Sangli Reservation: सांगली जिल्हा परिषदेत ६१ जागांसाठी आरक्षण सोडत जाहीर; यंदा मिळणार नव्या चेहऱ्यांना संधी 

प्रवीण शिंदे : सांगली : सांगली जिल्हा परिषद सार्वत्रिक निवडणुकीसाठी आज (दि १३) आरक्षण सोडत काढण्यात आली. जिल्हाधिकारी अशोक काकडे यांच्या अध्यक्षतेखाली एकूण ६१ जागांसाठी आरक्षण सोडत काढण्यात आली. यामध्ये अनुसूचित जातींसाठी ७, मागास प्रवर्ग १६ आणि ३८ खुल्या जागांसाठी सोडत काढण्यात आली. यावेळी महसूल जिल्हाधिकारी राजीव शिंदे, तहसीलदार लीना खरात आदींसह प्रशासकीय अधिकारी उपस्थित होते.

राज्य निवडणूक आयोगाच्या सूचनेनुसार जिल्हा परिषदेची पहिली निवडणूक झाल्याप्रमाणे आरक्षण सोडत चिठ्ठ्या काढून काढण्यात आले, रियांश अभिजीत कांबळे आणि शौर्य अभिजीत कांबळे, अभिज्ञा अभिजीत कांबळे या जुळ्या भावंडांच्या हस्ते आरक्षण सोडत काढण्यात आली. सुरुवातीला अनुसूचित जातीच्या ७ जागांसाठी लोकसंख्येच्या उतरत्या क्रमाने चिठ्ठ्या काढण्यात आल्या, ज्यामध्ये ४  महिलांचे आरक्षण काढण्यात आले.

महाराष्ट्र जिल्हा परिषदा व पंचायत समिती अधिनियम, १९६१ मधील तरतुदी आणि सर्वोच्च न्यायालयाचे विशेष अनुमती याचिका आदेशानुसार नागरिकांच्या मागासवर्ग प्रवर्गाकरिता एकूण देय जागांपैकी २७ टक्के जागांसाठी आरक्षण सोडत काढण्यात आली, ज्यामध्ये १६ जागांसाठी सोडत काढली त्यापैकी ८ जागा महिलांसाठी आरक्षित करण्यात आल्या. अनुसूचित जाती आणि नागरिकांचा मागास प्रवर्ग आरक्षण सोडत काढून उर्वरित ३८ जागा खुल्या राहिल्या. त्यापैकी १९ महिला आरक्षण सोडत काढण्यात आली.

मिरज तालुक्यात चार जागा एस.सी महिलांसाठी

अनुसूचित जातीच्या ७ जागांसाठी लोकसंख्येच्या उतरत्या क्रमाने चिठ्ठ्या काढण्यात आल्या, ज्यामध्ये ४  महिलांचे आरक्षण काढण्यात आले. त्यानुसार म्हैसाळ ( एस), मालगाव, कवलापूर, बेडग आशा चार ठिकाणी महिला अनुसूचित जाती महिलांसाठी आरक्षण पडले. उर्वरित रांजणी, उमदी आणि सावळज या जागी पुरुषांना संधी मिळणार आहे.

जिल्हा परिषद अध्यक्ष पदासाठी यापूर्वीच सर्वसाधाण महिला पदाचे आरक्षण पडले आहे, यामध्ये मीनाक्षी महाडिक, हर्षदा महाडिक, रेणुकादेवी देशमुख, शितल बाबर, सोनिया बाबर, मोहिनी खोत, देवयानी नाईक, अश्विनी नाईक, भाग्यश्री शिंदे, मेघा कचरे, वैशाली कदम, संगीता पाटील, सुप्रिया पाटील अशी नावे चर्चेत आहेत.

वाळवा अन् मिरजेत महिलाराज 

वाळवा आणि मिरज या दोन तालुक्यात प्रत्येकी ११ गट आहेत. या दोन्ही तालुक्यात महिलांसाठी एकूण १५ जागा आरक्षित आहेत. यात मिरज तालुक्यात आठ तर वाळवा तालुक्यात सात महिला सदस्य असतील.

तासगाव तालुक्यातील सहापैकी पाच गट सर्वसाधारण प्रवर्गासाठी आरक्षित झाले आहेत. यामध्ये थेट महिलांसाठी एकही गट आरक्षित नाही.  मात्र सर्वसाधारण प्रवर्गातून महिला सदस्य येऊ शकतात. कडेगाव तालुक्यात चारही गट महिलांसाठी आरक्षित झाले आहेत. यात तीन नागरिकांचा मागास प्रवर्गासाठी तर एक सर्वसाधारण प्रवर्गासाठी आहे.

जिल्हा परिषद गट  आरक्षण