बुधवार, 2 सप्टेंबर 2026
मुलाकडून आईला कड्याने मारहाण (संग्रहित फोटो)
पुणे : वडिलांकडून मुलाचा खून अन् मुलाकडून आईचा खून झाल्याच्या दोन वेगवेगळ्या घटना शहरात ताज्या असतानाच, मुलाने कोणतेही कारण नसताना जन्मदात्या आईला बेदम मारहाण केल्याचा संतापजनक प्रकार समोर आला आहे. हातातील गोल कड्याने तोंडावर प्रहार केल्याने संबंधित ज्येष्ठ महिला गंभीर जखमी झाली असून त्यांच्या ओठाला तब्बल ८ टाके पडले आहेत.
याप्रकरणी आशा राजेंद्र सरोदे (वय ६०, रा. गोकुळनगर) यांनी येवलेवाडी पोलिस ठाण्यात फिर्याद दिली आहे. त्यावरून पोलिसांनी त्यांचा मुलगा राहुल राजेंद्र सरोदे (वय ३३, रा. गोकुळनगर) याच्याविरुद्ध गुन्हा दाखल केला आहे. पोलिसांनी दिलेल्या माहितीनुसार, ही घटना २९ ऑगस्ट रोजी रात्री साडेआठ वाजण्याच्या सुमारास गोकुळनगर येथील राहत्या घरात घडली. आरोपी राहुल याने क्षुल्लक किंवा कोणतेही ठोस कारण नसताना आईला शिवीगाळ करत हाताने मारहाण करण्यास सुरुवात केली.
त्यानंतर त्याने स्वतःच्या उजव्या हातातील लोखंडी गोल कड्याने आईच्या तोंडावर जोरदार प्रहार केला. या हल्ल्यात फिर्यादी यांच्या ओठाला गंभीर दुखापत झाली असून, उपचारादरम्यान डॉक्टरांना ८ टाके घालावे लागले. या प्रकरणाचा पुढील तपास पोलिस उपनिरीक्षक काळे करत आहेत.
जुन्या वादातून तरुणावर चाकूने वार
पुण्यातील दुसऱ्या एका घटनेत, जुन्या भांडणाचा राग मनात धरून एका तरुणावर चाकूने प्राणघातक हल्ला केल्याची घटना दत्त मंदिर चौकात घडली. याप्रकरणी शाहरुख सलीम बागवान (वय ३१, रा. इंदिरानगर खड्डा, गुलटेकडी) यांनी दिलेल्या फिर्यादीवरून रुपेश मारुती कांबळे (वय ३८, रा. इंदिरानगर खड्डा, गुलटेकडी) याच्यावर स्वारगेट पोलिस ठाण्यात गुन्हा दाखल करण्यात आला आहे.
पोलिसांचा खबरी असल्याचा संशय अन्…
आरोपीने फिर्यादी यांच्याशी वाद घालत ‘तू पोलिसांचा खबरी आहेस,’ असा संशय घेऊन शिवीगाळ केली. त्यानंतर फिर्यादी तेथून निघून गनीबाबा दर्गाजवळ जाऊन बसले असता, आरोपी रुपेश तिथे पोहोचला. त्याने कमरेला लावलेला चाकू काढून शाहरुख यांच्या उजव्या मांडीवर व छातीच्या डाव्या बाजूला वार करून त्यांना गंभीर जखमी केले.
