तुळजापुरात 'बर्निंग बस'चा थरार; धावत्या ट्रॅव्हल्स बसने घेतला अचानक पेट अन्... (संग्रहित फोटो)
तुळजापूर : तुळजापूर शहरापासून काही अंतरावर नागोबा मंदिर परिसरात शनिवारी (दि. 11) दुपारी सुमारास एक धक्कादायक घटना घडली. तुळजापूरहून सोलापूरच्या दिशेने जाणाऱ्या शर्मा ट्रॅव्हल्स (एमएच २६/ सीएच १८३०) या प्रवासी बसला अचानक आग लागली. सुदैवाने चालकाच्या सतर्कतेमुळे मोठा अनर्थ टळला.
देवराज हॉटेलसमोर जात अस्स्ताना बसच्या ब्रेक लाईनरमध्ये तांत्रिक बिघाड झाल्याने इंजिन व टायरमधून अचानक धूर निघू लागला. चालक परमेश्वर शहाजी केंद्रे (रा. वागदरवाडी, ता. लोहा, जि. नांदेड) यांनी क्षणाचाही विलंब न लावता गाडी रस्त्याच्या कडेला थांबवली आणि कंडक्टरला सुरक्षित बाहेर काढले. बसमधून येणाऱ्या फटफट आवाजामुळे परिसरात काही काळ भीतीचे वातावरण निर्माण झाले. स्थानिक नागरिकांनी तत्काळ घटनास्थळी धाव घेत मदतकार्य सुरू केले.
दरम्यान, या घटनेची माहिती मिळताच तुळजापूर नगरपरिषदेच्या अग्निशामक दलाची गाडी व तामलवाडी टोलनाक्याची अॅम्बुलन्स (१०३४) तात्काळ घटनास्थळी दाखल झाली. आग विझवण्यासाठी युद्धपातळीवर प्रयत्न करून आग आटोक्यात आणण्यात आली.
पोलिसांनी घेतली तत्काळ घटनास्थळी धाव
या आगीत कोणतीही जीवितहानी झाली नसली, तरी बसचे मोठे आर्थिक नुकसान झाले आहे. ब्रेक लाइनर जाम झाल्याने टायर घासून गरम झाले आणि त्यातूनच आग लागल्याची प्राथमिक माहिती मिळाली आहे. घटनास्थळी तुळजापूर पोलिस ठाण्याचे अधिकारी व कर्मचारी, तसेच तामलवाडी पोलिस ठाण्याचे सहाय्यक पोलिस निरीक्षक गोकुळ ठाकूर यांच्या मार्गदर्शनाखाली पोलिस पथकाने तत्काळ धाव घेत परिस्थिती नियंत्रणात आणली असून, पुढील तपास सुरू आहे.
कर्जतमध्ये शेतकऱ्याच्या घराला आग
दुसऱ्या एका घटनेत, कर्जत तालुक्यातील माणगाव तर्फे वरेडी ग्रामपंचायतमधील आंबिवली गावातील एका शेतकऱ्याचे घर आगीत भस्मसात झाले. घराला आग लागली, त्यावेळी घरात कोणीही व्यक्ती नसल्याने जीवितहानी झाली नाही. मात्र, घराचे १०० टक्के नुकसान या आगीमध्ये झाले आहे. ही घटना काही दिवसांपूर्वीच घडली होती.
हेदेखील वाचा : Fire News : आंबिवली गावामधील घराला भीषण आग, घरातील सर्व साहित्य जळून खाक
