SSC Exam 2025: विद्यार्थिनीने बुरखा घातल्याने दहावी परीक्षेस प्रवेशास नकार; ‘या’ शहरातील संतप्त प्रकार

पिंपरी: दहावीच्या परीक्षेला येताना एका मुलीने बुरखा घातला होता. त्यामुळे शाळेने त्या मुलीला दहावीच्या परीक्षेसाठी प्रवेश नाकारला. त्यावेळी पालकांनी पोलिसांकडे धाव घेतली. पोलिसांच्या मध्यस्थीनंतर त्या मुलीला शनिवारी (दि. १ मार्च) परीक्षेला बसण्यास दिले. मात्र, सोमवारी होणाऱ्या परीक्षेस बसू देणार नाही, अशी भूमिका शाळेने घेतल्याचे मुलीच्या पालकांनी सांगितले.

बिजलीनगर, चिंचवड परिसरात राहणाऱ्या एका विद्यार्थिनीला दहावीच्या परीक्षेकरिता निगडी येथील इंग्रजी माध्यमाच्या शाळेत केंद्र आले आहे. ती विद्यार्थिनी शनिवारी सकाळी परीक्षा देण्यासाठी शाळेत गेली. मात्र, तिने बुरखा घातला असल्याने शाळेने तिला वर्गात जाण्यासाठी मज्जाव केला. अखेर तिच्या पालकांनी पोलिस नियंत्रण कक्षाशी संपर्क साधून मदतीची मागणी केली. निगडी पोलिसांनी मध्यस्थी केल्यावर तिला परीक्षेला बसू देण्यात आले.

दहावीच्या पहिल्या पेपरपासून माझ्या मुलीला बुरखा घालून परीक्षेला बसण्यास मज्जाव केला जात आहे. बुरखा घालून परीक्षा देऊ नये, असा बोर्डाचा नियम नाही. आता मुलीला परीक्षेकरिता बसू दिले आहे. मात्र, सोमवारी तिला बुरखा घालून परीक्षेला बसू देणार नाही, असे शाळेने सांगितले आहे. माझी मुलगी सोमवारीही बुरखा घालून परीक्षेला जाणार आहे. जर शाळेने विरोध केलाच, तर आमच्या समाजातील बांधवांना बोलविणार आहे.

– विद्यार्थिनीचे पालक

दहावीच्या परीक्षेला कोणाला प्रवेश द्यायचा आणि कोणाला प्रवेश द्यायचा नाही, याचा अधिकार शिक्षणाधिकारी व संबंधित परीक्षा केंद्र प्रमुख यांना आहे. आम्हाला तो अधिकार नाही. त्यामुळे तेच विद्यार्थिनीच्या प्रवेशाबाबत निर्णय घेतील.

– शत्रुघ्न माळी, वरिष्ठ पोलिस निरीक्षक, निगडी पोलिस ठाणे

बुरखा घातला किंवा हिजाब घातला, तरी परीक्षेला बसणाऱ्या विद्यार्थिनीची ओळख पटविणे अनिवार्य आहे. त्यामुळे पेपर लिहिताना त्या मुलीचा चेहरा दिसणे गरजेचे आहे. महापालिकेच्या उर्दू शाळेतील मुलीही हिजाब घालून परीक्षेला जातात.

– संगीता बांगर, शिक्षणाधिकारी, महापालिका

Maharashtra SSC Exam 2025: आजपासून दहावीची परीक्षा, ‘या’ केंद्रांवरील शिक्षक अन् इतर कर्मचारी बदलले

विद्यार्थ्यांसाठी हेल्पलाईन सुविधा

परीक्षांच्या कालावधीत अनेक विद्यार्थी नकारात्मक विचाराने किंवा परीक्षेच्या भितीने मानसिक दडपणाखाली असतात, अशा विद्यार्थ्यांना नैराश्येतून बाहेर काढण्यास मदत करण्यासाठी राज्य मंडळ स्तरावरून समुपदेशन करण्यासाठी १० समुपदेशकांची नियुक्ती केली आहे. तसेच विद्यार्थ्यांना मार्गदर्शन करण्यासाठी व त्यांच्या शंकांचे निरसन करण्यासाठी जिल्हानिहाय प्रत्येकी दोन समुपदेशकांची नियुक्ती करण्यात आली आहे. तसेच राज्यमंडळ व ९ विभागीय मंडळात नियंत्रण कक्ष कार्यरत करुन हेल्पलाईन सुविधा उपलब्ध करुन दिली आहे.

मोबाईलमध्ये चित्रीकरण करण्याच्या सूचना

परीक्षेसाठी नियुक्त केलेले सहाय्यक परिरक्षक (रनर) परीक्षा कालावधीत बैठे पथक म्हणून मुख्य केंद्रावर कार्यरत राहणार आहे. तसेच त्यांनी परिरक्षण केंद्रावरून गोपनीय पाकिटे ताब्यात घेतल्यापासून ते परीक्षा केंद्रावर पोहोचेपर्यंत व वितरीत करेपर्यंत मोबाईलमध्ये चित्रीकरण्याची सूचना दिल्या आहेत.