर करणार होते. या नगरसेवकांना आपल्या पक्षात घेण्यासाठी भाजप आणि शिंदे गटात मोठी चढाओढ सुरू होती. हे नगरसेवक भाजपमध्ये प्रवेश करण्याच्या उद्देशाने मुंबईच्या दिशेने निघालेही होते. पण अचानक हे नगरसेवक थेट ठाण्यात दाखल झाले आणि त्यांनी उपमुख्यमंत्री एकनाथ शिंदे यांच्या शिवसेनेत प्रवेश केला. त्यामुळे भाजपमध्ये प्रवेश करण्याच्या उद्देशाने निघालेले हे नगरसेवक अचानक शिंदेंच्या गोटात दाखल झाल्याने राजकीय वर्तुळात उलटसुलट चर्चा सुरू झाल्या आहेत.

27 Aug 2026 01:15 PM (IST)

हत्येच्या 2 तास आधीच ‘मर्डर’चा उल्लेख; गायक अंकित बालियानची शेवटची पोस्ट व्हायरल

उत्तर प्रदेशातील शामली येथे हरियाणवी गायक अंकित बालियान यांची गोळ्या झाडून हत्या करण्यात आल्याची धक्कादायक घटना समोर आली आहे. 26 ऑगस्टच्या संध्याकाळी जिममधून बाहेर पडत असताना अज्ञात हल्लेखोरांनी त्यांच्यावर गोळीबार केला. गंभीर जखमी अवस्थेत त्यांना रुग्णालयात नेण्यात आले, मात्र डॉक्टरांनी उपचारादरम्यान त्यांना मृत घोषित केले. पोलिसांनी या प्रकरणाचा तपास सुरू केला असून परिसरातील सीसीटीव्ही फुटेज तपासले जात आहे.

27 Aug 2026 01:05 PM (IST)

साखर-कांद्याच्या किमतींना आळा घालण्यासाठी सरकारचा ‘नवा प्लॅन’

मागील काही दिवसांमध्ये खाद्य पदार्थांच्या किमतींमध्ये झपाट्याने वाढ झाल्याचे दिसून आले आहे. सणासुदीच्या दिवसांमध्ये खाद्यपदार्थांच्या किंमती वाढल्यामुळे सर्वसामान्यांच्या चिंतेमध्ये वाढ झाली आहे. वाढत्या महागाईचा फटका सर्वसामान्य जनतेला मोठ्या प्रमाणावर बसत आहे. अचानक वाढलेल्या खाद्यपदार्थांच्या किमतींमुळे सर्वसामान्य नागरिकांचे बजेट विस्खलित झाले आहे. दरवाढ केवळ साखरेपुरती मर्यादित नसून गहू, तेल आणि डाळींच्या दरातसुद्धा मोठ्या प्रमाणावर वाढ झाली आहे. भारतीय रिझर्व्ह बँकेच्या अहवालानुसार, १ ऑगस्ट ते २१ ऑगस्ट दरम्यान केवळ कांद्याच्या दरात ११ टक्क्यांनी वाढ झाली आहे.

27 Aug 2026 01:02 PM (IST)

स्वाइन फ्लू, डेंग्यूसह तापाच्या रुग्णांत वाढ

वातावरणातील बदल आणि पावसामुळे पुणे आणि पिंपरी-चिंचवड शहरात साथीच्या आजारांचा प्रादुर्भाव वाढला आहे. स्वाइन फ्लू, डेंग्यू तसेच तापाच्या रुग्णसंख्येत लक्षणीय वाढ झाली असून, ऑगस्ट महिन्यात स्वाइन फ्लूने विशेषतः वेग घेतला आहे. त्यामुळे दोन्ही महापालिकांच्या आरोग्य विभागांनी नागरिकांना सतर्क राहण्याचे आवाहन केले आहे.

27 Aug 2026 12:48 PM (IST)

मृतांच्या वारसांना ५० लाख रुपये अर्थसाह्य द्या - काशिनाथ नखाते.

27 Aug 2026 12:36 PM (IST)

पिंपरी-चिंचवड़ पोलिसांकडून भावी डॉक्टरसह दोघांना अटक

शेअर मार्केटमध्ये गुंतवणुकीवर भरघोस परतावा मिळवून देण्याचे आमिष दाखवून एका ज्येष्ठ नागरिकाची तब्बल ८६ लाख रुपयांची फसवणूक करणाऱ्या टोळीचा पिंपरी-चिंचवड़ सायबर पोलिसांनी पर्दाफाश केला आहे. या प्रकरणी येरवडा मध्यवर्ती कारागृहातील ओळखीतून सायबर गुन्ह्यांसाठी बँक खाती पुरवणाऱ्या दोन अट्टल आरोपींना अटक करण्यात आली आहे. यामध्ये बी.ए.एम.एस. डॉक्टरच्या शेवटच्या वर्षात शिकणाऱ्या विद्यार्थ्याचा समावेश असून, आरोपींकडून अनेक धक्कादायक खुलासे झाले आहेत. तेजस ज्ञानोबा लोखंडे (२४, मरकळगाव, पुणे), अविनाश ज्ञानोबा बाकलीकर (२८, लातूर) अशी अटक केलेल्या अरोपींची नावे आहेत.

27 Aug 2026 12:24 PM (IST)

बीएसएनएलच्या भूमिगत डक्टमध्ये दोन तरुणांचा गुदमरून मृत्यू

बीएसएनएलच्या भूमिगत इन्स्पेक्शन डक्टमध्ये उतरलेल्या दोन तरुणांचा गुदमरून मृत्यू झाल्याची धक्कादायक घटना गुरुवारी मध्यरात्री घडली. लोकमान्य हॉस्पिटलशेजारी, निर्मल विला बंगल्यासमोर घडलेल्या या दुर्घटनेने परिसरात एकच खळबळ उडाली आहे. विशेष म्हणजे, याच ठिकाणी वर्षभरापूर्वी अशाच प्रकारच्या दुर्घटनेत तिघांचा मृत्यू झाला होता. त्यामुळे भूमिगत डक्टमधील सुरक्षेचा प्रश्न पुन्हा ऐरणीवर आला आहे. लोकमान्य हॉस्पिटलकडून भेळ चौकाकडे जाणाऱ्या रस्त्यावरील बीएसएनएलच्या इन्स्पेक्शन डक्टमध्ये काही कामानिमित्त दोन तरुण उतरले होते. मात्र, डक्टमध्ये उतरल्यानंतर त्यांना श्वास घेण्यास त्रास झाला असावा. काही वेळातच दोघांचाही मृत्यू झाल्याची प्राथमिक माहिती पोलिसांना मिळाली. मनोज बाबुराव शिंदे (वय २६, रा. नाशिक जेल रोड, मूळ रा. सिद्धेश्वर, ता. औंढा, जि. हिंगोली) आणि अमोल अशोक शिंदे (वय २०, मूळ रा. सिद्धेश्वर, ता. औंढा, जि. हिंगोली) अशी मृतांची नावे आहेत.

27 Aug 2026 12:12 PM (IST)

विषारी दारू प्रकरणात आतापर्यंतची सर्वात मोठी कारवाई

पुणे तसेच पिंपरी चिंचवड भागात घडलेल्या विषारी दारू मृत्यूकांडातील मुख्य आरोपी बाळू लोंढे याला पुणे ग्रामीण पोलिसांच्या ऊरळी कांचन पोलिसांनी थरारकरित्या पाठलाग करून जेरबंद केले आहे. ऊरळी कांचन भागात ही कारवाई करण्यात आली आहे. पोलिसांपासून वाचण्यासाठी बाळू लोंढे हा फरार काळात आपला लूक बदलून वावरत होता. नेहमी दाढी-मिश्या वाढवून तसेच कपाळावर टिळा लावून वावरणारा बाळू आता दाढी काढून अन् मळकट कपडे घालून वावरत होता.

27 Aug 2026 11:55 AM (IST)

Tukaram Mundhe FDA Anganwadi: अंगणवाड्यांमधील पोषण आहार FDAच्या रडारवर 

Tukaram Mundhe FDA Anganwadi:  अंगणवाड्यांमध्ये लहान मुलांना मिळणाऱ्या आहाराच्या गुणवत्तेवरून आणि स्वच्छतेवरून अन्न व औषध प्रशासन (FDA) ॲक्शन मोडमध्ये आले आहे. एका अंगणवाडी सेविकेने निकृष्ट पोषण आहाराबाबत सवाल उपस्थित केल्यानंतर एफडीए आयुक्त तुकाराम मुंढे यांनी अंगणवाड्यांमधील शालेय पोषण आहाराची आणि तेथील स्वच्छतेची थेट पाहणी व तपासणी करण्याचे निर्देश दिले आहेत. त्याचप्रमाणे आगामी गणेशोत्सवाच्या पार्श्वभूमीवर, भाविकांना मिळणाऱ्या महाप्रसादाची गुणवत्ता आणि सुरक्षितता कायम राहावी यासाठी एफडीएची पथके महाप्रसादावरही विशेष लक्ष ठेवणार आहेत.

27 Aug 2026 11:41 AM (IST)

8th Pay Commission Salary Hike: केंद्रीय कर्मचाऱ्यांच्या पगारात नेमकी किती वाढ होणार? काय सांगताय अंदाज?

8th Pay Commission Salary Hike:  केंद्रातील १ कोटींहून अधिक कर्मचारी आणि पेन्शनधारकांचे लक्ष सध्या आठव्या वेतन आयोगाकडे (8th Pay Commission) लागले आहे. केंद्राच्या निर्णयावरच राज्य सरकारी कर्मचाऱ्यांच्या वेतनवाढीचे गणितही अवलंबून असल्याने या आयोगाच्या शिफारशी अत्यंत महत्त्वाच्या मानल्या जात आहेत.

आठवा वेतन आयोग लागू झाल्यानंतर कर्मचाऱ्यांच्या मूळ पगारात (Basic Pay) आणि फिटमेंट फॅक्टरमध्ये (Fitment Factor) मोठी वाढ होण्याची शक्यता वर्तवली जात आहे. ७ व्या वेतन आयोगात २.५७ फिटमेंट फॅक्टर देण्यात आला होता, तर ८ व्या वेतन आयोगात तो २.८६ ते ३.६८ च्या दरम्यान राहू शकतो असा अंदाज आहे. त्यामुळे कर्मचाऱ्यांच्या मूळ पगारात किमान २५ ते ३५ टक्क्यांपर्यंत घसघशीत वाढ होण्याची शक्यता तज्ज्ञांकडून व्यक्त केली जात आहे.

27 Aug 2026 11:20 AM (IST)

Dog Crime: कुटुंबीयांच्या जुन्यावादातुन 2 मुक्या जीवांचा बळी

Chatrapati Sambhajinagar : छत्रपती संभाजीनगर मध्ये खळबळजनक प्रकार घडला आहे. दोन नातेवाईकांच्या जुन्यावादातुन हा प्रकार घडल्याचे समोर आले असुन या घटनेने परिसरात चिंताजनक वातावरण निर्माण झाले आहे. मिळालेला माहीतीनुसार, छत्रपती संभाजीनगरच्या नारळीबाग परीसरातील राहणाऱ्या लोखंडे कुटुंबासोबत हा प्रकार घडला. या भागात राहणाऱ्या लोखंडे कुटुंबीयाकडे दोन श्वानांची पिल्ली होती. पण अज्ञात व्यक्तीने जुन्या वादातुन  दोन श्वानांच्या पिल्लांची हत्या केली.  वाचा सविस्तर- 

27 Aug 2026 11:10 AM (IST)

The Traitors 2: रिया चक्रवर्तीसह 5 स्पर्धक शो मधून बाहेर

The Traitors 2: ॲमेझॉन प्राइम व्हिडिओचा उत्कंठावर्धक आणि बुद्धीला चालना देणाऱ्या खेळांनी भरलेला रिॲलिटी शो ‘द ट्रेटर्स २’ जसजसा पुढे सरकत आहे, तसतशी उत्कंठा शिगेला पोहोचली आहे. नुकतेच प्रदर्शित झालेल्या नवीन भागांनी प्रेक्षक आणि स्पर्धक दोघांनाही थक्क केले आहे. फसवणूक आणि रणनीतीच्या या खेळाने केवळ एक-दोन नव्हे, तर एकाच वेळी पाच स्पर्धकांना बाहेर काढले आहे. श्वेता तिवारीच्या मर्डरपासून ते निरपराधांच्या चुकीच्या निर्णयांपर्यंत, या आठवड्याच्या शोमध्ये असे सर्व काही पाहायला मिळाले, ज्यामुळे खेळाची दिशाच पूर्णपणे बदलली.

27 Aug 2026 11:02 AM (IST)

पियुष गोयल यांचा जपान दौरा यशस्वी

भारत आणि जपान (India – Japan) यांच्यातील आर्थिक संबंध आणि द्विपक्षीय व्यापार एका नव्या सुवर्णकाळात प्रवेश करत आहेत. टोकियो दौऱ्यावर असलेले भारताचे वाणिज्य आणि उद्योग मंत्री पियुष गोयल यांनी भारत-जपान आर्थिक भागीदारीबाबत अत्यंत महत्त्वाचे आणि सकारात्मक संकेत दिले आहेत. पुढील काही वर्षांत भारतातील जपानी कंपन्यांची संख्या दुप्पट होऊन जवळपास ३,००० पर्यंत पोहोचेल, असा विश्वास त्यांनी व्यक्त केला आहे. अनेक मोठ्या जपानी कंपन्या भारतात गुंतवणूक करण्यास उत्सुक असून, ज्या क्षेत्रांमध्ये भारताकडे आधुनिक तंत्रज्ञानाचा अभाव आहे, तिथे जपानी कंपन्या तंत्रज्ञान हस्तांतरणाद्वारे (Technology Transfer) भारताला सहकार्य करतील.