काय आहे आजच्या ठळक घडामोडी
20 Apr 2026 01:02 PM (IST)
भाजपाने आणलेले महिला आरक्षण विधेयक प्रत्यक्षात महिलांच्या हितासाठी नसून, लोकसभेचे मतदारसंघ स्वतःला पूरक कसे ठरतील, यासाठी रचलेले एक राजकीय षडयंत्र आहे, असा खळबळजनक आरोप शिवसेना ठाकरे गटाचे नेते आणि माजी खासदार विनायक राऊत यांनी केला आहे. रत्नागिरी येथे प्रसारमाध्यमांशी संवाद साधताना त्यांनी महिला आरक्षण, शेळके अपघात प्रकरण आणि राज्यातील वाढत्या ड्रग्जच्या विळख्यावरून सत्ताधारी महायुती सरकारवर जोरदार टीकास्त्र सोडले.
20 Apr 2026 12:48 PM (IST)
गेल्या अनेक वर्षांपासून बंद असलेली ‘स्वीकृत सदस्य’ (नामित सदस्य) नियुक्ती प्रक्रिया पुन्हा सुरू करण्याच्या विधेयकावर राज्यपालांनी स्वाक्षरी केली असून, यासंदर्भात अधिकृत अध्यादेशही जारी करण्यात आला आहे. राज्यपालांच्या या निर्णयामुळे आता ग्रामीण राजकारणातील अनुभवी कार्यकर्त्यांना ‘बॅकडोअर एन्ट्री’ मिळण्याचा मार्ग मोकळा झाला असून, इच्छुकांमध्ये उत्साहाचे वातावरण आहे. पुणे जिल्हा परिषदेत एकूण ७ स्वीकृत सदस्यांची नियुक्ती होण्याची शक्यता असून, यातील बहुतांश जागा राष्ट्रवादी काँग्रेसच्या पदरात पडण्याची चिन्हे आहेत. या निर्णयामुळे पुणे जिल्हा परिषदेत लवकरच ७ नवीन सदस्यांची वर्णी लागणार असून, राजकीय वर्तुळात आता कोणाची वर्णी लागणार याची चर्चा रंगू लागली आहे.
20 Apr 2026 12:36 PM (IST)
एक मोठी खळबळजनक माहिती समोर आली आहे. पुण्यात पॉस (POS) मशीनवरील नोंद आणि गोदामातील प्रत्यक्ष साठा यामध्ये मोठ्या प्रमाणात तफावत आढळली आहे. यामुळे पुणे (Pune) जिल्ह्यातील १५ कृषी सेवा केंद्रांचे परवाने जिल्हा अधीक्षक कृषी विभागाने निलंबित केले आहेत. खरीप हंगामाच्या तोंडावर करण्यात आलेल्या या धडक कारवाईमुळे खत विक्रेत्यांमध्ये मोठी खळबळ उडाली आहे.
20 Apr 2026 12:12 PM (IST)
उन्हाळी सुट्ट्यांचा आनंद लुटण्यासाठी बाहेर पडणाऱ्या प्रवाशांना व सुट्टीमध्ये आजोळी मामाच्या गावाला जाणाऱ्या मुलांना एसटीच्या १० टक्के हंगामी भाडेवाढचा आर्थिक भुर्दंड बसणार आहे. याची अंमलबजावणी सुरू झालेली असल्याने प्रवासी पालकांच्या खिशाला कात्री लागणार आहे. विद्यार्थ्यांच्या परीक्षा संपल्यानंतर मोठ्या प्रमाणावर पालक सहलींचे आयोजन करतात. उन्हाळ्याच्या दिवसात एसटी बसला होणारी गर्दी लक्षात घेऊन उत्पन्न वाढवण्याचे उद्दिष्ट महामंडळाने ठेवले आहे.
20 Apr 2026 12:00 PM (IST)
येवला येथील पैठणी हातमाग विणकरांच्या प्रलंबित मागण्यांवर अखेर केंद्र व राज्य सरकारने सकारात्मक दखल घेत मोठा दिलासा दिला आहे. अनेक दिवसांपासून प्रलंबित असलेला “उत्सव भत्ता” मंजूर करण्यात आला असून तो थेट विणकरांच्या बँक खात्यात जमा झाला आहे.
20 Apr 2026 11:50 AM (IST)
भिवंडी तालुक्यातील कोन गावात परिसरात असलेल्या एका टिंबर मार्टमध्ये अचानक भीषण आग लागली. आगीमुळे परिसरात घबराट पसरली आणि काही क्षणातच संपूर्ण लाकडाचे गोदाम आगीच्या भक्ष्यस्थानी आले आहे. घटनेची माहिती मिळताच, कल्याण आणि भिवंडी महानगरपालिकेची अनेक अग्निशमन दलाची वाहने घटनास्थळी दाखल झाली. अथक प्रयत्नांनंतर अग्निशमन दलाच्या जवानांनी आगीवर नियंत्रण मिळवले आणि ती आग आजूबाजूच्या परिसरात पसरण्यापासून रोखली.
20 Apr 2026 11:40 AM (IST)
ऊस पिक , नारळाचे झाड , आंब्याचे झाड व इतर ठिकाणी पडली वीज. सलग चार ठिकाणी विजा पडल्याने नागरिकात भीतीचे वातावरण. विजा पडल्या मात्र सुदैवाने कुठल्याही प्रकारची जीवितहानी नाही...
20 Apr 2026 11:40 AM (IST)
सांगली सह जिल्ह्यामध्ये गेल्या काही दिवसात तापमान 41 अंशापर्यंत पोहोचले होते. सांगलीकरांची उन्हाने अंगाची काहीली होत असतानाच सायंकाळी साडेपाच वाजण्याच्या सुमारास गारपिटीसह अवकाळी पावसाने अक्षरशः जोडपून काढले. उन्हाच्या कडाक्यात पाऊस पडल्याने हवेत गारवा निर्माण झाला होता यामुळे सांगलीकरांना दिलासा मिळाला. आज दुपारपासूनच उन्हाचा कडाका वाढला होता मात्र सायंकाळी साडेपाच वाजण्याच्या सुमारास अचानक ढग दाटून आले. काही क्षणातच अवकाळी पावसाने सांगली शहरासह जिल्ह्यातील काही भागाला अक्षरशः जोडपून काढले. सुमारे पाऊण तास पडलेल्या पावसामुळे ऐन उन्हाळ्यात नागरिकांना तिलासा मिळाला. जोरदार पडलेल्या या पावसामुळे शहरातील अनेक भागात पाणी साचले होते.
20 Apr 2026 11:30 AM (IST)
उपमुख्यमंत्री एकनाथ शिंदे यांचे पुत्र खासदार श्रीकांत शिंदे छत्रपती संभाजीनगर दौऱ्यावर होते.दौलताबाद ते छत्रपती संभाजीनगर रोडवरून जात असतांना श्रीकांत शिंदे यांनी ऊसाचा रस पिण्यासाठी ताफा थांबवला.भलामोठा ताफा नेते पोलीस बघून रसवंती चालक गोंधळून गेला.चालकाची अडचण लक्षात घेऊन आ.अर्जुन खोतकर यांनी स्वतः मशीनवर रस तयार करून श्रीकांत शिंदे यांना दिला.यावेळी सामाजिक न्याय मंत्री संजय शिरसाठ हे देखील उपस्थित होते.
20 Apr 2026 11:25 AM (IST)
जागतिक राजकारणाच्या पटावर सध्या एक अत्यंत स्फोटक खेळ सुरू आहे. ओमानचा समुद्र आणि होर्मुझची सामुद्रधुनी आता केवळ पाण्याचे मार्ग राहिलेले नाहीत, तर ते अमेरिका आणि इराण (US-Israel Iran War) यांच्यातील महासंग्रामाचे रणांगण बनले आहेत. अमेरिकेने इराणचे मालवाहू जहाज जप्त करण्याची चूक केली आणि इराणने काही तासांतच आकाशातून मृत्यूचा पाऊस पाडत अमेरिकन नौदलावर थेट ड्रोन हल्ले केले. या घटनेने केवळ आखाती देशांनाच नव्हे, तर संपूर्ण जगाला हादरवून सोडले आहे. इस्लामाबादमध्ये शांतता चर्चेचे वारे वाहत असतानाच, प्रत्यक्ष समुद्रात मात्र युद्धाच्या तोफा धडधडू लागल्या आहेत.
20 Apr 2026 11:20 AM (IST)
पश्चिम आशियात अमेरिका इराणमध्ये वाढत्या तणावामुळे जागतिक स्तरावर चिंतेचे वातावरण निर्माण झाले आहे. अशा परिस्थितीत उत्तर कोरियाचे हुकूमशाह किम जोंग उन (Kim Jong Un) यांनी जगाची चिंता वाढवली आहे. उत्तर कोरियाने जपानवर एकाच वेळी अनेक बॅलेस्टिक क्षेपणास्त्रे डागली आहे. दुसरीकडे क्लस्टर बॉम्ब वॉरहेड असलेल्या बॅलेस्टिक क्षेपणास्त्रांची यशस्वी चाचणी देखील केली आहे. यामुळे जपानची चिंता वाढली असून देशात राष्ट्रीय आणीबाणी जाहीर करण्यात आली आहे.
20 Apr 2026 11:15 AM (IST)
महाराष्ट्राला प्रचंड कडक उन्हाळा आणि अवकाळी पाऊस असा दुहेरी संकटाचा सामना करावा लागत आहे. एका बाजूला 40 अंश पार चढलेला उन्हाच्या पाराने सर्वांच्या जीवाची लाही केली आहे. तर दुसरीकडे अवकाळी गारपिटीने शेतकऱ्यांच्या जीवाला घोर लावला आहे. मागील पाच दिवसांपासून उन्हाचा चटका जोरदार वाढलेला असताना कालपासून राज्यात हवामान (IMD Weather Update) बदल झाला आहे. कालपासून अनेक जिल्ह्यांमध्ये पावसाच्या सरी कोसळल्या असून पूर्वमौसमी पावसाला पोषक असे हवामान तयार झाले आहे.
20 Apr 2026 11:08 AM (IST)
टेक कंपनी गुगलने त्यांच्या जेमिनी अॅपसाठी एका नव्या अपडेटची घोषणा केली आहे. या नव्या अपडेटमुळे आता AI इमेज जनरेशन अधिक चांगल्या पद्धतीने केले जाऊ शकते. कंपनीने सांगितलं आहे की, एआय प्लॅटफॉर्म Gemini आता यूजरच्या इंटरेस्ट्स, प्रेफरेंस आणि गुगल फोटोज लाइब्रेरीमधील सेव्ड फोटोजच्या आधारावर ईमेज क्रिएट करू शकणार आहे.
20 Apr 2026 11:02 AM (IST)
पुणे येथून एक धक्कादायक घटना समोर आली आहे. पोट दुखीची तक्रार घेऊन एक एक अल्पवयीन मुलगी वैद्यकीय तपासणीसाठी आली तेव्हा धक्कादायक खुलासा झाला. तपासणीत ती पाच महिनयांची गर्भवती असल्याचे समोर आले आहे. या धक्कादायक घटनेने एकच खळबळ उडाली आहे. पीडित मुलीची विचारपूस केली असता ति राहत असलेल्या इमारतीतील सुरक्षा रक्षकावर गंभीर आरोप केले आहेत. तिने सांगितले की तिला जीवे मारण्याची धमकी देऊन तिच्यावर लैंगिक अत्याचार करण्यात आले.
20 Apr 2026 10:52 AM (IST)
सातत्याने लक्ष्याचा पाठलाग करण्यात माहिर असलेल्या पंजाब किंग्सने प्रियांश आर्या आणि कूपर कॉनोली यांच्या स्फोटक फलंदाजीच्या जोरावर न्यू चंदीगडमध्ये लखनौ सुपर जायंट्सविरुद्ध एक विक्रम मोडणारी कामगिरी केली. श्रेयस अय्यरच्या संघाने २५४ धावांचा डोंगर उभा केला आणि ऋषभ पंतच्या संघाचा ५४ धावांनी पराभव केला. पंजाब किंग्सने या सामन्यात पाच विक्रम रचले, त्यापैकी एक म्हणजे सलग सहा सामन्यांमध्ये अपराजित राहण्याचा विक्रम.
20 Apr 2026 10:42 AM (IST)
एक असा हुकूमशाह ज्याच्या नावाने आजही दहशत निर्माण होते तो म्हणजे अॅडॉल्फ हिटलर. नाझीचा नेता असलेला अॅडॉल्फ हिटलर याचा आजच्या दिवशी 1889 साली जन्म झाला. ऑस्ट्रियातील ब्राउनाऊ आम इन हे त्याचे जन्मस्थान असून त्याने अत्यंत अमानूष हत्या केल्या. पहिल्या महायुद्धानंतर जर्मनीतील राजकीय आणि आर्थिक अस्थिरतेचा फायदा घेत त्याने आपली सत्ता मजबूत केली.
20 Apr 2026 10:32 AM (IST)
सोशल मीडियावर प्रसिद्धी मिळवण्यासाठी, हिरोगिरी दाखवण्यासाठी आणि रिल बनवण्यासाठी आजकालचे तरुण कोणत्याही थराला जाऊ शकतात. याचा एक भीषण प्रत्यय देणारा व्हिडिओ सोशल मीडियावर व्हायरल होत आहे. व्हिडिओ मध्यप्रदेशातील असल्याचा दावा केला जात आहे. नॅशनल हायवेवर वेगाने बाईक चालवणाऱ्या तरुणांना स्टंटबाजी जीवावर बेतली आहे. या अपघातात तीन जणांचा जागीच मृत्यू झाला आहेत, तर दोन जण गंभीर जखमी आहेत.
20 Apr 2026 10:22 AM (IST)
मध्य-पूर्वेतील राजकारण सध्या एका अत्यंत नाजूक वळणावर येऊन ठेपले आहे. एकीकडे इराण आणि इस्रायल यांच्यात शांतता प्रस्थापित करण्यासाठी जागतिक स्तरावर चर्चा सुरू आहेत, तर दुसरीकडे इस्रायलचे पंतप्रधान बेंजामिन नेतान्याहू (benjamin netanyahu) यांनी अत्यंत आक्रमक विधान करून या चर्चेच्या भवितव्यावरच प्रश्नचिन्ह निर्माण केले आहे. नेतान्याहू यांनी इराणला जगातील ‘रानटी’ आणि दहशतवादी शक्ती संबोधले असून, इस्रायलची ही लढाई पाश्चात्य संस्कृती वाचवण्यासाठी सुरू असल्याचे म्हटले आहे. या विधानामुळे आखाती देशांमध्ये पुन्हा एकदा तणावाचे वातावरण निर्माण झाले आहे.
20 Apr 2026 10:12 AM (IST)
एप्रिल महिन्यापासून उष्णतेच्या लाटेने हाहाकार माजवायला सुरुवात केली आहे. भारतीय हवामान विभागाने (IMD) उत्तर प्रदेश, बिहार आणि मध्य प्रदेशसह १५ राज्यांसाठी मेघगर्जनेसह पावसाचा इशारा दिला आहे. उत्तर प्रदेश, बिहार आणि मध्य प्रदेशसह सर्व ईशान्येकडील राज्यांसाठी पावसाचा इशारा देण्यात आला आहे. याशिवाय, पश्चिम मध्य प्रदेश आणि विदर्भ, तसेच छत्तीसगड, पूर्व उत्तर प्रदेश, पूर्व राजस्थान आणि पूर्व मध्य प्रदेशमध्ये तीव्र उष्णतेची लाट आणि मेघगर्जनेसह पावसासाठी उष्णतेच्या लाटेचा इशारा देण्यात आला आहे.
20 Apr 2026 10:04 AM (IST)
२० एप्रिल रोजी आज भारतीय शेअर बाजारात सकारात्मक सुरुवात होण्याची शक्यता आहे. जागतिक बाजारातील संमिश्र संकेतांच्या आधारे, भारतीय शेअर बाजाराचे प्रमुख निर्देशांक, सेन्सेक्स आणि निफ्टी ५०, आज सोमवारी सकारात्मक पातळीवर उघडण्याची शक्यता आहे. गिफ्ट निफ्टीमधील ट्रेंड्स देखील भारतीय बेंचमार्क निर्देशांकासाठी सकारात्मक सुरुवातीचे संकेत देत आहेत. गिफ्ट निफ्टी, निफ्टी फ्युचर्सच्या मागील क्लोजपेक्षा जवळपास १०८ पॉइंट्सच्या प्रीमियमवर, २४,४७६ च्या पातळीवर व्यवहार करत होता. कसे आहे आजचे मार्केट घ्या जाणून
20 Apr 2026 10:03 AM (IST)
अमेरिका इराण युद्धाने (US Iran War) आता तीव्र पेट घेतला आहे. ओमानच्या आखातात इराणचे एक मालवाहू जहाज अमेरिकेने जप्त केले आहे. यामुळे पश्चिम आशियात पुन्हा एकदा युद्धाचे ढग गडद झाले आहेत. इराणच्या हजरत खातम अल-अनबिया लष्करी मुख्यालयाने याची पुष्टी केली आहे. इराणने अमेरिकेच्या या कारवाईचा तीव्र निषेघ केला आहे. याचा सूड घेण्याची धमकीही इराणने अमेरिकेला दिली आहे. वाचा सविस्तर
20 Apr 2026 10:02 AM (IST)
एप्रिल महिन्यापासून उष्णतेच्या लाटेने हाहाकार माजवायला सुरुवात केली आहे. भारतीय हवामान विभागाने (IMD) उत्तर प्रदेश, बिहार आणि मध्य प्रदेशसह १५ राज्यांसाठी मेघगर्जनेसह पावसाचा इशारा दिला आहे. उत्तर प्रदेश, बिहार आणि मध्य प्रदेशसह सर्व ईशान्येकडील राज्यांसाठी पावसाचा इशारा देण्यात आला आहे. याशिवाय, पश्चिम मध्य प्रदेश आणि विदर्भ, तसेच छत्तीसगड, पूर्व उत्तर प्रदेश, पूर्व राजस्थान आणि पूर्व मध्य प्रदेशमध्ये तीव्र उष्णतेची लाट आणि मेघगर्जनेसह पावसासाठी उष्णतेच्या लाटेचा इशारा देण्यात आला आहे. वाचा अधिक
आठवड्याच्या सुरुवातीलाच मुंबई लोकलने प्रवास करणाऱ्या प्रवाशांचे हाल झाले असून दुहेरी त्रास सहन करावा लागला आहे. मुंबईची लाइफलाइन असणारी मुंबई लोकलबाबत एक मोठी दुर्घटना घडली आहे. डोंबिवलीहून कल्याणच्या दिशेने जाणारी एक डाऊन स्लो लोकल रुळावरून घसरल्याचे समोर आले आहे. यामुळे मध्य रेल्वे ठप्प झाली. तर दुसरी घटना म्हणजे पनवेल स्थानकात प्रवाशांनी भरलेली लिफ्टच खाली कोसळली. या दोन्ही घटनांचा रेल्वे वाहतूकीवर मोठ्या प्रमाणात परिणाम झाला आहे. हजारो प्रवाशांना याचा फटका बसला आहे. वाचा अधिक माहिती
.png "Videos"){kind=small}
