रविवार, 18 ऑक्टोबर 2026
संग्रहित फोटो
पुणे : परदेशी निधीच्या नियमनासाठी केंद्राच्या गृह मंत्रालयाचा एफसीआरए हा विभाग कार्यरत आहे. त्यामुळे अभिजीत दिपके यांच्या ‘कॉक्रोच जनता पार्टी’ला (सीजेपी) परदेशातून निधी मिळत असल्याचा आरोप भाजपकडून होत आहे. सरकार भाजपचे आहे, त्यांनी एफसीआरएने तपास करावा, केवळ आरोप करू नयेत, असे आव्हान राष्ट्रवादी कॉंग्रेस शरदचंद्र पवार पक्षाच्या कार्याध्यक्ष खासदार सुप्रिया सुळे यांनी केले आहे. विधान परिषदेच्या पुणे पदवीधर आणि शिक्षक मतदार संघातील महाविकास आघाडीच्या उमेदवारांच्या प्रचाराच्या नियोजनासाठी शनिवारी निसर्ग मंगल कार्यालयात राष्ट्रवादी कॉंग्रेस आणि कॉंग्रेसच्या पदाधिकाऱ्यांची बैठक झाली. या बैठकीनंतर सुळे पत्रकारांशी बोलत होत्या.
अमेरिकन गुंतवणूकदार जॉर्ज सोरोस यांच्याकडून सीजेपीला फंडींग होत असल्याचा आरोप भाजपचे काही नेत्यांनी केल्याच्या प्रश्नावर सुळे म्हणाल्या की, परदेशी निधीच्या नियमनासाठी केंद्राच्या गृह मंत्रालयाचा एफसीआरए हा विभाग कार्यरत आहे. केंद्रात भाजपचेच सरकार आहे. त्यामुळे त्यांनी केवळ आरोप न करता एफसीआरएकडूनन तपास करावा. तसेच पुण्यात सीजेपीच्या आंदोलनासाठी पोलिसांची परवानगी मिळते, मात्र दिल्लीत परवानगी मिळत नाही. दिल्लीत आणि पुण्यात एकच कायदा लागू आहे ना. मग एकाच देशात दोन वेगवेगळे कायदे लागू कसे होऊ शकतात, असा सवालही सुळे यांनी उपस्थित केला. निवडणूक आयोगाच्या कामकाजात सुधारणा करण्याची गरज आहे. निवडणूक आयोगाच्या निर्णयांवर प्रश्न उपस्थित करणे आणि पारदर्शकतेची मागणी करणे हा लोकशाहीतील अधिकार आहे. अचानक मतदार संख्या वाढते, नंतर मतदार याद्यांमधून नावे काढली जातात, हा काय प्रकार आहे कळत नाही. याचे अवलोकन करणे गरजेचे आहे. मात्र, निवडणुक आयोग आणि सरकारी यंत्रणा माहितीच देत नाही, डेटाच देत नाही, मग करायचे काय, असा सवालही सुळे यांनी उपस्थित केला.
दरम्यान, राज्यातील दुष्काळी परिस्थिती आणि शेतकऱ्यांच्या मदतीचा प्रश्न गंभीर आहे. सरकार झाडे लावण्यासाठी १८ कोटीच्या गाड्या घेते, मात्र शेतकऱ्यांना पैसै देत नाही. प्रधानमंत्री कृषी योजना आणि नमो कृषी सन्मान योजनेचे शेवटचे पैसे १३ मार्च रोजी मिळाले, त्यानंतर पैसे आले नाहीत. सरकार शेतकऱ्यांची चेष्टा करत आहे. राजकारण बाजूला ठेवून सरकारने दुष्काळ निवारणाच्या कामाला लागावे, असे आवाहन सुळे यांनी केले.
शिवसेनेसोबत चर्चा सुरू आहे
आम्ही पदवीधर आणि शिक्षक मतदार संघाच्या निवडणुका महाविकास आघाडीच्या माध्यमातून लढवत आहोत. पुणे आणि संभाजीनगर पदवीधरच्या जागा आमच्या आहेत. त्यामुळे दोन्ही जागांवर आम्ही उमेदवार उभे केले आहेत. शिवसेना (उबाठा) पक्षाकडूनही उमेदवार उभा करण्यात आला आहे. हे आघाडी आणि युतींमध्ये घडत असते. कालही शिवसेना पक्ष आमचा सहकारी होता, आजही आहे आणि उद्याही असेल. आमचे शिवसेनेसोबत अद्यापही बोलणे सुरू आहे, अशीही माहिती सुळे यांनी दिली.
पवार कुटुंबात यंदा दिवाळी नाही
आमच्या घरातला कर्ता पुरुष अजित दादा गेलेला आहे. त्यामुळे पवार कुटुंबात यंदा दिवाळी नाही. दादा तर नाहीत, दुसरीकडे दुष्काळ आहे. ज्या लोकांमुळे आम्ही आहोत, ते लोक अडचणीत असताना आम्ही दिवाळी साजरी करू शकत नाही, असेही सुळे यांनी सांगितले.
Ans: भाजपकडून सीजेपीला परदेशातून निधी मिळत असल्याचा आरोप करण्यात आला आहे.
Ans: परदेशी निधीबाबत केवळ आरोप न करता केंद्र सरकारने एफसीआरएच्या माध्यमातून चौकशी करावी, असे आव्हान सुप्रिया सुळे यांनी भाजपला दिले.
Ans: परदेशी निधीच्या नियमनासाठी एफसीआरए विभाग केंद्रीय गृह मंत्रालयाच्या अंतर्गत कार्यरत आहे.
