वसई: वसईमधून एक धक्कादायक घटना समोर आली आहे. सततचे आजारपण तसेच मुलाला आणि सुनेला त्रास नको म्हणून एका वृद्ध दाम्पत्याने टोकाचे पाऊल उचलले आहे. ८१ वर्षीय वृद्ध व्यक्तीने आधी स्वयंपाकघरातील चाकूने पत्नीचा गळा कापून ठार मारले. नंतर त्याच चाकूने स्वतःच्या मनगटाच्या नसा कापून आत्महत्येचा प्रयत्न केला. या भयंकर घटनेने वसईमध्ये एकच खळबळ उडाली आहे.
नेमकं काय घडलं?
शनिवारी रात्री सुमारे ८.३० वाजताच्या सुमारास गॅब्रियल परेरा (वय ८१) यांनी स्वयंपाकघरातील चाकूने पत्नी आर्टिना परेरा (वय ७४) यांच्यावर हल्ला करून ठार मारले. त्यानंतर त्यांनी त्याच चाकूने स्वतःच्या मनगटाच्या नसा कापून आत्महत्येचा प्रयत्न केला. गंभीर जखमी अवस्थेत परेरांना रुग्णालयात दाखल करण्यात आले असून ते सध्या मृत्यूशी झुंज देत आहेत.
घटनेच्या वेळी दाम्पत्याचा मुलगा घराबाहेर गेला होता. परत आल्यानंतर घर आतून बंद असल्याने त्याने दरवाजा तोडला असता आई रक्ताच्या थारोळ्यात मृतावस्थेत आणि वडील गंभीर जखमी अवस्थेत आढळले. त्याने तत्काळ पोलिसांना कळवले. वसई पोलिसांनी घटनास्थळी धाव घेत मृतदेह ताब्यात घेऊन तो शवविच्छेदनासाठी शासकीय रुग्णालयात पाठवला. या प्रकरणी गॅब्रियल परेरा यांच्याविरुद्ध भारतीय न्याय संहिता (BNS) कलम १०३(१) (खून) अंतर्गत गुन्हा दाखल करण्यात आला आहे. मात्र, अजून कोणालाही अटक करण्यात आलेली नाही. स्थानिक पोलिस पुढील तपास करत आहेत.
समोर आलेल्या माहितीनुसार, या प्रकरणाची माहिती मीरा-भाईंदर-वसई-विरार (MBVV) पोलिसांनी दिली आहे. पती- पत्नी दोघेही दीर्घकाळापासून आजारी होते. दोघेही मानेची, कंबर, गुडघे दुखी सह इतर व्याधीने ग्रस्त असल्याची माहिती समोर आली आहे.
अल्पवयीन मुलीचे कुटुंबीय विसर्जनाला गेले आणि भयंकर घडलं
अकोल्यातून एक धक्कदायक घटना समोर आली आहे. गणेश विसर्जनाच्या दिवशी एका अल्पवयीन मुलीचे कुटुंबीय विसर्जनासाठी गेले असता तिच्या घरात घुसून बलात्कार केल्याची घटना समोर आली आहे. चाकूचा धाक दाखवत ही घटना घडली आहे. पोलिसांनी एका संशियित व्यक्तीवर गुन्हा दाखल केला आहे. या घटनेने मोठी खळबळ उडाली आहे.
