राज्यातील 12 जिल्हा परिषदांसह पंचायत समितीसाठी आज मतदान
07 Feb 2026 10:54 AM (IST)
टी-२० विश्वचषकापूर्वी खेळाडूंच्या दुखापतींची मालिका अखंड सुरूच आहे. ऑस्ट्रेलियन वेगवान गोलंदाज जोश हेझलवूड आणि पॅट कमिन्स यांना स्पर्धेतून बाहेर काढण्यात आले आहे. टी-२० विश्वचषकाच्या दोन दिवस आधी हर्षित राणा देखील दुखापतग्रस्त झाला होता आणि त्याच्या जागी मोहम्मद सिराजला संघात समाविष्ट करण्यात आले होते. आता श्रीलंकेच्या संघामधून विश्वचषक सुरू होण्याच्या एक दिवसाआधी मोठी अपडेट समोर आली आहे. श्रीलंकेचा स्टार गोलंदाज इशान मलिंगा देखील दुखापतीमुळे बाहेर पडला आहे आणि त्याच्या जागी आता अधिकृतपणे संघाची घोषणा करण्यात आली आहे.
07 Feb 2026 10:48 AM (IST)
इराणच्या तेल निर्यातीवर पुन्हा एकदा अमेरिकेने कडक निर्बंध लादले आहे. ओमानमधील झालेल्या अप्रत्यक्ष चर्चेनंतर अमेरिकेने हा निर्णय घेतला आहे. यामुळे जागतिक स्तरावर खळबळ उडाली आहे. परंतु अमेरिकेचा हेतू इराणच्या अणु कार्यक्रमाला रोखण्याचा असल्याचे वॉशिंग्टनने म्हटले आहे.
07 Feb 2026 10:45 AM (IST)
"आधी लगीन लोकशाहीचं, मग माझ्या संसाराचं" अशी प्रेरणादायी भूमिका घेत सांगलीच्या एका नववधूने मतदानाचा आपला हक्क बजावून एक नवा आदर्श घालून दिला आहे. वाळवा तालुक्यातील कापूसखेड येथील तृप्ती पाटील या तरुणीने लग्न मंडपात जाण्यापूर्वी मतदान केंद्रावर धाव घेतली.
आज तृप्तीचा विवाह सोहळा संपन्न होत आहे. विशेष म्हणजे, तिच्या लग्नाच्या दिवशीच जिल्हा परिषद आणि पंचायत समितीसाठी मतदानाचा दिवस आल्याने तिने कोणत्याही परिस्थितीत मतदान करण्याचे ठरवले. लग्नाचा पेहराव करून आणि हातात लग्नाची मेहंदी असतानाही, तिने आपल्या वडिलांसह मतदान गाठले आणि लोकशाहीप्रती आपले कर्तव्य पार पाडले. तृप्तीच्या या जागरूक निर्णयाचे संपूर्ण जिल्ह्यात कौतुक होत असून, "लग्नाच्या गडबडीतही मतदानाची ही ओढ सर्वांसाठी प्रेरणादायी आहे," अशी भावना नागरिकांकडून व्यक्त केली जात आहे.
07 Feb 2026 10:40 AM (IST)
कराड तालुक्यात बिबट्याच्या वाढत्या वावरामुळे नागरिकांमध्ये भीतीचे वातावरण निर्माण झाले आहे. शुक्रवारी रात्री घडलेल्या घटनेत माजी मंत्री स्वर्गीय विलासकाका पाटील-उंडाळकर आणि राष्ट्रवादी काँग्रेस (अजितदादा पवार गट) चे नेते उदयसिंह पाटील-उंडाळकर यांचे चिरंजीव आदिराज पाटील-उंडाळकर हे बिबट्याच्या हल्ल्यात जखमी झाले आहेत.
07 Feb 2026 10:32 AM (IST)
गुजरात येथून एक धक्कदायक आणि संतापजनक प्रकार समोर आली आहे. पीडित अल्पवयीन मुलीवर तिच्या मामाने आणि तिच्या चुलत भावाने लैंगिक अत्याचार केल्याचे समोर आले आहे. आईने आपल्या मुलीला मोबाईलचे व्यसन सोडवण्यासाठी तिने आपल्या नातेवाईकांकडे पाठवले होते. मात्र त्या नातेवाईकांकडून त्या पीडितेशी नको तेच कृत्य केलं. घडलेली घटना गुजरातमधील अहमदाबाद येथे घडली.
07 Feb 2026 10:24 AM (IST)
आयसीसी पुरुष टी20 वर्ल्ड कप 2026 आजपासून सुरु होणार आहे. आज पहिला सामना खेळला जाणार असून आजच्या सामन्यासाठी क्रिकेटप्रेमींमध्ये अतिशय उत्साहाचे वातावरण आहे. क्रिकेटप्रेमींचा हाच उत्साह आणखी वाढवण्यासाठी गुगलने सर्वांनाच एक खास सरप्राईज दिले आहे. सर्च इंजिन गुगलने आयसीसी पुरुष टी20 वर्ल्ड कप 2026 निमित्त एक खास डूडल सादर केले आहे. गुगलने दिलेल्या या खास सरप्राईजमुळे क्रिकेटप्रेमींच्या उत्साहात भर पडली आहे. मुंबईच्या वानखेडे स्टेडियमवर झालेल्या भव्य उद्घाटन समारंभाने स्पर्धेची शोभा आणखी वाढवली आहे.
07 Feb 2026 10:15 AM (IST)
पहिल्या सामन्यामध्ये भारतीय संघाची प्लेइंग 11 कशी असणार आहे याकडे सर्वाचे लक्ष लागले आहे. भारताचा वेगवान गोलंदाज जसप्रीत बुमराह तापामुळे अमेरिकेविरुद्धच्या टी-२० विश्वचषक सामन्यात खेळणार नाही. शनिवारी मुंबईतील वानखेडे स्टेडियमवर भारत आणि अमेरिका यांच्यात सामना होणार आहे.
07 Feb 2026 10:10 AM (IST)
कोल्हापूर जिल्हा परिषद निवडणुकीसाठी आज सकाळपासूनच ग्रामीण भागात मतदानाचा मोठा उत्साह पाहायला मिळत आहे. जिल्ह्याच्या कानाकोपऱ्यातून नागरिक आपला हक्क बजावण्यासाठी मतदान केंद्रांवर मोठी गर्दी करत असून, ग्रामीण भागात अत्यंत चुरशीने मतदान पार पडत आहे.'गोकुळ' दूध संघाचे अध्यक्ष नवीद मुश्रीफ यांनी लिंगनूर येथे आपला मतदानाचा हक्क बजावला. मतदान केल्यानंतर माध्यमांशी बोलताना नवीद मुश्रीफ यांनी विश्वास व्यक्त केला की, "कोल्हापूर जिल्हा परिषदेवर यावेळेस महायुतीचाच झेंडा फडकेल."
07 Feb 2026 10:05 AM (IST)
पंतप्रधान नरेंद्र मोदी (Prime Minister Narendra Modi) आणि अमेरिकेचे राष्ट्राध्यक्ष डोनाल्ड ट्रम्प (US President Donald Trump) यांच्यातील मैत्रीपूर्ण संबंधांमुळे भारत-अमेरिका व्यापार संबंधांत आज एक सुवर्ण अध्याय लिहिला गेला आहे. केंद्रीय वाणिज्य मंत्री पियुष गोयल (Piyush Goyal) यांनी अधिकृतपणे जाहीर केले की, दोन्ही देशांनी ‘अंतरिम व्यापार कराराची चौकट’ (Interim Trade Agreement Framework) अंतिम केली आहे. हा करार म्हणजे केवळ व्यापार नाही, तर भारतीय तरुण, शेतकरी आणि सूक्ष्म-लघु उद्योगांसाठी (MSMEs) जागतिक श्रीमंतीची गुरुकिल्ली ठरणार आहे.
07 Feb 2026 10:05 AM (IST)
जिल्हा परिषद आणि पंचायत समितीच्या निवडणुकीत महिलांचा सहभाग वाढवण्यासाठी सिंधुदुर्ग जिल्हा प्रशासनाने एक अभिनव पाऊल उचलले आहे. जिल्ह्यातील आठही तालुक्यांमध्ये प्रत्येकी एक याप्रमाणे एकूण ८ 'सखी मतदान केंद्रे' स्थापन करण्यात आली आहेत.
महिला संचलित: या केंद्रांवर तैनात असलेले निवडणूक अधिकारी, कर्मचारी आणि सुरक्षा रक्षक (पोलीस) या सर्व महिला आहेत. महिला मतदारांना सन्मानपूर्वक आणि सुरक्षित वातावरणात आपला हक्क बजावता यावा, हा या उपक्रमाचा मुख्य हेतू आहे. महिलांकडूनच नियोजन आणि व्यवस्थापन केले जात असल्याने या केंद्रांवर शिस्तबद्ध आणि उत्साही वातावरण पाहायला मिळत आहे.
07 Feb 2026 09:50 AM (IST)
राज्याचे दिवंगत नेते अजित पवार यांची 'सकाळी लवकर कामाला सुरुवात' करण्याची प्रसिद्ध शिस्त आणि परंपरा त्यांच्या निधनानंतरही त्यांच्या कुटुंबीयांनी जपल्याचे आज पाहायला मिळाले. राज्याच्या उपमुख्यमंत्री श्रीमती सुनेत्रा पवार आणि पार्थ पवार यांनी आज पहाटेच काटेवाडी येथील जिल्हा परिषद शाळेतील मतदान केंद्रावर जाऊन आपला मतदानाचा हक्क बजावला.
अजित पवार हे नेहमीच मतदानाच्या दिवशी सर्वात आधी केंद्रावर पोहोचून मतदान करत असत. त्यांची हीच रीत कायम राखत सुनेत्रा वहिनी आणि पार्थ पवार यांनी सकाळी सात वाजताच मतदानासाठी उपस्थिती लावली. "दादांनी घालून दिलेला आदर्श आणि त्यांची लोकशाहीप्रती असलेली निष्ठा आम्ही पुढे नेत आहोत," अशी भावना यावेळी पवार कुटुंबीयांकडून व्यक्त करण्यात आली.
07 Feb 2026 09:40 AM (IST)
जिल्ह्यातील सिल्लोड तालुक्यातील नानेगाव मतदान केंद्रावर आज मतदानादरम्यान मोठा गोंधळ पाहायला मिळाला. येथील भारतीय जनता पक्षाच्या उमेदवाराला काही जणांनी धक्काबुक्की केल्याचा आरोप करण्यात आला आहे.
या घटनेमुळे मतदान केंद्रावर काही काळ तणावाचे वातावरण निर्माण झाले होते. धक्काबुक्कीच्या प्रकारानंतर समर्थकांनी संताप व्यक्त केला असून, पोलिसांनी तातडीने हस्तक्षेप करत परिस्थिती नियंत्रणात आणली आहे. या प्रकरणाबाबत अधिकृत तक्रार नोंदवण्याची प्रक्रिया सुरू असल्याचे समजते.
07 Feb 2026 09:10 AM (IST)
उरणमध्ये जिल्हापरिषद आणि पंचायात समितीच्या मतदानाला सकाळी सात वाजल्यापासुन सुरुवात झाली असून, ४ जिल्हापरिषद, ८ पंचायात समिती अशा १२ जागानसाठी ३६ उमेदवार निवडणूकीच्या रिंगणात आहेत. तर भाजपा विरुद्ध महाविकास आघाडी आशी लढत येथे पहायला मिळणार आहे. दरम्यान मतदार कुणाला कौल देणार हे आज निश्चित होणार आहे. सकाळपासूनच मतदारांनी मतदानाचा हक्क बजावण्यासाठी गर्दी केल्याचे पहायला मिळत आहे.
07 Feb 2026 09:00 AM (IST)
जिल्हा परिषद निवडणुकीच्या मतदानापूर्वीच धाराशीव जिल्ह्यातील भूम तालुक्यात राजकीय वातावरण चांगलेच तापले आहे. तालुक्यातील पाथरूड जिल्हा परिषद गटात मतदारांना पैसे वाटप केल्याच्या आरोपावरून भाजप आणि राष्ट्रवादी काँग्रेसचे कार्यकर्ते आमनेसामने आले असून, दोन्ही गटांत जोरदार राडा झाला आहे.
मिळालेल्या माहितीनुसार, राष्ट्रवादी काँग्रेसचे उमेदवार अमोल भोरे हे मतदारांना पैसे वाटप करत असल्याचा आरोप भाजपचे उमेदवार सिताराम वनवे यांनी केला. मध्यरात्री दीड वाजेच्या सुमारास हा प्रकार उघडकीस आल्याचा दावा भाजपकडून करण्यात आला आहे. यावरून दोन्ही उमेदवारांच्या समर्थकांमध्ये मोठी बाचाबाची आणि गोंधळ झाला. या घटनेमुळे परिसरात तणावाचे वातावरण निर्माण झाले असून, पोलीस प्रशासनाने हस्तक्षेप करत परिस्थिती नियंत्रणात आणली आहे.
07 Feb 2026 08:55 AM (IST)
राज्याच्या उपमुख्यमंत्री श्रीमती सुनेत्रा अजितदादा पवार यांनी आज सकाळी बारामती तालुक्यातील काटेवाडी येथे आपला मतदानाचा हक्क बजावला. जिल्हा परिषद आणि पंचायत समिती निवडणुकीसाठी सुरू असलेल्या मतदानाच्या पार्श्वभूमीवर त्यांनी पहाटेच काटेवाडी येथील जिल्हा परिषद शाळेत जाऊन मतदान केले.
आपला हक्क बजावल्यानंतर माध्यमांशी संवाद साधताना त्यांनी लोकशाहीच्या या उत्सवात सर्वांनी सहभागी होण्याचे आवाहन केले. "राज्याच्या ग्रामीण भागाच्या विकासासाठी आणि उज्ज्वल भविष्यासाठी प्रत्येक मत महत्त्वाचे आहे. नागरिकांनी घराबाहेर पडून या महत्त्वपूर्ण प्रक्रियेत सक्रिय सहभाग नोंदवावा," असे त्या यावेळी म्हणाल्या. पुणे जिल्ह्यासह राज्यातील १२ जिल्ह्यांमध्ये आज स्थानिक स्वराज्य संस्थांच्या निवडणुकीसाठी मोठ्या उत्साहात मतदान पार पडत आहे.
07 Feb 2026 08:45 AM (IST)
महाराष्ट्रातील स्थानिक स्वराज्य संस्थांच्या सत्तेचा फैसला आज होत आहे. पुणे, सोलापूर, धाराशिव आणि छत्रपती संभाजीनगरसह राज्यातील १२ जिल्हा परिषदा आणि १२५ पंचायत समित्यांच्या सार्वत्रिक निवडणुकीसाठी आज, ७ फेब्रुवारी रोजी सकाळी ७:३० वाजल्यापासून मतदानाला उत्साहात सुरुवात झाली आहे.
निवडणूक क्षेत्र: रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर, छत्रपती संभाजीनगर, परभणी, धाराशिव आणि लातूर.
एकूण जागा: १२ जिल्हा परिषदांच्या ७३१ तर पंचायत समित्यांच्या १,४६२ जागांसाठी मतदान होत आहे.
मतदार संख्या: एकूण २ कोटी ८ लाख २० हजार ७०२ मतदार उमेदवारांचे भवितव्य ठरवणार आहेत.
पुरुष: १,०६,३३,२६९
महिला: १,०१,८६,९६५
इतर: ४६८
राज्यातील ग्रामीण भागातील 'मिनी विधानसभा' समजल्या जाणाऱ्या या निवडणुकीसाठी सकाळी साडेसात वाजल्यापासूनच मतदान केंद्रांवर नागरिकांनी गर्दी केली आहे. मतदानाची ही प्रक्रिया सायंकाळी ५:३० वाजेपर्यंत सुरू राहणार आहे.
07 Feb 2026 08:35 AM (IST)
जिल्ह्यातील पिसादेवी येथे आज मतदानाच्या सुरुवातीलाच तांत्रिक अडथळा निर्माण झाला आहे. येथील बूथ क्रमांक १५ मधील खोली क्रमांक ५ मधील ईव्हीएम (EVM) मशीन खराब झाल्याने मतदानाला वेळेत सुरुवात होऊ शकली नाही.
सकाळपासूनच मतदान यंत्रात बिघाड झाल्याने केंद्राबाहेर मतदारांच्या लांबच लांब रांगा लागल्या आहेत. मतदानासाठी ताटकळत उभ्या असलेल्या नागरिकांमध्ये यामुळे काहीसा संताप पाहायला मिळत आहे. दरम्यान, निवडणूक अधिकारी आणि कर्मचाऱ्यांकडून बिघडलेले मशीन बदलण्याची प्रक्रिया युद्धपातळीवर सुरू करण्यात आली असून, लवकरच मतदान पुन्हा सुरू होईल असे प्रशासनाकडून सांगण्यात आले आहे.
07 Feb 2026 08:30 AM (IST)
राज्याच्या काही भागांत मतदानाला सुरुवात होताच सकाळी EVM मशिन बंद पडल्याच्या तक्रारी समोर आल्या आहेत. यामुळे मतदान केंद्रावर रांगा लागल्या असून नागरिकांनी तीव्र संताप व्यक्त केला आहे.
07 Feb 2026 08:29 AM (IST)
राज्यातील १२ जिल्हा परिषद आणि १२५ पंचायत समित्यांसाठी आज मतदान प्रक्रिया सुरू होत असतानाच, पुण्याच्या खेड तालुक्यात मध्यरात्री भीषण हिंसाचाराची घटना घडली आहे. आंबेठाण पाईट जिल्हा परिषद गटातील राष्ट्रवादी काँग्रेसच्या उमेदवार सुनिता बुट्टे यांचे पती शरद बुट्टे पाटील यांच्यावर अज्ञातांनी जीवघेणा हल्ला केला.
या हल्ल्यात शरद बुट्टे पाटील गंभीर जखमी झाले असून त्यांच्यावर रुग्णालयात उपचार सुरू आहेत. या घटनेची बातमी वाऱ्यासारखी पसरताच राष्ट्रवादी काँग्रेसचे शेकडो कार्यकर्ते रस्त्यावर उतरले असून, हल्लेखोरांवर तात्काळ कडक कारवाई करण्याची मागणी केली जात आहे. या तणावपूर्ण वातावरणामुळे खेड परिसरात मोठा पोलीस बंदोबस्त तैनात करण्यात आला आहे.
07 Feb 2026 08:25 AM (IST)
छत्रपती संभाजीनगर जिल्हा परिषदेच्या निवडणुकीतील ९ गटांसाठी ३९ उमेदवार रिंगणात राहिले असून, पण पंचायत समितीच्या १८ जणांसाठी ६२ उमेदवार निवडणूक रिंगणात आहेत.
07 Feb 2026 08:23 AM (IST)
रत्नागिरी जिल्हा परिषद आणि जिल्ह्यातील ९ पंचायत समित्यांच्या सार्वत्रिक निवडणुकीसाठी आज सकाळी मतदानाला सुरुवात झाली आहे. जिल्ह्याचा ग्रामीण विकास कोणाच्या हाती जाणार, याचा फैसला आज ११ लाखांहून अधिक मतदार करणार आहेत.
जिल्हा परिषद: ५६ गटांसाठी १५१ उमेदवार रिंगणात.
पंचायत समिती: ९ समित्यांमधील ११२ जागांसाठी ३२१ उमेदवारांमध्ये लढत.
मतदार संख्या: जिल्ह्यात एकूण ११ लाख ७३ हजार ८९९ मतदार आपला हक्क बजावणार आहेत.
07 Feb 2026 08:17 AM (IST)
राज्यात आज जिल्हा परिषद आणि पंचायत समितीच्या निवडणुकीसाठी मतदान पार पडत आहे. या पार्श्वभूमीवर, आपल्या गावी जाऊन मतदानाचा हक्क बजावण्यासाठी ग्रामीण भागातील नागरिकांनी पुण्यातील स्वारगेट बस स्थानकावर मोठी गर्दी केली आहे.
07 Feb 2026 08:15 AM (IST)
जिल्हा परिषदेच्या एकूण ७३१ जागा असून, त्यातील ३६९ जागा महिलांसाठी राखीव आहेत. अनुसूचित जातींसाठी ८३, अनुसूचित जमातींसाठी २५ आणि नागरिकांचा मागासवर्ग प्रवर्गासाठी १९१ जागा आरक्षित आहेत. जिल्हा परिषदांच्या या सर्व जागांसाठी एकूण २ हजार ६२४ उमेदवार निवडणूक लढवित आहेत.
07 Feb 2026 08:05 AM (IST)
रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर, छत्रपती संभाजीनगर, परभणी, धाराशिव आणि लातूर या १२ जिल्हा परिषदा आणि त्यांतर्गतच्या १२५ पंचायत समित्यांसाठी आज मतदान होणार आहे. यापूर्वी ५ फेब्रुवारी रोजी मतदान होणार होते; परंतु उपमुख्यमंत्री अजित पवार यांच्या अपघाती निधनामुळे मतदान पुढे ढकलण्यात आले.
07 Feb 2026 07:55 AM (IST)
छत्रपती संभाजीनगरच्या सिल्लोड तालुक्यातील ३०५ मतदान केंद्रे ठेवण्यात आली असून, मतदान प्रक्रिया सुरळीत व शांततेत पार पाडण्यासाठी १४०६ अधिकारी, कर्मचाऱ्यांची नियुक्ती करण्यात आली आहे.
07 Feb 2026 07:45 AM (IST)
जिल्हा परिषदेच्या ७३१ तर आणि पंचायत समित्यांच्या १ हजार ४६२ जागांसाठी ही निवडणूक होत आहे. एकूण ७ हजार ४३८ इतके उमेदवार निवडणूक रिंगणात असून, सर्व मिळून एकूण २ कोटी ८ लाख २० हजार ७०२ इतकी मतदार संख्या आहे.
07 Feb 2026 07:36 AM (IST)
राज्यातील 12 जिल्हा परिषदांसह पंचायत समितीची निवडणूक होत आहे. त्यासाठी आज मतदान पार पडणार आहे. त्यानुसार, प्रशासनाकडून तयारी केली गेली आहे. शनिवारी सकाळी ७.३० ते सायंकाळी ५.३० या वेळेत मतदान होणार आहे. मतमोजणी ९ फेब्रुवारी रोजी सकाळी १० वाजता सुरू होईल.
Marathi Breaking News Updates : राज्यातील 12 जिल्हा परिषदांसह पंचायत समितीची निवडणूक होत आहे. त्यासाठी आज मतदान पार पडणार आहे. त्यानुसार, प्रशासनाकडून तयारी केली गेली आहे. राज्यातील 12 जिल्हा परिषदा आणि त्यांतर्गतच्या 125 पंचायत समित्यांच्या सार्वत्रिक निवडणुकांसाठी आज मतदान पार पडणार आहे.
जिल्हा परिषदेच्या ७३१ तर आणि पंचायत समित्यांच्या १ हजार ४६२ जागांसाठी ही निवडणूक होत आहे. एकूण ७ हजार ४३८ इतके उमेदवार निवडणूक रिंगणात असून, सर्व मिळून एकूण २ कोटी ८ लाख २० हजार ७०२ इतकी मतदार संख्या आहे. संपूर्ण मतदान प्रक्रियेसाठी पुरेशा पोलिस बंदोबस्ताची देखील व्यवस्था करण्यात आली आहे.
रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर, छत्रपती संभाजीनगर, परभणी, धाराशिव आणि लातूर या १२ जिल्हा परिषदा आणि त्यांतर्गतच्या १२५ पंचायत समित्यांसाठी ५ फेब्रुवारी रोजी मतदान होणार होते; परंतु उपमुख्यमंत्री अजित पवार यांच्या अपघाती निधनामुळे मतदान पुढे ढकलण्यात आले.
.png "Videos"){kind=small}
