पाटणा : बिहारचे मुख्यमंत्री नितीश कुमार (Bihar CM Nitish Kumar) हे नेहमी चर्चेमध्ये असतात. त्यांच्या राजकीय खेळीमुळे अनेकदा ते चर्चेचे कारण बनतात. नुकतेच त्यांनी भाजपसोबत (BJP) युती करत सरकार स्थापन केले आहे. यानंतर मात्र नितीश कुमार यांच्या जीवाला (Nitish Kumar Bomb threat) धोका निर्माण झाला आहे. नितीश कुमार यांच्या नावे मेसेज आला असून यामध्ये भाजपसोबत वेगळे व्हा अन्यथा बॉम्बने उडवू असे लिहिण्यात आले आहे.
बिहारचे पोलीस महासंचालक यांना नितीश कुमार यांच्या संबंधित धमकीचा सदर मेसेज आला. यानंतर पोलीस यंत्रणा तातडीने कामाला लागली. पोलीस महासंचालकांना ज्या फोन क्रमांकावरुन मेसेज आला त्याची चौकशी करण्यात आली. यानंतर मेसेज करणाऱ्या व्यक्तीचे लोकेशन कर्नाटकातील देवनगिरी जिल्ह्यात असल्याची माहिती मिळाली. बिहारच्या आर्थिक घोटाळा विभागानं कर्नाटकात छापेमारी केली आणि धमकी देणाऱ्या आरोपीला अटक केली.
बिहारचे मुख्यमंत्री नितीश कुमार यांना बॉम्बने उडवण्याची धमकी देणाऱ्या आरोपीचे नाव सोनू असे आहे. तो बीएनएम हायटेक अॅग्रो इंडस्ट्रीज राइस मिलमध्ये पोती शिवायचं काम करतो. चौकशीवेळी त्यानी सांगितलं की, बिहारमधील वाढती बेरोजगारी आणि गरिबीला तिथलं सरकारचं कारणीभूत आहे. त्याचं कुटुंब बिहारच्या हसनपूर इथल्या दयानगरमध्ये राहतं. धमकीच्या इतक्या क्लीप पाठवल्यानंतरही बिहारमध्ये कोणतीही हालचाल दिसून येत नसल्याने पुढे त्या क्लिप आरोपी सोनू माध्यमांना देणार होता. पण त्यापूर्वी त्याला पोलिसांनी ताब्यात घेतलं आहे.
